20
Nan‐ongal si Jesus
1 Nonta daem ni Domingko, si Maria Magdalena, dimaw shima naydiyangan ni bakdang nen Jesus. Idi mimotok nodtan, inon‐an ton imadaw sota baton naypokit nodta bongot ni diyang ja naydiyangan nen Jesus, isonga edo‐katan sota diyang.
2 Jet si Maria Magdalena, nanbetik ja to inkowan so nonta sakey ya apostol ja ensemek ka pasiya nen Jesus, tan to inkowan so nen Simon Pedro ey, “Indara da sota bakdang nen Apo Jesus shima naydiyangan to! Eg mi amta no toway indawan sha so.”
3-4 Jet nanbetik da ira ja timorong nodta diyang, nem epangdon mimotok nodta diyang sota sakey ya apostol,
5 jet niningil to sota diyang, jet say inon‐an to, sota dopot ja empoti bengat, nem eg simekep nodta diyang.
6 Idi mimotok ngo si Pedro, diritson simekep nodta diyang, jet inon‐an to ngo sota empotin dopot ja naypokay.
7 Sota dopot ja istay naydibot shi toktok nen Jesus, inon‐an ton ekopikop ja eg nay‐eshom nodta empotin dopot.
8 Jet sota sakey ya apostol ja epangdon mimotok, tinned tos Pedro ja simekep ngo jet inon‐an ton enshi nga agpayso sota bakdang nen Jesus. Jet emati ma ey si Jesus ket, nanbiyag mowan nga agpayso.
9 Ta nontan, eg nin ineẃatan nonta ira apostol la pasiya sota naysolat ja padto nonta bayag da ey manbiyag ngoreshan si Jesus shi patey.
10 Jet idi naksheng nga inon‐an sha iyay, imakad ired baley sha.
Nanpa‐sas si Jesus so nen Maria Magdalena
11 Nem si Maria Magdalena, ebay‐an nodtan ja kaonnangnangis, jet nonta maramen emannengis, niningil to sota diyang.
12 Jet ẃaray inon‐an to ja showen anghil ja nanbaro ni empoti ja timongaw nodta istay naysepa‐an ni bakdang nen Jesus: sota sakey ya anghil, timongaw nodta istay petek ni toktok nen Jesus, jet sota sakey ngo, timongaw nodta istay petek ni sedi to.
13 Jet sajay iren anghil, imesel ira ja kowan sha son Maria Magdalena ey, “Ngantoy moka pannengisi?”
Jet si Maria Magdalena, simongbat ja kowan to ey, “Naka mannengis ta indara da sota bakdang nen Apok ja naydiyang shiyay, jet ekak da amta no toway indawan sha so.”
14 Idi naksheng nga inkowan nen Maria Magdalena iyay, ẃimingi jet ẃaray inon‐an ton too ja nay‐askang son si‐kato ja dimayat, nem eg to inimatonan ey si Jesus sotan na imaskang son si‐kato.
15 Jet si Jesus, imesel ja kowan to son Maria Magdalena ey, “Ngantoy moka pannengisi? Sipay moka pan‐enapa?”
Si Maria Magdalena, say ẃared nemnem to, kowan to ey sota dakin emengajowan nonta mola nodtan sota dakin imaskang son si‐kato. Isonga kowan to ey, “Apo, no si‐kam i engala nonta bakdang nen Jesus, ikowan mo no toway indawan mo la so, say nak al‐en.”
16 Jet si Jesus, inngadnan toy ngaran nen Maria, jet si Maria, timangkak ta inimatonan toy esel, ey si Jesus sotan, jet kowan to ma ey, “Raboni.” (Say olog ni Raboni shi esel ni Hodiyos, Maistoro.)
17 Nem si Jesus kowan to ey, “Karamak egni‐an, ta ekak pay laeng dimaw ja nay‐oli so nen Amak shi dangit. Daw ka, mo ikowan so nonta ira a‐akik ey ondawak ma ja on‐oli so nen Amak ja Shiyos ko, ja si‐katoy Shiyos jo tan Amejo ngo.”
18 Jet si Maria Magdalena, dimaw ja to inkowan so nonta ira too nen Jesus ey inon‐an tos Apo Jesus, jet insodsod to pay sota inkowan nen Jesus son si‐kato.
