8
1 Si Saulo i sakey ya makapiyan ey angken bono‐en sha si Esteban.
Si Saulo, pinedigat to ira sota emati son Cristo
Nontan na timpo, epaladoy shaka pesing so nonta ira emati shi Jerusalem, isonga ebokal ira ja nayẃaris shi emin na ili ni Jodia, tan shi Samaria, nem sota ira apostol, si‐kara bengat i ebay‐an ja eg nansisi‐jan.
2 Nem ẃaray eshom ma ebay‐an ja makedsang i pamatira, jet si‐kara i en engibka so nen Esteban. Epaladoy shaka pannengis ni daringit sha pangkep son si‐kato.
3 Jet si Saulo, pinedigat ton pasiya sota emati son Cristo; toka solsolsola pay i kebalebaley ja toka pan‐a‐shela ira sota emati son Jesus ja daleki, angken pay sota ira bibii. Jet toka pan‐ibalod ira.
Sota mapteng nga shamag maypangkep son Jesus, naytoro ngo shi Samaria
4 Jet sota ira emati ja nayẃaris, dimaw iren en mengitosho ni esel nen Apo Shiyos ni maypangkep so nen Jesus shi emin na dinaẃan sha.
5 Jet si Felipe, dimaw shi siyodad ni Samaria ja to itoro i maypangkep so nen Jesus. Intoro to ey si Jesus sota tongpal nonta padto nonta bayag da ey mengisedakan ali.
6 Jet sota totood man, nansaksakey iren dimaw so nen Felipe, ta pipiyan shen itenengan i toka pan‐itoro. Tan say sakey pay ja pinati‐an sha so nen Felipe, inon‐an shay eshakel la dingdingka tod man ja milagro.
7 Angken sota ira dimonyo ja pimeket so nonta ira totoon inpan‐angaw sha, bimetik ira, ja ireka pay emankeljaw. Angken sota ira toon emanpansekit ja eg makakeykey i bakdang sha, tan sota ira epilay, ja eg man‐ekad, mimapteng ma ira.
8 Jet nontan, ebadeg i imdeng ni totood Samaria ni sajay ya edaga son si‐kara.
9 Nodtan na dogad, ẃaray toon manngeshan ni Simon ja emanmantala. Toka idastog i bakdang to ey kangeto‐an, jet nasshaaw ira sota tood Samaria nonta toka dagdag‐a.
10 Jet emin sota totoo nodtan na ili, manshoki shi kabeba‐an ingkatod kangeto‐an, shaka noman pati‐a, jet kowan sha pay ey si‐katoy in‐aknan nen Apo Shiyos ni takal, jet eshamag ey asdeg toy panakabalin to.
11 Jet eshakel noman i istay emati son si‐kato, ta inon‐on‐an sha ni ebayag i toka panmantala et ireka messhaaw wa pasiya.
12 Nem idi emati ira sota i‐Samaria nonta toro nen Felipe maypangkep ni pantoshayan nen Apo Shiyos, tan maypangkep son Jesucristo, nanpabonjag ira sota daleki tan sota ira bibii.
13 Jet angken si Simon ja emanmantala, emati ngo nonta toro nen Felipe, jet nanpabonjag ngo. Jet eki‐od‐odop ni olay so nen Felipe. Jet idi inon‐an toy kaskasshaaw wa kedagdag‐a nen Felipe, nasshaaw et ngo mowan na pasiya.
14 Jet sota ira apostol ja ẃared Jerusalem, idi inamta‐an sha ey ineẃat ni i‐Samaria i esel nen Apo Shiyos maypangkep so nen Jesucristo, inbetkag sha si Pedro nen Juan shi Samaria.
15 Jet idi mimotok ira, inshawat sha son Apo Shiyos ey sota emati shi Samaria ket eẃaten sha koma ngo i Ispirito Santo nen Apo Shiyos.
16 Ta nontan, enshi pay nin i Ispirito Santo ja nan‐iyan so ni angken sakey son si‐kara; ebonjagan bengat ira ja si‐katoy ka‐asan to ey too ma ira nen Apo Jesucristo.
17 Idi naksheng nga nanshawat si Pedro nen Juan, insakpal shay takday sha so nonta ira emati ja i‐Samaria, jet ineẃat sha ngo sota Ispirito Santo nen Apo Shiyos ja nan‐iyan son si‐kara.
18 Jet si Simon ja istay manmantala, idi inon‐an ton ineẃat ira nonta emati ja i‐Samaria i Ispirito Santo nen Apo Shiyos nonta insakpal nen Pedro nen Juan i takday sha son si‐kara, toka pan‐i‐akni ira ja apostol ni pilak,
19 ja kowan to ey i‐aknan sha ngo ni inges nonta panakabalin nen Apo Shiyos ja ẃara son si‐kara, say no isakpal toy takday to ngo so ni angken sipa, eẃaten shay Ispirito Santo.
20 Nem si Pedro simongbat ja kowan to ey, “Say torong mo, impiyarno, jet angken ita‐jon mo ngo ta pilak mo! Ta intopom ita nemnem mo, ja kowan mo ey metongkal ni pilak sota panakabalin nen Apo Shiyos.
