21
Edadsak i totoo nonta mimotok si Jesus shi Jerusalem
1 Nonta nay‐esop ma shi Jesus shi Jerusalem ja ẃara ira shima dogad ja kowan sha ey Bitpag ja osshong ni shontog ja kowan sha ey Olibas, engibetkag ni showen too to,
2 jet inbilin to son si‐kara ey, “Daw kayod ma dogad ja naysongbob et nodtan na dogad, ẃaren shagos i asen jon naypagod ja animal la donkey et ẃara ngoy kilaw to. Okasiyo et alejo did jay sotan iren animal.
3 No ẃaray mengibeka son si‐kayo no ngantoy joka pan‐okasi so, ikowan jo ey, ‘Si Apo Jesus, mesepol to jet i‐oli to met laeng alin shagos.’ Satan day ikowan jo son si‐kara.”
4 Sajay ya inkowan nen Jesus, medeka say metongpal sota naypadto nonta bayag da, ja kowan to ey,
5 “Ikowan mo so nonta ira tood Jerusalem ey eg ira koma ontakot tep sota ari sha, ondaw alin mengi‐kan ni talna. Isonga nankabajo ali shi kilaw ni donkey ja para obda.”
6 Jet sota ira too nen Jesus ja inbetkag to, dingkara sota inkowan to son si‐kara.
7 Jet sota ta‐kep ni baro sha, in‐ap‐ap sha nodta beneg ni donkey et nankabajo si Jesus.
8 Sota ira ngo eshom ma totoo, in‐ap‐ap sha ngoy baro sha nodta kalsaren panshalnan nen Jesus. Sota ira eshom, ira engala ngo ni emolong nga panga ni kadasan et in‐ap‐ap sha nodta kalsara.
9 Sota ira totoo ja epangdo ey si Jesus, tan sota ira na‐onod, ireka onkaneljaw ja kowan sha ey, “Salamat son Apo Shiyos tep inbetkag to di iya mengibengon son Ari David nonta bayag da! Bindisiyonan to koma! Salamat son Apo Shiyos ja Kangeto‐an!” Kowan ira nonta totoo.
10 Idi emanmotok ma si Jesus shi Jerusalem, emin ira sota too nodta siyodad, eg sha tongolan no ngantoy emankepasemak, isonga kowan sha ey, “Apay sipa aya itan na toon emanmotok?”
11 Jet sota ira totoo ja nay‐olop son si‐kato, kowan sha ey, “Sajay sota para padto nen Apo Shiyos ja si Jesus i ngaran to. Too did Nasarit ja sakop ni Galilia!”
Shinagshag nen Jesus ira sota emandeko nodta Timplo
12 Idi mimotok ma si Jesus, simekep shi Timplo, jet emin ira sota emandeko nodtan, tan emenongkal, shinagshag to iren inpabo‐day. Jet tino‐to‐dang to pay ira sota damisaan ira nonta emena‐dat ni pilak, tan sota tongawan ira nonta emandeko ni kalopati.
13 Jet kowan to son si‐kara ey, “Say kowan ni esel nen Apo Shiyos ja naysolat nonta bayag da, kowan to ey sajay ya baley nen Apo Shiyos, nayngadnan ey si‐katoy pansheẃatan ni totoo son si‐kato, nem inpanbalin jo ni singa amotan ni tolisan!”
14 Jet sota ira epilay, tan sota ira ekorab, dimaw ira son si‐kato shima Timplo jet inpamapteng to ira.
15 Nem inon‐an ira nonta apo ni papashi ni Hodiyos tan sota ira mamaistoro ni dinteg ni Hodiyos sota kaskasshaaw wa dingka nen Jesus, tan intenengan sha sota keljaw ira nonta a‐anak ja kowan sha ey, “Salamat son Apo Shiyos! Iyay ali sota mengibengon son Ari David!” Jet sotan na papashi tan mamaistoro ni dinteg, ngaaw i deknara.
