Psalm 26
26
Hay Dasal Di Ohan Nipto' Di Pangatna
Intudo' David
1 Apu Dios, hanat he"ay ukod an mangipa'innilah nadan tatagu an ma''id attog ha bahul'u.
Te aggeya' attog nunduwaduwa an nundinol i he"a.
2 Ot patnaona' Apu Dios ta tigom hi'on nganney a'at'u ya hay punnomnom'u.
3 Te hay nanongnan mipapanomnom i ha''on ya nan pamhodmun ha''on.
Ta hiya nan he''ay unudo' hi inggana.
4 Ta adiya' e midmiddum hinadan mumpunlayah ya nadan tatagun maphod di ipatpatigoda mu dee mannot an aggahda.
5 Ya adi' ahan bo pohdon an e midmiddum hinadan tatagun adi maphod di pangatda.
6 Ot ulaha' teey ta'le' ta ipatigo' an ma''id attog ha numbahula'.
Ya e da'a dayawon Apu Dios hidih nan pundayawan i he"a.
7 Ta ikankanta' di punhanaa' i he''a ya ipa'innila' nadan mapmaphod an ina'inatmu.
8 Ongal di naminhod'u an umeh nan pundayawan i he''a te hidiy ipatigan nan anabaktum.
9 Ot hitun ataya' Apu Dios ya hanat adiya' bahan pi'dusa hinadan tatagun pimmate onu nadan udum an adi maphod di pangatda
10 te impa'inghadan mangat hi adi maphod ya nalakadan mabayadan ta atonday adi maphod.
11 Mu adiya' attog athidi te maphod di pangat'u.
Ot hanat hom'ona' bahan ta ihwanga' hitun pundusaam hi tatagu.
12 Ad uwani ya malinggopa' ta hiya nan wa'et na'amung nadan tatagum Apu Dios ya he"ay idaydayaw'u.