9
David An Mefiboshet
1 David tell his guys, “Get somebody still yet from Saul ohana? O no moa? Fo me keep da promise I wen make to Jonathan bout da ones dat come from da Saul ohana!”
2 One guy Ziba dat wen work fo da Saul ohana, David guys tell him fo come in front David. Da king aks him, “You Ziba?”
He tell, “Az me, Ziba. An you my boss.”
3 King David aks, “Get somebody still yet from Saul ohana fo me make good to dem, cuz a God?”
Ziba tell da king, “Still yet get one a Jonathan boys. He hurt his two feets an he no can walk.”
4 King David aks, “Wea he stay?”
Ziba tell, “He stay wit Makir, Ammiel boy, inside Lo-Debar town.”
5 So King David tell guys fo bring him from Lo-Debar, from Makir house.
6 Mefiboshet, Jonathan boy an Saul grankid, come by David. He go down on top da groun fo show David respeck.
David tell, “Eh Mefiboshet!”
Mefiboshet tell, “Az me, an you my boss.”
7 David tell him, “No sked! Cuz fo shua I goin make good to you cuz I wen stay tight wit yoa faddah Jonathan. I goin give back to you all da land dat yoa granfaddah Saul wen own, an you goin live wit me inside da palace an eat at my table all da time!”
8 Mefiboshet go down in front David an tell, “Who me, boss, dat you even tink I importan?! Cuz I ony junk, you know, jalike one mahke dog!”
9 Den King David call Ziba, da guy dat wen work fo Saul befo time. He tell um, “I stay give Mefiboshet, yoa boss grankid, eryting dat Saul an his ohana wen own.
10 Mefiboshet, yoa boss grankid, he goin erytime live wit me inside da palace an eat at my table all da time. You an yoa boys an yoa worka guys goin take kea dat land fo him an bring in da food, fo yoa boss grankid get eryting he need.” (Ziba get fifteen boys an twenny worka guys.)
11 Ziba tell da king, “I yoa worka guy, an you, my boss da king. I goin do eryting you tell me fo do.” So Mefiboshet live wit David an eat at David table, jalike one a da king kids.
12 Mefiboshet get one young boy name Mika. An erybody inside Ziba ohana come worka guys fo Mefiboshet.
13 So az how come Mefiboshet live Jerusalem side, an he live inside da king palace an eat at da king table. He no can walk cuz his two feets all broke.