16 Jet kowan sha so nen Jesus ey, “Apay nga eg mo selkagen ira ma a‐anak? Apay eg mo aya itenengan ima kowan sha?”
Sinongbatan ira nen Jesus ja kowan to ey, “Owen, intenengan ko. Nem apay eg jo aya binasa sota esel nen Apo Shiyos ja naysolat nonta bayag da? Kowan to met ey, ‘Sota ira a‐anak tan sota ira koyat, si‐kara et ngo mowan i podno i shaka panshedjaw!’ ”
17 Nontan met laeng, indekjas to ira et dimaw ma shi Bitania, jet na‐ogip shiman.
Sota inpasing nen Jesus so nonta kadasan na eg ondames
18 Idi agsapa, eman‐ekad si Jesus say on‐oli mowan shi siyodad ni Jerusalem et naytompong nga na‐agang nontan.
19 Jet nodta toka pan‐ekari, ẃaray inon‐an ton kadasan nodta kilig ni kalsara. To inon‐an tep namnama to ey ẃaray dames to, nem enshi gayam i dames to; bolong to bengat i ẃara. Jet si Jesus kowan to ey, “Si‐kam ma kadasan, eg ka ma ondames, manipod niman ingkatod ingka!” Jet nontan met laeng, sota kadasan, nakkit ta shagos.
20 Sota ira too to, idi inon‐an sha iyay ya epasemak so nonta kadasan, nasshaaw ira jet kowan sha ey, “Nganto emoy nakkitan nima kadasan na shagos?”
21 Kowan ma nen Jesus ey, “Agpayso iya ikowan ko son si‐kayo. No ẃaray pamatiyo ja enshiy showashowa to, aliẃen sota dingkak so niya kadasan bengat i mebedin jon dag‐en, no diket mebedin na ikowan jo pay niyay ya shontog ey ma‐tan shorog ja ondaw shima baybay, jet mayto‐to‐ẃen medeka.
22 No ngantoy ibaga jo so nen Apo Shiyos, eẃaten jo, no enshiy showashowa jo nonta panakabalin ton mengi‐kan.”
Sinongbatan nen Jesus ira sota eg makakosto ni dingdingka tod Jerusalem
23 Idi mimotok ma si Jesus shi Jerusalem, nantoro shima Timplo, jet sota ira apo ni papashi tan sota ira eshom ma pangolo ni Hodiyos, dimaw ira di son si‐kato jet kowan sha son si‐kato ey, “Sipay engikowan ey dag‐en mo ira ta moka dagdag‐a shiya Jerusalem? Sipay engibetkag son si‐kam?”
24 Simongbat si Jesus ja kowan to ey, “Ibag‐an takejo ngo nin, jet no songbatan jo ni kosto iya salodsod ko, mebedin na ikowan ko son si‐kayo no sipay engibetkag ali son si‐kak ja mandeka niyay.
25 Jet sipa ngarod i engibetkag so nen Juan ja en memonjag nontan — nemnem to ngo shorog ono si Apo Shiyos?”
Nem sota ira apo ni papashi tan sota eshom ma pangolo ni Hodiyos, nantatabtabal ira ja kowan sha ey, “No ikowan tayo ey si Apo Shiyos, mesampolo kito tep ikowan to ey, ‘No kasta, apay nga eg jo ngarod pinati si Juan?’
26 Nem no isongbat tayo ey nemnem ngo nen Juan, katetakot i pesing ni karakdan son si‐katejo. Ta shaka pati‐a ey si Juan, podnon inbetkag ali nen Apo Shiyos ja para padto.”
27 Jet say songbat sha so nen Jesus, kowan sha ey, “Taẃey, eg mi amta no sipay engibetkag so nen Juan ja memonjag.”
Jet kowan ma nen Jesus ngo son si‐kara ey, “Angken ngon si‐kak, ekak ikowan son si‐kayo no sipay engibetkag son si‐kak ja mandeka niya naka dagdag‐a niman.”
28 Jet ẃara pay i inkowan nen Jesus ja arig son si‐kara, ja kowan to ey, “Nemnem jo kari iyay ya istoriya. Waray toon showay anak to; dimaw so nonta pangodowan et kowan to ey, ‘Anak ko, ka pan‐obda shima gardin tayo niman.’
29 Nem sotan na anak to, kowan to ey, ‘Ensikshalak.’ Nem idi nannemnemnem, dimaw met laeng ja en nan‐obda.
30 Dimaw mowan sota amesha so nonta maykadẃen anak to et iso met laeng i inkowan to. Jet say insongbat nontan na anak to, ‘Owen ama, ondawak.’ Nem enshi kari; eg dimaw.
31 Jet sipa so nonta ira showa i dimaga so nonta piyan nen amesha?”
Simongbat ira ey, “Sota pangodowan.”
