41
Hay Pamadangan Apo Dios ad Israel
1 Inalin Apo Dios di,
“Duminong ayu ta donglonyu tun ibaga'!
Da'yun tataguh abablubabluy ya mundadaan ayun umalin mangibagah nan pohdonyu ahan an ibaga.
Ta hahapiton tu'uh nan punhumalyaan ta ma'innilah un ngadan ay ditu'uy immannung.
2 Ti undan hay nannag hinan alin nalpuh appit hi buhu'an di algaw ta umuyna gubaton nan do'ol an babluy?
Ya hay nangidat hi abalinana ta mangab'abak hinan malgom an umayana ta nun'abakna nan a'ali ya nan tatagu?
Ya nan hanggapnay numpamatoynan dida ta umatdah nan hupu',
ya nan pananay numpangiwa'at ay dida an umatdah nan dugi an mun'iyaddib.
3 Ya himbumagga ya numpudugna dida,
ya ta"on hi unna agguy impa'engha danen babluy mu agguy ahan nahugatan.
4 Mu dan hay mabalin hi mangat ay dane?
Ya hay nangipapto' hinan nahayhaynod an holag an nete"ah din hopapna?
Mi'id di udum hi un bo'on Ha"in an Ap'apun wada tuwalih din hopapnah engganah apogpogan tun luta.”
5 Ya tinnig an amin nan tataguh abablubabluy danen na'at,
at hiyanan wumogwowogwogdah ta'otda.
At hiyanan mundadaandan mi'gubat
6 an mumbabaddanganda ta pun'iyalidah nan i'ibbadan alyonday,
“Pabi'ahon tu'uy nomnom tu'u!”
7 At nan mumpa'ot ya ipahluna nan muntanag hi balitu' ya nan mummattilyuh nan niyamma
ta maphod di tigawna.
Ya ipahluna goh nan mangipata'.
Ya alyonda goh hinan mangammah ihinan den bulul an inyammada di,
“Maphod di nangatmu!”
Ya numbabaddangandan nangipata'dog eden inyammadan bulul ta ipata'da ta adi matu"in.
Ya nan mumpangiyummum hinan alimatung nan bulul ya pabi'ahonay punnomnom nan munlanha
an alyonay, “Maphod di aat di niyammaana!”
At inhamaddan inlanha nan bulul hinan ihinana ta adi matu"in.
8 Mu inalin Apo Dios di,
“Da'yun holag Israel an baal'u di pinili' hi tatagu'
ti da'yuy holag din ligwa' an hi Abraham.
9 At initnud'u da'yuh tu an inilpu' da'yuh nan nidagwin babluy hi pingit di luta.
At olom ya Ha"in di dayawonyuh itamuanyu
ti da'yu nongkay di pinili' hi baal'u an agguy'u da'yu din'ug.
10 At adi ayu tuma'ot ti wagwadaa' ay da'yu an Ha"in di Diosyu.
At pabi'aho' da'yu,
ya badanga' da'yu,
ya ibaliw'u da'yun dumalat nan nidugah an abalina'.
11 At an amin di mi'buhul an nidugah di boholdan da'yu ya diday ma'abak ta mabainanda,
ya nan mangubat ay da'yu ya mi'id di hulbida ti mun'atoyda.
12 At ta"on hi unyu umuy anaponyu nan buhulyu
ya mi'id mahkay an adiyu tigon dida.
13 At hiya nongkay nan adi ayu tuma'ot
ti Ha"in an Dios an dayawonyun holag Israel ya baliwa' da'yu.”
14 Ya inalin goh Apo Dios di,
“Ta"on hi un mid olo'ologyu an mi'id di abalinanyu ya adi ayu tuma'ot
ti Ha"in an Me'gonan an Dios an dayawonyud Israel di mamaliw ay da'yu!
15 Ti mipaddung ayuh nan balbalun pun'elekan
an ma'ataddom nan do'ol an babana.
At mabalin an punggimu'yu nan duntug an nipaddungan nan buhulyu ta mipaddungdah dugi.
16 Ya paddungna goh di puntaapanyu dida
an pun'ipatu"ugyu ta itayap di puo'.
Mu da'yu ya mun'am'amlong ayun Ha"in an Me'gonan an Dios an dayawonyun holag Israel.
17 Ya wa ay ta mi'id di danum ta maligatan ayu an paddungnay un ayu matoy hi inuwawyu
ya Ha"in an Dios ya donglo' di luwaluyu.
Ti Ha"in an Dios an dayawonyun holag Israel ya adi' da'yu inganuy.
18 At pabuhu'o' di danum hinan tulid di duntug ta umayuh an e'wadah nan giginginnaw
ta umuydah nan numpundotal,
ya pumbalino' nan mapulun hi lobong ya nan mamagan lutah obob.
19 Ya tummolda goh hinan mapulun di numbino'ob'on an ayiw
an umat hi cedar, ya akasya, ya myrtle, ya olibo,
ya bolbol, ya fir, ya cypress, ya nan udum.
At mumbalin hi inalahan nan mapulun.
20 At tigon di tatagu daten ma'ma'at,
ya ma'awatandan Ha"in an Me'gonan an Diosyun holag Israel di nunlumun amin.”
21 Ya inalin goh Apo Dios an Ali tu'un holag Israel di,
“Da'yun bulul an inyamman di tagu ya umali ayu ta punhahapitan tu'uy ililililiyu.
22 At umali ayu ta ibaagyuy ma'ma'at hi udum hi algaw
ya din na'na'at hidin hopapna ta innilaon tu'uy numbalinana.
23 At ipa'innilayuy ngadan di hohoddon tu'un ma'at hinan tatagu
ta ma'innilah un ayu madayaw.
Ya uggoh mah ta atonyuy umipata'ot unu umipanoh'a ta way tuma'tanmi?
24 Mu na'innila tuwalin mi'id ahan di hulbiyu
ya mi'id di abalinanyu.
At nan mundayaw ay da'yu ya nidugah an nun'appuhiy pumbalinanda.
25 Mu waday pinili' an malpud Media hi appit hi iggid hi un hagangon di buhu'an di algaw
ta gubatona nan ali.
Ya hiya ya malpu goh hi ad Persia hi appit hi buhu'an di algaw an mumpabadang ay Ha"in.
Ya hay atona ya paddungnay pun'igatina nan a'ap'apu
ta umat hinan aton di munduwin hi bangan pun'igatina nan uklit ta mapilut.
26 Un mah wadaday udum hi nangipa'innilan da'yu eteh din hopapna ya un ma'at?
Mi'id ti Ha"in ya anggay!
Gulat ta wadaday udum hi nangipa'innilan teh nahhun ya un mipa'annung
ya mabalin an alyonyuy, Hiya kangan!
Mu mi'id an ta"on ah oha!
27 Ha"in an Dios ya anggay di nangalih nan iZion eten maphod an ma'at hi udum hi algaw an inali' di,
Na'uy an mumpanga'anamutda nan i'ibbayu!
28 Mu hidin nummahmaha'
ya mi'id di ta"on hi ohah nambal hinan bululyu.
29 Hiyanan tigonyun na'innilan hana tuwalin bulul ya mi'id di hulbida
an umatdah dibdib an malgom di ipluyana!”