7
Nan Paddungnay Nipa'enap an Dudun
1 Waday impattig Apo Dios an na'abbagbagtu ay ha"in. Ya enen gutud ya na'ali tuwalin ipa'alinay do'ol ahan an dudun hi alpahan di boto' an midat di dagwan nan ali, ya wan na'uy goh an pumngol di mehnod.
2 Ya unat goh tinnig'u an onon nan dudun an amin nan nitanom hinan babluy ya inali' di, “Apo Dios an na'abbagbagtu, aliwam ni' di numbaholanmin tatagum! Ti gulat ta adim at hay atonmin tumagu ya wan nahnot ami, ya mi'id di ologmi!”
3 At nun'innomnom hi Apo Dios ya inalinay, “Adi ma'at din tinnigmu.”
Nan Paddungnay Nipa'enap an Apuy
4 Hay oha goh hi impattig nan na'abbagbagtun Dios ay ha"in ya nan pummoltana an nan pandu'anah danum hi bunol di luta an dumalat nan nidugah an lumahu ta ilagatna tun luta, at moghob.
5 Ya inali' goh di, “Na'abbagbagtun Dios, adim ni' ahan ipa'annung an aton hana! Ti mahmo' ami nongkay ti un ami nahnot, ya mi'id ologmi!”
6 At nun'innomnom goh hi Apo Dios, ya inalinay, “Ta"omman ya adi' ipa'annung.”
Nan Nipattig an Naga'dan an Lukud
7 Mu wada goh di ohan impattig Apo Dios ay ha"in. Ede ya tinnig'u Hiya an timma'dog hinan delloh di allup an inodnana han naga'dan an lukud ta tigonah un ma'andong di ammana.
8 Ya inalinan ha"in di, “Amos, ngadan di tinnigmu?”
Ya tembal'u an inali' di, “Nan naga'dan an lukud.”
Ya inalin Apo Dios goh di, “Hiyah te pangipattiga' an nan tatagu' ad Israel ya umatdah nan adi ma'andong an allup, at hiyanan adi ahan mibahhaw din ninomnom'un amoltaanda!
9 At mapa"in amin di pundayawanda,
ya nan pamilyan nan Alin hi Jeroboam ya mipapatoyda
ta mapogpog di pun'ap'apuwanda.”
Da Amos ay Amaziah
10 Ya intuluy'un hi Amos an nun'ulgud an inali' di, “Wada han padin hi Amaziah hi ad Bethel an nuntudo' ay Jeroboam an alid Israel an inalinay,
Un man waday ninomnom Amos hi atonah nappuhin he"a ya hitun babluy! Ya nan gunna alyon ya puma"ih an amin hi tataguh tun babluy!
11 Ti inalinay,
Mapatoy ayun pamilya anuh hanggap,
ya pun'alada nan tatagud Israel ta iyuydah udum an babluy an ayda balud.”
12 Ya la'tot ya inalin Amaziah ay ha"in di, “Onaynah un'a mumbangngad ad Judah ta hidiy pangibaagam hinan impa'innilan Apo Dios ay he"a ta hidiy pi'bo'laam, at immannung an abuluton da'ah di!
13 At bo'on hitud Bethel an pundayawan nan alih bulul di gunmu pangibaagan ay dane!”
14 At inali' di, “Bo'ona' propeta an mun'ulgud ta bayadana' ti unna' hay mumpahpahtul ya muntanom hi bungbungaan an fig ya anggay.
15 Mu impadinonga' ay Apo Dios ay danen tamu' ta hennaga' an umalin mangipa'innilan da'yun i'ibba' an i'Israel hinan inalina.
16 Ya alyom udot ay ha"in di adi' ipa'innila nan nun'appuhin ina'inatyun i'Israel.
17 Mu hay maphod ya donglom heten inalin Apo Dios ay he"a, Amaziah, ti inalinay,
Nan ahawam ya mumbalin hi putah nan babluy,
ya mun'atoyda nan imbabaluymuh nan gubat!
Ya he"a ay goh ya matoy'a damdamah nan babluy di udum an tatagu,
at hanan lutam ya punggogodwon di udum an tatagu!
Ya an amin ayud Israel ya miyuy ayuh udum an babluy!”