23
Hay Nambal Bon Job I Elipas
1 Ot alyon bon Job di,
2 Ta'on on nganney ibagabagayu ya hiya damdama an waday lili' i Apu Dios.
Te pun'udmanay punligata' an ta'on on nunhigla tun holholtapo'.
3 Onha innila' di e' panama'an i hiya ot ta'on ya immeya' hi awadana.
4 Ta ibaga' i hiya an namin nadan lili' hitun ma'ma'at i ha"on
5 ta donglo' di pambalnah nadan ibaga'.
6 Ot innila' an adi gapu ta ongal di abalinana ya pamaagnay hongga' i ha"on.
Te innila' ot igongahana nan ibaga'.
7 Ta ibaga' an ma"id attog ha bahul'u.
Ot innila' an unnudana an ma"id ha bahul'u.
8 Mu ta'on ahan hi ipluy'uh nangappit hi tuluwan di algo onu hi nangappit hi alimuhan di algo ya innila' an adiya' pa'hamma' i hiya.
9 Ya atbohdin ta'on on ipluy'uh nangappit hi huddo'na onu hi nangappit hi muyyadna ya adi' damdama akhupan hiyahdi.
10 Mu innila' an hi Apu Dios e ya ta'on on idanay awada' ya innilana.
Ot innila' an malpah'eh tuwen pamatnanan ha"on ya mabalin an ibaganan nipaddunga' hinan namahmah an balitu'.
11 Te inunud'un namin nadan pohdonan ato' an ma"id ha imbahho'.
12 Te hanadan tuguna ya nabaloldan ha''on mu hay makan ta hiya nan inunud'un namin dadiyen tuguna.
13 Ot hi'on nganne nan ninomnomnan aton ya ma"id ha mabalin hi manangga i hiya hinan pohdonan aton.
14 Ta hiya nan ukod i hiyah nadan ninomnomnan aton i ha''on.
15 Ta hiya tayya nan nunhiglay takut'un hiya an wa'et nanginomnoma' on gumayonggonga' hi takut'u.
16 Ta gapuh nan takut'uh nan ongal di abalinanan Dios ya ma"id ha bikah'u.
17 Ot hay takuta' ya hi Apu Dios ya abuh an bokon hantun nunhiglan punligata' an paddungnay himmilong di nitaguwa'.