26
Hay Nambal Job I Bildad
1 Ya alyon bon Job di,
2 Maphodot nayya hi'on immannung an umipabikah hi kimmapuy nadan imbagabagam.
3 Ya maphod nayya ta nala'ing'an muntugun hinadan umat i ha"on an ma"id ha in'innilana.
4 On nganne udot di bimmoddang i he''a ta maphod di panpannapitmu?
5 Hanadan linnawan handidan numpun'aten a'ammod an wah dallom di baybay ya munggagayonggongdah takutda an gapuh nan ongal an abalinan Apu Dios.
6 Ya manapdapuh di panigon Apu Dios i diyen awadan di numpun'ate an ma''id ha nihandi.
7 Ya hiyay nangapyah ad abunyan ya hiyay nangiha''ad hinan lutah nan awadana an ma"id ha nangihablayana ya nangipabunana.
8 Ya abalinana bon ibi'lug nadan liting hinan bugut ta ta'on on madamot ya adi ni' mikuyag.
9 Ya abalinana bon ihawan nadan bugut hinan bulan ta adi matigo.
10 Ya hinan baybay ya paddungnay hidiy nipogpogan di mahdom ya mapatal.
11 Ya wa'et bimmungot ya miwagot an namin nadan billid an paddungnay tu"ud di ad lagud.
12 Ya mabalin bon gapuh nan ongal an abalinana ya padinongona nan dalluyun hinan baybay.
Ya gapuh la'ingna ya abalinanan patayon nan matakutan hinan baybay
13 an ulog. Te ammuna tuwaliy yahyahna ya nalmuh ad lagud an mapmaphod.
14 Datuwen ina'inatnay atigan nan ongal an abalinana.
Mu bokon datuwe ya ammunay abalinanan aton te ma"id ha taguh nanginnilah nan a'at nan ongal an abalinana.