1 Iyay pay i ikowan ko son si‐kayo ja maypangkep nonta bilin ja nay‐awat so ni Hodiyos nonta bayag da. Iyay i kay‐eshigan to. Sota nga‐nga ja ẃaray tawid to nem kolang i tawen to pay laeng, singa enshiy to nandasinan nodta baga‐en, angken pay no si‐katoy makakokowa ali nonta tawid. 2 Enshiy to nandasinan, ta ẃara pay laeng i emengajowan son si‐kato. Nem no onsabi sota timpo ja inkowan nen ameto ey i‐elbat to so nontan na tawid, eẃaya ma. 3 Sajay i kay‐eshigan to son si‐katejo. Nonta aneng alis Cristo, singa a‐anak kiton emin. Say enanngel son si‐katejo, sota ira ogadi ja kaitoro met laeng ni kait tayon too. 4 Nem idi simabi ma sota koston timpo, inbetkag nen Apo Shiyos ali sota Anak to. Jet sajay ya Anak to, in‐anak ni bii jet sinekopan nonta bilin ni Hodiyos manipod nonta inkay‐anak to. 5 Jet say kabol la nay‐anakan to ali, say to ibolos sota ira may‐eshig ey inpokok nontan na bilin, say koston maybidang kito ma ey annak nen Apo Shiyos.

6 Niman ma, annak shakejo nen Apo Shiyos; isonga inbetkag to sota Ispirito Santo ni Anak to ja man‐iyan shi poso tayo. Jet sajay i amta‐an tayo so ey Ametayo ma si Apo Shiyos. 7 Jet isonga niman ma, aliẃen baga‐en i sakey tan sakey son si‐kayo, no diket annak shakejo nen Apo Shiyos, jet sota ira annak to, mekiteẃid iren mayda‐kam son Cristo.

8 Nontan da, eg jo amta si Apo Shiyos, isonga say istay joka panshedjawi, saja ira kompormin sinan shiyos. 9 Nem niman ma, ta amtayo si Apo Shiyos, tan si Apo Shiyos ngo, tokejoka ibilang ma ey annak tokejo, apay nga on‐oli kayo mowan nodta ogadin enshiy silbi to ja kaitoro met laeng ni kait ta too? Apay, piyan jo ayen manbedin mowan na singa baga‐en? 10 In‐eshom jo et sota ogadi ni Hodiyos shita mapteng nga pamatiyo son Cristo! Angken sota ira akew, bolan, tawen, tan sota ira piyastara, joka mala ngidina. 11 Naka manshanag, ta baka sota inpandigat kon engi‐obda ni pansigshan jo ket, enshiy to panpa‐no‐an.

12 A‐akik, iyay i kekshawen ko son si‐kayo. Si‐kak koma i onoran jo, ja eg manshinel nodta bilin ni Hodiyos. Ta singa inonoran takejo ngon aliẃen Hodiyos nonta emati‐ak son Cristo, ta ekak mala patkan sota bilin nonta bayag da. Mapteng met i inpasing jo son si‐kak nontan, 13 angken nonta pilmiro. Amtayo met no ngantoy engitosho‐an ko son si‐kayo ni mapteng nga shamag, ta ẃaray sakit ni bakdang ko. 14 Nem angken ekapoy i bakdang ko nontan, inenosan jowak, eg jowak binedaw, ono dinamsis. Sajay i sakey ya kepeshasan jo no eẃaten jowak, nem ineẃat jowak ja ẃaray pateg ko son si‐kayo; inbilang jowak pay ja singa anghil nen Apo Shiyos, ono si Cristo Jesus ja mismo. 15 Jet towa da niman sota imdeng jo son si‐kak nontan? Amtak ey nontan, no mebedin koma, singa okiten joy matejo pay jet i‐akan jo son si‐kak. 16 Nem niman ma, ngaaw jowak ta diritso i inpasing kon nan‐esel son si‐kayo.