21 Enshiy mo kaybiyangan, ono bingay mo, shi pamati mi, ta sota ẃared nemnem mo, aliẃen sota piyan nen Apo Shiyos.
22 Panbebawi ka nita kakedsel mo, panshawat ka et son Apo Shiyos; balang nem pekawanan toka nita ngaaw wa pangkep mo.
23 Ta naka eẃati ey tinngel toka pay laeng ni basol, jet no eg ka manbebawi, da‐kaman mo aliy digat ta empait.”
24 Jet inkowan nen Simon so nen Pedro ey, “Pangaasim, ireẃat mo son Apo Shiyos ey sota inkowan mo, enshi komay angken sakey ya mepesamak ali son si‐kak!”
25 Jet idi naksheng nga inkowan shay maypangkep so nen Jesucristo shiyay ya dogad, nay‐oli mowan shi Pedro nen Juan shi Jerusalem. Jet sota mapteng nga shamag maypangkep so nen Jesucristo, intoro sha ngo shi emin na nanshandan shen dogad shi Samaria.
Emati sota sakey ya opisiyal alid Itiopia
26 Nem si Felipe, intorong ni anghil ey pepsawen to sota kalsaren edapod Jerusalem ja menedong shi Gasa. Sajay ya kalsara, kamag‐an i binedasat to, enshiy balbaley.
27 Jet siya, inonod ton pimesaw, jet ẃaray simbi ton too nodtan na kalsara ja i‐Itiopia. Sajay ya too, epateg ja opisiyal nonta bii ja ari ni Itiopia, ja kowan sha ey Kandis, ta sajay ya too, toka pan‐imanshal sota kokowa nonta apo ton si Kandis. Edapo ali jay ya opisiyal shi Jerusalem. Shiman i to nanshayawan son Apo Shiyos,
28 jet on‐oli ma shi ili ton Itiopia, ja nandogan shi kalisa. Naytompong nontan ja emanbasa nodta naysolatan ni padto nen Isaias.
29 Jet si Felipe, inshalan ni Ispirito Santo nen Apo Shiyos ja en mekilokan son si‐kato nodta kalisa.
30 Isonga si Felipe, kinano‐an ton en nay‐askang nodta kalisa, jet intenengan ton panbasa‐a nonta opisiyal sota padto nen Isaias. Si Felipe, inbag‐an to nem toka eẃati sota toka panbasa‐a.
31 Jet sota opisiyal, kowan to ey, “Enshi, ekak eẃatan. Mesepol la ẃaray mengi‐odog son si‐kak ni olog to.” Jet ineẃis tos Felipe ja mekilokan nodta kalisa to.
32 Say toka panbasa‐a nontan, sajay:
“Si‐kato, may‐eshig ey inges to sota kalniro ja shinonshon shen padti‐en sha ja eg onpokeng; inges to pay sota kalniron toka i‐onod i bakdang ton pokisan sha ja eg onkenga. Apay simongbat? Enshi, angken pinsak.
33 Inbaba shay kasesaad ton pasiya ja eg sha in‐aknan ni ẃaya ton onsongbat ni inbistigal sha so. Sipay makabaal la menonton ni ap‐apo to ali? Kenshat ta enshi ma, tep say biyag to, enshi med ja dobong.”
Kowan nonta solat.
34 Jet sota opisiyal, kowan to so nen Felipe ey, “Ikowan mo ga son si‐kak no sipay kaytoshongan niya kowan ni padto — si‐kato met laeng nga para padto, ono ẃaray eshom?”
35 Jet si Felipe, in‐olog to iya padto nen Isaias, ey si Jesus i kaytoshongan to, tan intoro to pay son si‐kato i mapteng nga shamag maypangkep so nen Jesus.
36 Jet idi maramen ireka manshedong nodta kalsara, simbira sota dogad ja ẃaray shanom, jet kowan nonta opisiyal ey, “Iyay i shanom shiyay. Mebedin ngaten mebonjaganak niman shiyay?”
37 Jet si Felipe, kowan to ey, “No podnon emati ka son Jesucristo, mebedin.”
Jet sota opisiyal, kowan to son Felipe ey, “Emati‐ak so nen Jesucristo ey si‐katoy podnon Anak nen Apo Shiyos.”
38 Jet sota opisiyal, inkowan to ey pesalsheng nonta kadẃa to sota kalisa ja nandoganan sha, jet dimaw iren showa nodta shanom, jet binonjagan nen Felipe sota opisiyal.
39 Idi kima‐jat ira nodta shanom, indaw ni Ispirito Santo nen Apo Shiyos si Felipe shi araẃin dogad, jet sota opisiyal, mino‐di tos Felipe ja na‐enshi. Intoloy to ngo ja on‐akad, ja ebadeg i imdeng to.
40 Nem si Felipe, ẃared ma dogad ja kowan sha ey Asoto. Jet emin na nanshandan nen Felipe ja dogad ingkatod inmotok to shi Sisaria, intoro toy maypangkep so nen Jesucristo.