Jet si Jesus, kowan to son si‐kara ey, “Ikowan ko son si‐kayo i podno. Sota ira para singil ni bowis ja makedsel, tan sota ira bibiin maleki, si‐karay epangdo et ngo mowan ja mayda‐kam shi pantoshayan nen Apo Shiyos nem say si‐kayo.
32 Ta dimaw alis Juan son si‐kayo ja engipa‐amta ni koston piyan nen Apo Shiyos ja dag‐en jo, nem eg jo pinati. Sota ira para singil ni bowis tan sota bibiin maleki, emati ira et ngo mowan. Nem si‐kayo, angken na inon‐an jon mismo, eg kayo nanbebawi ni basol jo, tan eg kayo pay memati.” Kowan nen Jesus.
In‐arig pay nen Jesus sota makedsel la inpangajowan ni makabo‐day
33 Wara pay i inkowan ton arig son si‐kara, ja kowan to ey, “Itnengi jo pay iyay ya arig ja ikowan ko. Waray toon nanmola ni obas shi embanaw wa gardin to; inedad to, tan engamag ni shapidan nonta obas, tan engitowen pay ni baley ya kowadja‐an. Inpa‐ajowan to so ni eshom et dimaw ma shi araẃin ili.
34 Idi simabi sota timpon pekibingay to nonta obas, engibetkag ira nonta baga‐en to ja en mengeda ali nonta bingay to so nonta ira engajowan.
35 Nem sota ira inpangajowan to so nontan na bo‐day to, sinepsepdat sha et sota sakey ya baga‐en, jet sota sakey, binonora. Jet sota maykatdo, kineskespigan sha ni bato.
36 Sota makabo‐day, engibetkag mowan ni eshakel la baga‐en to jet iso met laeng i dingka ira nonta inpangajowan to nonta bo‐day.
37 Idi nonta anongosto, inbetkag nonta makabo‐day sota anak ton mismo ja ondaw ta kowan to ey, ‘Mebedin emon ibaingan sha tep anak ko.’
38 Nem idi inon‐an ira nonta engajowan sota mismon anak nonta makabo‐day, nantatabal ira ja kowan sha ey, ‘Sajay sota anak nonta makakokowa niya gardin na tayoka pan‐obda‐i. Bono‐en tayo et say saja bo‐day ya tawid to, kokowa‐en tayo ma.’
39 Indara nga agpayso sota anak nonta makabo‐day nontan et inkoyod shen inbo‐day nodta alad et binonora.” Kowan nen Jesus ni arig to.
40 Jet nontan ma, inbag‐an nen Jesus ira ja kowan to ey, “Jet no bilang ey ondaw ali sota makakokowa nontan na bo‐day, ngantoy pesing to so nonta ira toon inpangajowan to?”
41 Jet kowan sha ni songbat sha son si‐kato ey, “Simpri angja‐en to ngo iren bono‐en sotan na makedsel. Jet ipiyal to sota bo‐day so ni eshom ma mengajowan say ẃaray bingayen to no timpo ni apit.”
42 Jet si Jesus, inbag‐an to ira, ja kowan to ey, “Jet eg jo amten mengi‐odog ngarod nonta esel nen Apo Shiyos ja naysolat nonta bayag da? Kowan to met ey, ‘Sota baton binedaw ira nonta para amag ni baley, ja kowan sha ey enshiy silbi to, si‐kato et ngo mowan gayam i epateg ga bato so ni emin. Si Apo Shiyos i makabaal niyay ya edaga jet kaskasshaaw i tayosoka pengidmang.’
43 Sajay i naysolat nonta bayag da, jet niman ma, sota pantoshayan nen Apo Shiyos ja istay ẃara son si‐kayo, ma‐kal son si‐kayo et may‐ekan so ni eshom. Jet mapteng may panbenagan to.
44 Jet angken sipen too ja maysokbab nodtan na bato, mekosot; tan no sipay tedteshan to, memisit.”
45 Idi intenengan ira nonta apo ni papashi ni Hodiyos tan Parisiyo ira jay ya arig nen Jesus, ineẃatan sha ey si‐kara i kaytoshongan nontan na arig.
46 Kowan sha ey seskelen sha si Jesus nontan, nem entakot sha ira sota totoo, tep sota ira totoo, ireka memati ey si Jesus, kowan sha ey para padton inbetkag ali nen Apo Shiyos.