Nanpa‐sas si Jesus so nonta ira too to
19 Jet nontan na mama‐shem ni Domingko, sota ira too nen Jesus, na‐olnong ira, jet nanbagat ira tep entakot ira so nonta ira pangolo ni Hodiyos. Jet nontan na inka‐olnong sha, ebigla ja dimaw alis Jesus jet dimayat shi sango‐an sha; jet kowan to son si‐kara ey, “Sapay koma ta sota talna ket si‐katoy meẃesha son si‐kayo.”
20 Idi naksheng nga inkowan nen Jesus iyay, inpa‐sas to sota takday to son si‐kara ja kawad‐an ni sogat nonta indansara so shi koros, tan sota tagdang ton natbek. Jet nontan ma, ireka man‐imdeng nga pasiya tep inon‐an shen mismo si Apo Jesus.
21 Jet si Jesus, inpinshowa to mowan ja kowan to ey, “Sapay koma ta sota talna ket, si‐katoy meẃesha son si‐kayo.” Tan kowan to pay ey, “Ibetkag takejo, ja inges toy inpangibetkag nen Amak son si‐kak.”
22 Sajay i inkowan nen Jesus, asan toka ira si‐boka, ja kowan to ey, “Awat joy Ispirito Santo.
23 Jet manshoki ma niman, no pekawanan joy basol ni too, si Apo Shiyos, pekawanan to ngo sotan na too. Nem no eg jo pekawanan, si‐kato ngoy pesing nen Apo Shiyos son si‐kato.”
Sota eg nin inpamati nen Tomas ey nan‐ongal si Jesus
24 Sota sakey so nonta ira apostol nen Jesus, ja si Tomas i ngaran to, naytompong nga enshi nonta indaw nen Jesus nodta na‐olnongan shen too to ni mama‐shem ni Domingko. (Si Tomas, ẃaray ngaran ton sakey, ja kowan sha ey Epin.)
25 Isonga sota kait ton apostol, inkowan sha so nen Tomas ey, “Inon‐an mi si Apo Jesus!”
Nem si Tomas, kowan to ey, “Ampet ta asen ko nin sota shindan ni dansa shi takday to, asan isho‐dog ko pay i kalomot ko, tan isho‐dog ko pay i takday ko nodta tagdang ton natbek, asan naka mamati.”
26 Idi edabas day makadomingko, na‐olnong mowan sota ira too nen Jesus, ja nanbagat, jet ẃara ma nodtan si Tomas. Jet si Jesus, ebigla ja nanpa‐sas mowan son si‐kara. Dimayat shi sango‐an sha, ja kowan to ey, “Sapay koma ta sota talna ket si‐katoy meẃesha son si‐kayo.”
27 Jet kowan to ma so nen Tomas ey, “Asas mo iya takday kon imbot ni dansa, jet iga‐ẃat mo diy kalomot mo. Tan iga‐ẃim pay ali ita takday mo jet iro‐dog mod ja tagdang kon esogat. Kareka manshowashowa, no diket pamati ka et.”
28 Si Tomas, simongbat ja kowan to ey, “Si‐kam i Apok tan Shiyos ko!”
29 Simongbat si Jesus, ja kowan to ey, “Kaka ma memati ta inon‐an mowak? Sota toon eg engasas son si‐kak, ey ireka pay laeng ememati, mas pay ya si Apo Shiyos i onbindisiyon son si‐kara.”
Sota kabol la naysolatan niyay shi dibsho
30 No sota maypangkep ni dingka nen Jesus, eshakel i dingka ton kaskasshaaw wa mismon inon‐an nonta ira too to, nem ekak insolat ta emin shiyay ya dibsho.
31 Nem saja insolat kod jay ya dibsho, insolat ko say memati kayo ey si Jesus ket si‐kato sota naypadton mengisedakan ja ibetkag ali nen Apo Shiyos, tan say memati kayo ey si‐kato sota Anak nen Apo Shiyos. Jet say sakey pay ja insolatan ko so niyay, say no memati kayo, meẃad‐an kayo ni biyag ja enshiy to engintegan.