3
Wat Goin Happen To Da Jerusalem Peopo
1 Bummahs, fo Jerusalem town!
Da peopo dea put presha on top odda peopo!
Dey go agains me! Dey make um come pilau!
2 Dey no lissen nobody.
Dey tell “Laytas” wen somebody teach um how fo do da right ting.
Dey no trus Da One In Charge.
Dey no come nea dea God.
3 Dea leadas, dey jalike da lions dat make big noise.
Da govmen guys, dey jalike da wild dogs dat hunt wen almos dark.
Dey eat up eryting,
So no mo notting dea, morning time.
4 Da guys ova dea dat tell dey talk fo God,
Dey stay buckaloose.
Dey da kine guys you no can trus.
Dea pries guys make pilau da place dat stay spesho fo God.
Dey make da Rules From God come jalike dey no mean notting.
5 But Da One In Charge, he stay dea inside da town,
An he do da right kine tings.
He no do wass wrong!
Ery morning he judge da peopo da right way.
Ery new day he no let nobody down.
Still yet, dose peopo dat no do wass right,
Dey no mo shame!
6 Da One In Charge tell: “I wen wipe out plenny peopos.
Dea big towns dat get strong wall stay all bus up.
No mo nobody stay inside dea streets.
No mo nobody go thru dea.
Dea big towns stay all wipe out.
No mo nobody stay dea.
7 Me, Da One In Charge, I tell da Jerusalem peopo,
‘Fo shua you guys goin get choke respeck fo me now,
An lissen wen I teach you how fo do da right kine stuff.’
If dey do dat, den I no need wipe out da place wea dey live,
An I no need punish dem all da ways I wen tink bout.
But still yet, dey stay amping out
Fo do all kine pilau kine stuff.”
8 Da One In Charge tell: “Az why wait fo me,
Fo da day I goin stan up fo poin finga da Jerusalem peopo.
Cuz I make up my mind awready
Fo bring togedda all da peopos an dea kings.
An I goin make dem know dat I stay real huhu wit dem.
I goin burn up all da peopo inside da world,
Cuz I go all out fo no let um go down in front odda gods!
9 “Dat time, I goin clean up da way all da peopos talk,
So dey talk good kine bout me!
Den all a dem goin call out to me, Da One In Charge, fo help um,
Cuz dey know wat kine god me.
Dey all goin work togedda fo me.
10 From da odda side a da Sudan rivas,
My peopo dat show me love an respeck,
Da ones dat come from my peopo dat stay scatta all ova,
Dey goin bring presents fo me.
11 Dat time, you guys no goin get shame,
Fo all da wrong kine stuff you guys wen do agains me!
Cuz den, I goin take away from Jerusalem town
All da peopo dat feel good cuz dey get big head.
You guys no goin ack high makamaka no moa,
On top da hill dat stay spesho fo me.
12 But I goin let da peopo stay inside Jerusalem
Dat stay suffa, an no mo notting.
But dey trus me Da One In Charge,
Fo take kea dem.
13 “Da Israel peopo dat still stay alive,
Dey no goin do wrong kine stuff.
Dey no goin bulai peopo.
Dey no goin tell stuff you no can trus.
Jalike sheeps dat eat grass an den res,
No mo notting goin make dem run away sked.”
God Goin Bring Back His Peopo
14 Zefaniah tell:
“Eh! You peopo dat come Zion hill fo pray!
Yell cuz you stay good inside!
You Israel peopo! Yell out loud,
Go all out fo dance an sing,
You Jerusalem peopo!
15 Cuz Da One In Charge no goin punish you guys.
He wen make da peopo dat stay agains you go way.
Da One In Charge, da king fo us Israel peopo, he stay wit you guys!
No sked dat one bad ting goin happen one mo time!
16 Dat time, da Jerusalem peopo goin hear dis:
‘No sked, you peopo dat go Zion hill fo pray!
No lose fight!
17 Yoa God, Da One In Charge, stay right dea wit you guys!
He get plenny powa fo make you guys da winnas!
He goin dance an sing bout you guys.
He goin make you guys come so notting bodda you,
Cuz he get love an aloha fo you guys.
He goin yell, cuz he stay real good inside bout you guys!’ ”
18 Da One In Charge tell, “You guys dat stay sad inside
Cuz you no can go to da spesho religious ceremonies,
I goin take away yoa hard time an yoa shame.
19 Wat I goin do dat time, I goin do wat I gotta do
To all da peopo dat put presha on top you guys.
I goin help da ones dat no can walk good,
An bring togedda da ones dat stay scatta.
Right now, dose peopo get shame.
But I goin make peopo all ova da world
Talk good bout dem, an show respeck fo dem!
20 An dat same time, I goin bring you guys togedda.
I goin bring you guys back to yoa place.
I goin make da peopos all ova da world
Know wat kine peopo you guys,
An make um talk good bout you guys.
Dat time, I goin bring you guys back
So you no goin stay prisonas no moa,
An you guys goin see all dat happen!”
Dass wat Da One In Charge tell.