11
Si Pedro, inistoriya to sota dingdingka nen Apo Shiyos son si‐kato
1 Jet nontan, sota ira apostol tan sota ira emati ja ẃared Jodia, shinemag sha ey sota ira toon aliẃen Hodiyos ket ineẃat sha ngoy esel nen Apo Shiyos nonta intoro nen Pedro.
2 Isonga idi nay‐oli si Pedro shi Jerusalem, sota ira kait ton Hodiyos ja ematid man, inseg‐ang shes Pedro jet kowan sha son si‐kato ey,
3 “Si‐kam Pedro, apay nga dimaw ka shi baley ni toon aliẃen Hodiyos, jet ekipengan ka pay son si‐kara?”
4 Nem si Pedro, siningpet ton inistoriya son si‐kara sota epasemak son si‐kato, ja kowan to ey,
5 “Nonta ẃara‐ak shi Jopa ja emansheẃat son Apo Shiyos, ẃaray inpa‐sas to son si‐kak. Inpa‐sas toy ekalbot alid dangit ja na‐iktan ni ẃanet sota epat ta shogo to; jet dimespag ali son si‐kak.
6 Siningpet koy bisna jet ẃaren emin i kalasin animal nodtan, ẃaray kalasin emankoshap shi bo‐day, ẃaray kalasin titit.
7 Jet ẃaray intenengan kon esel ja kowan to ey, ‘Pedro, dayat ka, pamadti ka ni piyan mon kenen!’
8 Nem say insongbat ko, kowan ko ey, ‘Enshi Apo, ta eg mebedin ja menganak ni angken nganton kaibilang ni si‐kamin Hodiyos ey ensekig!’
9 Nem ẃaray songbat ja edapod dangit ja kowan to ey, ‘Sota banag ja kowan nen Apo Shiyos ey edinis, karam ikowan ey ensekig.’
10 Sajay ya ekalbot, emintedo ja dimespag ali son si‐kak asan ka‐oli mowan da shi dangit.
11 Jet nontan met laeng nga oras, ẃaray tedon too ja mimotok nodta baley ya kawad‐an ko ja edapod Sisaria, ja kowan sha ey sha‐ak odopen.
12 Jet sota Ispirito Santo nen Apo Shiyos, inkowan to son si‐kak ey ekak manshowashowa ja mekidaw son si‐kara. Jet siya, angken saja enem ma a‐aki tayo shi pamati ja i‐Jopa, ekidaw ira son si‐kak, jet si‐kamin emin i dimaw shi baley nen Cornelio.
13 Jet si Cornelio, insodsod to son si‐kami sota inon‐an ton anghil ja dimaw shi baley to, tan insodsod to pay sota inkowan ni anghil son si‐kato. Et kowan kono nonta anghil son si‐kato ey mengibetkag ni en mengodop son si‐kak shi baley nen Simon shi Jopa,
14 ta kowan to ey si‐kak kono i mengikowan son si‐kara ni maypangkep ni kaysedakan shen emin na sanpamilja.
15 Jet idi marama ja naka mantosho son si‐kara, dimespag ali sota Ispirito Santo nen Apo Shiyos ja nan‐iyan son si‐kara ja inges to son si‐katejo ngo nonta pilmiro.
16 Jet ninemnem ko sota inkowan nen Apo Jesus nontan ja kowan to ey, ‘Shanom bengat i inpamonjag nen Juan, nem say pemonjag nen Apo Shiyos son si‐kayo, Ispirito Santo.’
17 Si Apo Shiyos, edawag ey angken sota toon aliẃen Hodiyos, in‐aknan to ngo ira ni Ispirito Santo to, ja inges toy inpasing to son si‐katejo, ni inpamati tayo son Apo Jesucristo. Isonga si‐kak, enshiy kanebengan kon menokil ni piyan nen Apo Shiyos.” Kowan nen Pedro.
18 Jet idi intenengan sha iyay, imeket ira ma sota totoon istay bimalaw so ni inpasing nen Pedro, jet say inpasing sha ma, nan‐iyaman ira son Apo Shiyos, ja kowan sha ey, “No kasta, si Apo Shiyos, kinaasi‐an toy toon aliẃen Hodiyos et intolok ton manbebawi ira, say may‐aknan ngo ira ni biyag ja enshiy to engintegan.”
Sota maypangkep ni emati shi Antiok
19 Nonta naksheng nga binonora si Esteban, inshogi sha men pedigaten ima eshom ma emati, jet sajay iren emati, ebokal ira. Simbi ni eshom i Ponisia, Cyprus tan Antiok, jet intoro shed man i mapteng nga shamag pangkep son Jesus. Nem say intod‐an sha bengat shiman, sota ira Hodiyos.
20 Nem sota eshom ma emati ja i‐Cyprus, tan i‐Sirini, dimaw ngo ired Antiok jet sha intoro so nonta ira toon aliẃen Hodiyos sota mapteng nga shamag pangkep so nen Jesus.
21 Jet si Apo Jesus, tinodongan to ira jay jet eshakel i totoo ja emati so nen Apo Jesus, ja inbi‐jag sha mala sota ogadin kinapagano.
22 Jet sota ira emati ja ẃared Jerusalem, shinemag sha iyay ya inpamati ni aliẃen Hodiyos jet inbetkag sha ma si Bernabe shi Antiok, ja to asen sotan na epasemak.
23 Idi mimotok shiman, inon‐an to ey kinaasi‐an ngo ira nen Apo Shiyos sota aliẃen Hodiyos jet ebadeg ma i imdeng to. Jet nontan, binidin to ira ey ki‐deten sha sotan na pamatira son Apo Jesus.
24 Ta saja si Bernabe, mapteng i ogadi to, tan inshalan ni Ispirito Santo nen Apo Shiyos, tan ebadeg i pamati to. Jet nontan ma, mas eshakel pay iray emati son Apo Jesus.
25 Jet si Bernabe, indekjas to ira et dimaw shi Tarso ja to enapen si Saulo shiman.
26 Idi simbi to si Saulo, in‐ilaw tod Antiok, jet makatawen shen nantoro so nonta ira eshakel la emati. Jet shi Antiok i pilmiron nanshogi‐an ni kowan sha ey Kristiyano i ngaran ni emati son Cristo.
27 Jet nontan, ẃara iray para padto ja edapod Jerusalem ja dimaw shi Antiok.
28 Jet sakey son si‐kara i manngeshan ni Agabo. Sajay ya too, inshalan ni Ispirito Santo nen Apo Shiyos jet inpadto to ey ẃara aliy bitil shi emin na sakop ni dobong. (Jet epasemak iyay nga agpayso nonta timpo ni inpantoray nen Claudio shi Roma.)
29 Jet nontan ma, sota ira emati, ninemnem ni sakey tan sakey son si‐kara ey ipakat shay kabaalan sha ja mengi‐kan ni tolong sha so nonta kakaasin a‐akira shi pamati ja ẃared Jodia.
30 Jet say engi‐idaw nonta inedos sha, si Bernabe nen Saulo, jet in‐awat sha iyay so nonta ira pangolo ni emati shi Jodia.