89
Da Deal God Make Wit David
Etan from da Ezra ohana make dis teaching kine song.
1 Eh! You Da One In Charge!
From now an foeva, I goin sing
Bout how you stay tight
Wit yoa peopo.
I goin sing fo da peopo
Dat goin come bumbye,
Fo make shua dey goin know
Fo trus you erytime
Fo do wat you tell you goin do.
2 Dis wat I tell: “Get one ting stay shua:
You stay tight wit yoa peopo foeva.
An get anodda ting
Dat stay solid inside da sky:
You erytime do
Wat you tell you goin do.”
3 God tell dis: “I wen make one deal
Wit da guy I wen pick.
Dass da promise I wen make
Wit King David, da guy dat work fo me:
4 ‘I goin make shua dat da peopo
Dat goin come from you,
Goin get da right fo be kings, foeva.’ ”
Dass wat God wen promise.
(Time out fo da music.)
5 Eh! You Da One In Charge!
Erybody inside da sky tell
Dat da tings you do, stay awesome!
Wen da ones dat stay spesho fo you
Come togedda,
Dey talk even mo plenny
Bout how dey trus you fo erytime do
Wat you tell you goin do!
6 Da One In Charge, no mo nobody
Inside da sky dat stay like you!
Even from da good spirits inside da sky,
No mo nobody stay like you.
7 Eh God, wen da ones dat stay spesho
Fo you come togedda,
You so awesome, dat dey all come sked!
You mo skery den all da ones
Dat stay aroun you!
8 Eh! You Da One In Charge,
You da God Ova All Da Armies.
No mo anodda god
Dass strong jalike you!
Erybody know fo trus you bout eryting
Cuz you erytime do
Wat you tell you goin do.
9 You da one dat tell da ocean waves
Fo come big
An wen da waves come big,
You calm um down.
10 You da one wen smash
Da sea monsta Rahab fo him mahke.
You get plenny powa,
Fo make da peopo dat stay agains you
Run away all ova da place.
11 Da sky, yoas.
An da earth yoas too.
Eryting dat get inside da world—
Was you wen put um dea.
12 From da north side to da south side,
You wen make eryting dea.
Mount Tabor an Mount Hermon
Stay yell,
Cuz dey stay good inside
Bout who you.
13 You get plenny powa fo fight.
Strong, yoa right arm,
Da way you use um.
14 You get da right fo stay in charge
Cuz you da king,
Cuz you erytime do da right ting
An you fair wit erybody.
Wit you, erybody know
You stay tight wit yoa peopo,
An wateva you tell you goin do,
You do um erytime.
15 Eh! You Da One In Charge!
Da peopo dat wen learn
How fo tell dat you da bestes,
Dey can stay good inside fo real kine.
Ery place dey go,
You show um wat fo do,
Cuz you stay wit um,
Jalike you da light fo dem.
16 All day, dey like dance an sing
Cuz dey know who you!
Dey stay amping out
Cuz you erytime do da right ting.
17 Dass cuz you da One
Dat make yoa peopo stay strong an awesome.
All us guys stay strong
Cuz you do good tings fo us guys.
18 Fo shua, you Da One In Charge,
An you wen give us guys da king
Dat take kea us guys jalike one shield.
You da One dat stay good an spesho,
Dat help us Israel peopo,
An dat wen give us da king.
God Goin Stick Wit Da Deal
He Wen Make Wit David
(2 Samuel 7:14-17)
19 Eh God! Long time befo time,
You wen talk inside one dream,
To da peopo dat stay tight wit you.
Dis wat you wen tell:
“Me, I wen pick one army guy
An help him fo come strong.
I wen pick one guy from da peopo
Fo make him come big.
20 I wen go find David,
An he work fo me.
I wen put da oil dat stay spesho fo me
On top his head,
Fo show I wen pick him.
21 Wit da powa I get
I goin make him stay solid
An make him stay strong.
22 Da peopo dat stay agains David,
Dey no goin win ova him.
Da peopo dat do bad kine stuff,
Dey no goin make trouble fo him.
23 Da peopo dat go agains him,
I goin smash um.
