17
Si Jesus, inshawatan to sota ira too to so nen Apo Shiyos
1 Idi naksheng nga inkowan nen Jesus iyay, timangkak shi dangit ja kowan to ey, “Ama, simabi ma sota timpo ja si‐kam met laeng i mengi‐kan ni kayshedjawan ko, say si‐kak ngoy mengi‐kan ni kayshedjawan mo.
2 Ta si‐kam Ama i engi‐kan son si‐kak ni panakabalin na mengitoshay so ni emin na too, jet si‐kak i mengi‐kan ni biyag ja enshiy to engintegan so nonta totoon piyan mon meẃad‐an ni biyag.
3 Jet no meẃad‐an ma ira ni biyag ja enshiy to engintegan, si‐kato may amta‐an sha son si‐kam, ey si‐kam i podnon Shiyos ja enshiy eshom, tan si‐kato ngoy amta‐an sha son si‐kak, ey si‐kak si Jesucristo ja inbetkag mo alid ja dobong.
4 Sota obda ja inkowan mo son si‐kak ey dag‐en ko shiya dobong, kinsheng ko jet si‐katoy nayshayawan mo.
5 Jet niman Ama, si‐kam i mengi‐odi nonta sigod ja shayaw ko ngo eshan nonta ẃara‐ak shi kad‐an mo, nonta eg pay laeng epalsowa iya dobong.
6 “Sota toom ja ẃared ja dobong ja in‐awat mo son si‐kak, inpa‐amtak son si‐kara sota maypangkep son si‐kam, jet pinatiray esel mo.
7 Jet niman amtara ma ey emin na ẃara son si‐kak ket si‐kam i edapo‐an to, ja in‐akan mo son si‐kak.
8 Ta inkowan ko son si‐kara sota inkowan mo son si‐kak jet ineẃat sha, jet amtara ma ey podno ja si‐kam i edapo‐an ko, tan si‐kam i engibetkag ali son si‐kak shiya dobong.
9 “Ama, aliẃen sota eg emati i naka pan‐ishawati, no diket saja toon kokowam ja in‐awat mo son si‐kak ja emati son si‐kak.
10 Emin sota took, si‐kam ngoy makakokowa, jet angken sota ira toom, si‐kak ngoy makakokowa, jet si‐karay kayshedjawan ko.
11 Niman, idekjas ko iya dobong, jet on‐oli‐ak da son si‐kam. Nem saja ira took ja in‐awat mo son si‐kak, mebay‐an nin ira shiya dobong, jet si‐kam Ama, i maka‐amta ja mengajowan son si‐kara. Si‐kam i napno‐an ni emin na kinamapteng; isonga i‐osal moy panakabalin mo, say manseksekey ira ja inges toy inpansaksakey ta.
12 Nonta ẃara‐ak son si‐kara, inajowanan ko ira iya in‐awat mo son si‐kak, jet inosal koy panakabalin mo. Ekak ira in‐oway, jet enshiy en epokaw son si‐kara, malaksig bengat sota sakey ya si Judas. Sajay ya too, kenshat ta epokaw, ta mesepol la metongpal sota naysolat ja esel mo nonta bayag da.
13 “Jet niman, shanshani mala sota i‐olik son si‐kam, nem ikowan ko iyay son si‐kara ta ẃara‐ak nin shiya dobong, say mepno ngo ira nonta imdeng ja ẃara son si‐kak.
14 Sota inkowan mo son si‐kak, inkowan ko ngo son si‐kara, jet sajay iren too, emati ira son si‐kak. Jet sota tood ja dobong ja eg emati, kontra sha ira ja took, ta eg nay‐inges i ogadira so nodta ira eg emati.
15 Say shawat ko para son si‐kara, aliẃen naka pan‐ishawat ey a‐kalen mo ired ja dobong, no diket ajowanim ira koma, say eg sheshalen ira nen Satanas.
16 Si‐kak, aliẃen inges ko iya tood ja dobong ja eg emati, jet saja took, inges sha‐ak ja aliẃen tood ja dobong.
17 Sota esel mo, si‐katoy podno, jet si‐katoy osalen mon mengilesin son si‐kara para son si‐kam bengat.
18 Si‐kam i engibetkag son si‐kak shiya dobong, jet inges to ngon ibetkag ko ira shiya emin na sakop niya dobong.
19 Jet saja bakdang ko, itolok kon metey pangkep son si‐kara, say agpayson maydesin ira para son si‐kam.
20 “Aliẃen saja ira took bengat i naka pan‐ishawati son si‐kam, no diket angken pay sota ira toon memati ali son si‐kak, ja pengikowanan ira niya took ni esel mo.
21 Tan say shawat ko pay son si‐kam Ama, manseksekey koma iren emin, ja inges toy kawashak son si‐kam, tan kawasham ngo son si‐kak, say maykasakey ira son si‐kata, say pati‐en ira nonta tood ja dobong ey agpayson si‐kam i engibetkag ali son si‐kak shiyay.
22 Sota shayaw ja in‐akan mo son si‐kak, inges to met laeng i in‐akan ko son si‐kara, say manseksekey ira ja inges toy inpansaksakey ta.
23 Wara‐ak ja ontolong son si‐kara, tan ẃara ka ja ontolong son si‐kak, say enshiy pankodangan ni panseksekey sha, tan say pati‐en ira niya tood ja dobong ey si‐kam i engibetkag son si‐kak ali et pati‐en sha pay ey ensemek mo ira ja inges toy semek mo son si‐kak.
24 Ama, si‐kam i engi‐ẃat ira niyay ya too son si‐kak, jet say piyan ko, ondaw ngo ira shi dangit ja daẃan ko, say asen sha sota shayaw ja in‐akan mo son si‐kak, nonta pilmiro ja eg pay laeng epalsowa iya dobong. Sajay i inpasing mo nontan da ta ensemek mowak ngoreshan.
25 Si‐kam ja Amak, amtak ey enshiy moka pankodangi. Saja tood ja dobong, eg shaka amta; nem si‐kak, amta taka. Jet sajay iren took, amtara ey si‐kam i engibetkag ali son si‐kak.
26 Inpa‐amtak son si‐kara sota maypangkep son si‐kam, jet itoloy kon ipa‐amta iyay son si‐kara, say mayda‐kam ngo ira nodta semek mo ja ẃara son si‐kak, say si‐kak, ẃara‐ak ngo son si‐kara, ja ontolong.” Sajay i shawat nen Jesus so nen Ameto.