4
Hay Nan'ugan nan i'Israel ay Apo Dios
1 Ya ha"in an hi Amos ya intuluy'un himmapit an inali' di,
“Da'yun mun'atataban binabaid Samaria ya donglonyu
ti da'yuy umat hinan mamabhug an mun'ataban bakah ad Bashan,
ya da'yu goh di mangipaligligat hinan tatagun mahmo' an nun'awotwot.
Ya mannag hinan ahawayu ta umiyalih inumonyu.
2 Ya hi Apo Dios an na'abbagbagtu an na'ahhamad ya inalinay,
Immannung an la'tot ya umat ayuh tilapia an bungwiton da'yu
ta iyuy da'yuh nan udum an babluy.
3 An hay ma'at ay da'yu ya pun'iguyud da'yu ta mun'iluhbut an mun'apa"i nan allupyu
ta iyuy da'yuh nangappit ad Harmon.”
4 Ya inalin goh Apo Dios di,
“Agayun i'Israel ta pun'udmanyuy baholyuh nan umuyyu pun'onngan hi ad Bethel ya ad Gilgal,
ya ta"on hi un ayu gun mun'onong hi ahelhehelhelong
ya iyuyyu nan miyapuluh nan bino'layuh un malauh di tuluy algaw,
5 ya e'nongyu nan nabino'bo'an an tinapay hi Onong di Punyamananyun Ha"in.
Mu waat an un hay pumpahpahiyaanyuy pohpohdonyun ipattig.
6 Ya ten alyo' ay da'yuy,
Ha"in di nangiyabulut hi batel hi an amin hinan abablubabluy ta mi'id ononyu,
mu agguy ayu damdama nuntutuyu ta mumbangngad ayun Ha"in.
7 Ya agguy'u inyabulut di udan hidin panapulan nan inhabalyu,
mu inyabulut'uy umudananah nan udum an babluy,
ya agguy'uh nan udum.
At nadanuman di udum an payaw,
mu mamagah nan udum,
at nun'atoy an amin di wah di.
8 Ya dumalat di aid di danum ya himmanagwangan nan tataguh umuyda humaguban hi inumonda,
mu adi mun'olog ti un itang di danum.
Mu ta"on un umat hinay na'at ya agguy ayu damdama nuntutuyu ta mumbangngad ayun Ha"in!
9 Ya impa'ali' goh di puma"ih inhabalyu,
at nun'alyaw ya nun'abegeh,
ya impa'ali' goh di dudun ta nun'a'anda nan bungbungaan an ayiw an fig ya nan bungan di greyp.
Mu ta"on un umat hinay na'at ya agguy ayu damdama nuntutuyu ta mumbangngad ayun Ha"in!
10 Ya impa'ali' goh din nidugah an nunligatanyu an umat hidin inat'ud Egypt
ti nun'ipapatoy'u din ungungan linala'in imbabaluyyuh din gubat
an nun'iddum an nun'ahamham din kabayuda,
at nidugah an ahi'a'agub an amin nan numpungkampuanyu.
Mu ta"on un umat hinay na'at ya agguy ayu damdama nuntutuyu ta mumbangngad ayun Ha"in!
11 Ya umat goh an inubah'uy udumnan da'yu an umat hidin inat'ud Sodom ya ad Gomorrah,
ya nan nelwang ya umatdah nan gun mundalang an ayiw an nabaliwan hi apuy.
Mu ta"on un umat hinay na'at ya agguy ayu damdama nuntutuyu ta mumbangngad ayun Ha"in!
12 At hiyanan moltao' da'yun i'Israel,
at mundadaan ayun mi'haggangan ay Ha"in an Diosyu!
13 Ha"in di Dios ya nidugah di abalina',
ya Ha"in di mun'ap'apuh an amin hitun luta!
Ti Ha"in din nunlumuh nan aduntuduntug ya dibdib,
ya ta"on un nan patal ya helong,
ya ipa'innila' nan ninomnom'un da'yun tatagu.”