92
Song Fo Da Res Day
Song Fo God, fo sing um on da Res Day
1 Good, fo tell erybody
Dat you da greates, Da One In Charge!
Good, fo make music
Fo erybody know who you,
Da God Dass Mo Importan
Den All Da Odda Gods!
2 Morning time, I stay tell
How you stay tight wit yoa peopo!
Nite time, I stay tell
How I trus you erytime!
3 I stay play da ten-string harp
An da twelve-string harp,
I stay play da small harp
Fo help me tink plenny bout you.
4 Cuz Da One In Charge,
You make me stay good inside
Cuz a da tings you do awready.
I like sing real loud cuz I feel real good,
Erytime I tink bout da tings you do
Cuz a yoa powa.
5 Eh! Da One In Charge,
All da kine tings you do
Stay awesome to da max!
An gotta tink plenny fo undastan
All da tings you make plan fo do!
6 But fo da kine peopo
Dat donno how fo tink good,
Get stuff dey no goin know.
Da dumb buggahs dat tink
Dey no need learn notting,
Dey no can undastan
Wat I goin tell now.
7 Dis wat dey no undastan:
No matta da bad kine peopo come up
All ova da place jalike grass,
An all da bad guys
Dat stay do wass wrong
Look good,
Jalike wen da flowas come out,
God goin wipe um out,
An dey goin stay wipe out foeva!
8 But you, you Da One In Charge,
An you stay
Da mos importan one foeva!
9 Dis fo shua:
Da peopo dat stay agains you,
Da One In Charge,
Dey goin come mahke die dead!
Da ones dat stay do wass wrong,
Dey goin run away all ova da place!
10 You wen make me come real strong,
Jalike da big wild bulls.
You give me one haku lei fo my head,
Fo show you get aloha fo me.
11 I see awready wat wen happen
To da guys dat stay agains me.
I hear awready wat wen happen
To da bad peopo dat come fo fight me.
12 Da peopo dat stay do wass right,
Dey goin come up all ova da place
Jalike da palm trees.
Dey goin grow an come big
Jalike da cedar trees Lebanon side.
13 Jalike dey stay planted
By da Temple Fo Da One In Charge
Jalike dey come up
Inside da open lanai
Aroun da place wea oua God stay.
14 Even afta dose peopo dat do wass right
Come ol an get gray hair,
Dey still strong,
Jalike dey get plenny life inside dem
An dey still stay growing.
15 Dey tell,
“Da One In Charge
Stay do da right ting erytime.
He jalike one big rock fo me,
Cuz he take kea me.
He ony stay good,
No mo notting bad in him!”