7
1 Ot inayun Job an alyon di,
Hay nitaguwan di taguh tun luta ya naligat an umat hi punligatan nadan e mi'bo'bo'la.
2 Ya umat hinan himbut an hahaddonay ahdomana ta mun'ible.
Ya umat boh nan mi'bo'bo'la an hihimlonan dawawaon nan bino'lana.
3 Ot hituwe pibo han nitaguwa' an ma"id ha hunungna te ahodohodom tayya on hiyah tuwey holholtapo'.
4 Te wa'et bumbummaktada' ya aptuwa' hi abigatana te bumalibalina' ta ingganah mabigat.
5 Te nabigihan ya munnonona hantudan dakol an poghah adol'u.
6 Ta agagga mo tee ya mapogpog di nitaguwa' an umat hinan nihikitan an pa'an hi ma'abol an mibaninangngadan an mipa'an ta napogpog'e ya ma"id mo.
Hay Lilin Job I Apu Dios
7 Alyon Job i Apu Dios di,
Hanat adim linglingon an hay nitaguwa' ya umat hi yahyah.
Ta ma"id ha amlong'u te nagayyuh di nitaguwa'.
8 Ta manuh ad uwani te tigtiggona' mu adi madne ya adiya' mo tigon te mateya'.
9 Te hay tagu ya nate'e ya adi mo mabalin hi mibangngad.
Ta umat hinan bugut an na'umah'e ya ma"id mo.
10 Ya ma"id mo ha alyon hi umanamut hi baleda ta ta'on on hanadan nangin'innilan hiya ya lo'tat ya linglingonda.
11 Ta hiyah tuwe nan munliliya' an adi namaag ya dimminonga' te mahapul an ibaga' te nunhiglay bohol'u ya hakit di nomnom'u.
12 Ya undan umata' hinan atatakut an animal hinan baybay ta gahin ona' ipaguwalya i he"a.
13 Ta wa'et alyo' hi malo'a' ta alina ni' ya malinglingling tudan punligata'
14 ya onnot boh on kinimit'u'e on dakol di umipatakut hi ipatigom ya atbohdi nadan ipa'inopmun ha"on.
15 Ta hiya nan udu'dulnaot attog di hoklona' ta mateya' mu hanan eya' munholholtap.
16 Te adi' mo pohdon an mi'tagu te immengleya' hi nitaguwa'.
Ya udu'dulnay taynana' attog ta ukoda' te ma"id damdama tee ha hilbin di nitaguwa'.
17 Ya undan nganne ami ihyan tatagu i he"a ta pa'annomnomon da'mi.
18 Ta hahalipodpodon da'mi hi amawimawi"it on pinatna da'mih adanidani.
19 Daan mo ta taynana' ni' ta ukoda' i ha na'omtang.
20 Te undan nganne ahan nan numbahula' i he"a Apu Dios ta ha"on di pinto'muh paligatom?
Undan ahan ha"on di mangdat hi inomnomam?
21 Onha waday numbahula' ot undan adi mabalin hi pakawanona' te agagga mo tee ya mateya' ot ta'on moh on eya' hama'on ya ona' dan bo wada.