15
Da Story Bout Da Lost Sheep
(Matthew 18:12-14)
1 One time all da guys dat collect money fo tax fo da govermen an da odda guys dat get bad name wen come togedda by Jesus fo listen.
2 But da Pharisee guys an da teachas dat teach Godʼs Rules wen squawk. Dey say, “Dis guy get peopo wit bad name fo his friends, an he eat wit dem.”
3 So Jesus tell um dis fo teach um:
4 He say, “Wat you tink? If one a you guys get hundred sheeps, but one sheep stay lost, you goin leave da ninety nine sheeps inside da boonies, an go look fo da one sheep dat stay lost, yeah?
5 Wen you find um, you feel real good inside, an you put um on top yoa shouldas,
6 an go home. Den you tell all yoa friends an da peopo nex door, ‘Come, party wit me! Cuz I wen find my sheep dat was lost.’
7 I telling you, same ting, God an da angel guys inside da sky feel mo good inside cuz a one bad guy dat come sorry fo all da bad kine stuff he wen do, an like pau do um, den cuz a all da odda guys dat tink dey no need come sorry.”
Da Story Bout Da Lost Coin
8 “O, wat you tink? If one wahine get ten silva coins, an she lose one, wat she goin do? She goin open one lamp, den she sweep da whole house, an look real good till she find um.
9 An wen she find um, she goin tell all her friends an da peopo nex door, ‘Come, party wit me! Cuz I wen find my coin dat was lost!’
10 I telling you, same ting, da angel guys dat stay wit God feel plenny good inside, everytime one bad guy come sorry fo all da bad kine stuff he wen do, an pau do um.”
Da Story Bout Da Lost Boy
11 Jesus wen tell, “Had one guy dat get two boys.
12 Da younga boy wen tell his fadda, ‘Papa, give me my share from all you get.’ So da fadda wen split all he get an give da boys dea share.
13 Afta dat da younga boy wen get all his stuffs, sell his share an take da money, an go one far place. An ova dea he spend um all, cuz he no stay in charge a himself.
14 Den, afta he spend all his money, get hard time ova dea. No mo food da whole place. An da boy, he no mo notting.
15 Den da boy wen go by one guy from dat country, an da guy wen send him out inside his fields, fo feed da pigs.
16 Man, da boy stay so hungry he like eat da pods da pigs was eating, an neva have nobody dat give him notting!
17 “Den he wise up an tink, ‘Eh, how come?! All da guys dat work fo my fadda fo pay, dey get mo plenny food den dey can eat. Me, I so hungry ova hea, dat I litto mo mahke!
18 Mo betta I go back wit my fadda. Den I tell um, “Papa, I wen do bad ting agains God in da sky, an agains you.
19 I not good nuff fo be yoa boy. Let me work fo you fo pay, so den bumbye I pay you back.” ’
20 Den he wen leave da place an go to his fadda.
“He still far from da house wen his fadda wen spock him. His faddaʼs heart fill wit pity an he run. He hug his boy an kiss him.
21 Da boy say, ‘Papa, I wen do bad ting agains God in da sky, an agains you. I not good nuff fo be yoa boy.’
22 “But da fadda wen tell his worka guys, ‘Come quick! Hurry up! Go get one robe, da bestes one, an put um on him. Put one ring on top his finga an shoes on top his feet.
23 Go get da bestes young cow an kill um. We goin make one party an eat an dance an sing!
24 Cuz dis my boy. Jalike he wen mahke, but now he come back alive! Cuz he was lost, but now we find um!’ An dey wen make party.
25 “Da older boy, he stay working inside da fields. Den he come near da house, an he hear da music wit da hula.
26 So he aks one a da kids, ‘Eh, wass da haps?’
27 “Da kid tell, ‘Yoa brudda wen come back home, an yoa fadda wen tell da worka guys fo kill da bestes young cow, cuz yoa fadda wen take him in, an everyting okay now!’
28 “Da older brudda, he wen come real huhu. He no like go inside da house. So da fadda guy go outside an beg him fo come inside.
29 He tell his fadda, ‘Look hea! I wen work fo you jalike one slave, plenny years! I neva go agains notting you wen tell me fo do! Wat you wen give me, hah? You neva even give me one goat fo make party wit my friends!
30 But dis guy, yoa boy, he wen eat up all da money fo yoa land fo pay da kine wahines dat fool aroun fo money. An wen he come home, right den an dea you kill da bestes young cow fo him, an den!’
31 “But da fadda tell, ‘My boy, you everytime stay hea wit me, an everyting I get, yoas too.
32 But eh! good we make party an dance an sing an feel good inside! Cuz jalike dis guy, yoa brudda, wen mahke, but now he come back alive! Cuz he was lost, but now we find um!’ ”