5
Hay Pange'gonan ay Apo Dios
1 Emayaan tu'uh un tu'u humigup hinan Timplun Apo Dios, ya ihamad tu'un mundongol hinan mitudtudu ti hiyah ne ma"ap'aphod hi aton ya un nan e'nong nan manangpah an adi pa"immatun hinan aat di maphod ya nan nappuhi.
2 Ya nomnomon tu'uh mahhun nan hapiton tu'u ta adi un nonong ya imbaga tu'uy itulag tu'un Apo Dios.
Ti na'abbagbagtuh Apo Dios an wad abuniyan,
ya ditu'u ay ya un tu'u taguh tun luta.
At adi tu'u logmon di hapiton tu'u.
3 Do'ol di enapon hi nun'appuhih un do'ol di nonomnomon,
ya do'lom ay di hapitom ya iyal'allanan la'tot ya hinapitmuy nappuhi.
4 Ya wada ay di itulagyun Apo Dios ya punnaudonyun aton ti hi Apo Dios ya adina pohdon di munlayah, at mahapul an ipa'annungyun amin nan itulagyun Hiya.
5 On'onaynah un mi'id tuwaliy itulag ya un nan way itulag an adi mipa'annung.
6 At emayaan tu'u ta bo'on nan hapiton tu'uy dumalat hi pumbaholan tu'u ta adi tu'u ihautan nan padih nan intulag tu'u. Ya ta adi tu'u pabungton hi Apo Dios ta adina ubahon nan na'unglan tu'u.
7 Ya ta"on un do'ol di enenap tu'u ya do'ol di inat tu'u unu hinapit tu'u ta ipattig tu'uy un tu'u nala'eng mu mid hulbin hana, at un at hi Apo Dios di e'gonan tu'u!
Hay Adi Pangidenlan hinan Inadangyan
8 Adi ayu manoh'ah unyu tigon an aboholan nan gubilnu nan nun'awotwot, ya ibahhawday panumalyadan dida. Ti nan u'upihyal ya baliwan nan a'ap'apuda, ya nan a'ap'apuda ya baliwan goh nan nun'abagtun a'ap'apu.
9 Mu an amin di tatagu ya mabalin an alanda nan bungan di inhabalda an ta"on un hanan a'ali.
10 Nan ma"amnaw hi pihhu ya un adi damdama mapogpog,
ya nan umi'ikay an umadangyan ya adi goh duminong hinan alanan pihhu.
At an amin hana ya mi'id di hulbina!
11 Ya gun'a ay umadangyan ya gun dumo'ol goh di mi'haggap.
Mu mid lagbum ti un hay ninomnomnommu ya nan inadangyanmu!
12 Ya nan tagun nawotwot ya maphod di pangello'na,
mu nan adangyan ya tumu'al an numomnonomnom hinan do'ol an inadangyana.
13 Ya wada goh di nappuhin ma'ma'at hitun lutan tinnig'u:
Nan adadangyan ya unda itatalepon nan pihhuda
ta way usalondah udum hi algaw hi un way ligatda.
14 At hanan inadangyan ya ma'ubah an dumalat nan nappuhin ikumilduana,
at mi'id ah ma'angang hi ipabanohnah nan imbabaluyna.
15 An amin di tatagu ya nangiw'iwadyadah din nitungawanda,
at mangiw'iwadyada goh hi unda matoy an umat hidin nitungawanda,
at mi'id ahan ita'indah nan intamutamuda an ta"on ah itang ahan!
16 At immannung an nappuhiy aat di nitaguan ti mitungaw di tagu,
mu mahapul an taynana goh tun luta!
At hay lagbuna mah hinan timmamutamuana
ti un ay nan tuyup di pudpuduggona?
17 Ya henen nitaguan ya waday numanomnom,
ya do'ol di punlungdayaan,
ya waday dogoh ya pumbobohholan.
18 At hay ninomnom'u ya maphod hi un ditu'un tatagu ya un tu'uat mangamangan ya imminu'inum ta tamtaman tu'uy nanablayan tu'uh tun itang an nitaguan tu'uh tun luta ti hiyah ne indat Apo Dios.
19 Ya gulat ta idatan ditu'un Apo Dios hi inadangyan tu'u ya gina'u tu'u at mundenol tu'u, ya mun'an'anla tu'un mangusal hinan bino'la tu'u ti hiyah ne indat Apo Dios.
20 Ya dumalat nan nangidatan Apo Dios hinan umamlongan tu'u ya adi tu'u mahkay nomnomon nan aat di ahe'he'dod nan pi'taguan tu'u!