3
Wahine:
1 Nite time, I wen lay on top da bed.
I wen miss da one dat I love real plenny!
I like see him, but I no can find him.
2 I tell: I goin get up now an go aroun da town,
Fo look fo him on da streets an da open places.
I goin look fo da one dat love me,
An I like find him.
I look, but I neva find him.
3 Da security guard guys fo da town wen find me
Wen dey stay go aroun da town.
“Eh! You guys wen see da one dat I go all out fo love?”
4 Right afta I go way from dem,
I find da one dat I go all out fo love.
I hold him an no let him go away,
Till I take him inside my muddah house,
Inside da room a da one dat wen come hapai wit me.
5 Eh! You Jerusalem wahines!
I like you guys make one strong promise to me,
An tell da wild deers an da wahine deers,
Fo dem lissen wat you promise!
Promise you no goin come real excited fo make love
Till da time stay right!
Jerusalem Wahines:
6 Eh! Wat dis, dat stay come up from da boonies,
Jalike az smoke go up from da groun to da sky?
Smell jalike myrrh kine perfume an incense
Dat dey make from all da spices dat da trader guys get.
7 Look! Az Solomon on top his travel chair!
He stay come wit sixty army guys dat know how fo fight,
Da bestes fighta guys in Israel!
8 All dose guys get swords.
Dey all know how fo fight one war.
Dey get dea swords by dea side.
Dey stay ready if get skery kine stuff happen nite time.
9 King Solomon wen make da travel chair fo him
Fo his guys carry him.
He make um wit wood from Lebanon.
10 He make da poses wit silva,
An da bottom wit gold.
Da back a da chair stay cova wit purple cloth all ova um.
Inside get pichas
Dat da wahines from Jerusalem wen make cuz dey love him.
11 Come out, all you Jerusalem wahines!
Come look King Solomon wit da crown on top his head!
Az da crown his muddah wen put on top his head,
Da day he marry his wife,
An he stay real good inside.