Da peopo dat hate him,
I goin wack um.
24 David goin know fo trus me
Cuz erytime I do wat I tell.
He goin know dat I stay tight wit him.
Cuz he my guy, he goin come
Mo an mo strong.
25 I goin give David powa all ova da place,
Ova da ocean an da rivas.
26 He goin tell me,
‘Eh God, you my faddah!
You da God fo me.
You get me outa trouble cuz you strong
Jalike one big rock.’
27 I even goin make David
My numba one boy,
Da mos importan king guy
Inside da whole world.
28 I goin stay tight wit David foeva.
Da deal I make wit him goin las foeva.
29 I goin make shua
Dat da peopo dat goin come
From David blood line,
Goin stay in charge.
Goin get one a dem wit da right
Fo sit on top David throne foeva,
Jalike da sky stay foeva.
30 “Bumbye, if David kids no lissen
Wat I teach um
An dey no follow my Rules,
31 An if dey go stick finga at my Rules
An no make shua dey do
Wat I tell um dey gotta do,
32 Den I goin punish dem wit my stick
Wen dey go agains me,
An I goin sen da plague
Cuz David kids wen broke my Rules.
33 But still yet, I goin stay tight
Wit David all da time.
I no goin bulai him fo make um
So he no can trus me.
34 I no goin stick finga
At da deal I wen make wit him.
I no goin change wat I wen tell.
35 I wen make one strong promise to David,
An I goin do um,
Cuz I stay good an spesho.
An dat promise goin las foeva.
No way I goin bulai David!
36 Goin get peopo dat come from him
Fo be da king in front me foeva,
Jalike da sun come up foeva.
37 Dey goin be dea foeva in front me,
Jalike da moon stay all da time
Inside da clouds,
Fo show dat I no change my mind.”
(Time out fo da music.)
Sad Song Fo Da King
38 But eh, God!
You ack jalike you donno yoa king!
You treat um jalike he pilau.
You wen come huhu
Wit da king you wen pick.
39 You tell, “No mean notting,
Da deal I wen make
Wit da guy dat work fo me!”
You wen take his crown
An throw um down on top da dirt!
40 Da king get one strong wall aroun him,
But you knock um down!
You bus up ery place wea da king hide!
41 All da peopo dat pass by dea,
Dey cockaroach da king stuffs.
All da peopos dat live nea him,
Dey tell stink kine joke bout him.
42 Da peopo dat come agains da king,
You make dem win.
You make da guys dat stay agains him
Feel good inside.
43 Wen da king try fo use his sharp sword,
Da sword go agains him!
Wen he gotta fight,
You no help notting.
44 Da king was awesome befo time,
But now all dat pau cuz a you.
You wen huli his throne.
45 Da king was one young guy,
But you wen make um
Come makule real fas.
You wen make him come all shame.
(Time out fo da music.)
Da King Aks God Fo Help Him
46 Eh! You Da One In Charge!
How long you goin hide?!
Foeva, o wat?!
How long you goin stay huhu,
Jalike one fire burning?
47 Try tink bout me.
Real short, da time I get fo live!
You tink ony wase time
You wen make peopo, o wat?!
48 No mo nobody can live
An no mahke eva!
No mo nobody can do someting
Fo get outa da Mahke Peopo Place!
(Time out fo da music.)
49 Eh my Boss! Befo time
You wen stay plenny tight
Wit yoa peopo!
You wen make one strong promise
To King David,
An you erytime do
Wat you tell you goin do.
But dass not how stay now!
50 Eh Boss! No foget how I work fo you!
I da one dat gotta handle
Wat all da diffren peopos tell!
I gotta handle,
Even wen dey make
Stink kine jokes bout me.
51 Eh! You Da One In Charge!
Da diffren peopos dat stay agains you,
Dey da ones dat stay make
Pilau kine joke.
Ery place I go, dey make pilau kine joke
Bout me too,
Da king guy you wen pick.
Book Numba Three Pau
52 Real good fo tell dis all da time:
Da One In Charge,
He do plenny good tings fo us guys.
Dass fo shua!
Dass it!