17 Sota ira emenogsog son si‐kayo, mapteng ni olay i shaka ikokowan son si‐kayo, nem apil i pangkep sha. Piyan shen isi‐jan shakejo son si‐kami, say si‐karay songoren jo. 18 Mapteng met kitdi, no ẃaray makapiyan son si‐kayon pasiya, nem mesepol la mapteng ni olay sota pangkep sha; tan mesepol la kanayon, aliẃen sota kawashak son si‐kayo bengat. 19 Ara! Singa mesepol mowan na mandikatak ja mengi‐odi son si‐kayo nodta sigod ja pinatiyo. Piyan kon pasiya ja si Cristoy mengitoshay son si‐kayo. Si‐kayon naka ikarin annak ko shi pamati, 20 no mebedin koma, angken niman, piyan kon asen takejo, say mekitbalak son si‐kayon mismo, balang nem ma‐amta‐an ja kosto iya eg tayo pan‐i‐inawatan.

21 Niman, iyay i ikowan ko son si‐kayon makapiyan ja sekopan ni bilin ni Hodiyos. Apay eg jo aya eẃatan sota kowan nontan na bilin? 22 Wara met i naysolat ja nay‐arigan ni panpidi‐an tayon pemati. Sajay sota maypangkep nonta showen inpotot nen Abraham. Sota sakey, inpotot tod biin baga‐en, jet sota sakey, inpotot tod biin aliẃen baga‐en. 23 Jet sota in‐anak nonta biin baga‐en, aliẃen sotan i inkari nen Apo Shiyos son Abraham ja ipotot to. Nem sota inkarin Apo Shiyos son si‐kato ja ipotot to, si‐kato sota in‐anak nonta biin aliẃen baga‐en. 24-25 Sajay ya edaga nontan da, si‐katoy i‐arigan ko so niya inkowan ko la. Sota showen bii, si‐kato ngoy kaytoshongan nonta showen inpasing nen Apo Shiyos. Sota sakey, si‐katoy bilin nonta bayag da ja nay‐awat shi shontog shi Arabia ja kowan sha ey Sinai. Sajay i may‐eshig so nen Hagar, ja baga‐en na inpa‐anak nen Abraham. Sota anak to, baga‐en met laeng, jet sajay i kay‐ingesan ira ni tood Jerusalem niman ja intorayan ni bilin nonta bayag da. Ta singa baga‐en ira. 26 Nem si‐katejo, aliẃen baga‐en kito, ta sota inetayo aliẃen baga‐en; sotan, may‐eshig ey sota Jerusalem ja edapod dangit. 27 Ta say kowan nonta esel nen Apo Shiyos ja naysolat, kowan to ey, “Pan‐imdeng ka, si‐kam ma biin eg to pineshas ja on‐anak. Ikedsang moy keljaw mo ni imdeng mo, ta angken eg mo dina‐kaman i digat ni pan‐enak, si‐kam et ngo mowan i singa eshakel i annak to, nem say sota ẃaray aseẃa to.”

28 Jet niman, a‐akik, inges tayos Isaac ja anak nen Abraham tep si‐katoy tongpal nonta kari nen Apo Shiyos son Abraham. 29 Jet sakey pay ya nay‐ingesan tayo son Isaac nontan da, kitoka mepedigat ja inges tos Isaac. Ta si Isaac nontan da, sota Ispirito Santo nen Apo Shiyos i kabol ni nay‐anakan to, nem pinedigat nonta agi ton nay‐anak ka kenshat, ja eg inkari nen Apo Shiyos. Jet ingkato niman, sotan ni olay. 30 Nem say kowan nonta esel nen Apo Shiyos nonta bayag da son Abraham, kowan to ey, “Pabtik mo sota biin baga‐en, pati sota anak to, ta sota anak to, eg mebedin na mekibingay nonta tawid nonta anak ni biin aliẃen baga‐en.” Kowan to. 31 Isonga si‐kayon a‐akik, iyay koma i nemnemnemen jo. Sota may‐eshig ey maka‐anak son si‐katejo, aliẃen biin baga‐en.