10
1 Ya intuluy Job an himmapit an inalinay,
“Ten unna' himmigan ten nitagua',
at un nonong ya nun'ibaag'uy punlilia',
ya hapito' ti ten un munha'it hi punnomnoma'.
2 At hay ilili' ay Apo Dios ya alyo' di,
Adia' abohlan,
mu ibaagmuh un way inat'uh dumalat hi iboboholmun ha"in.
3 Undan umamlong'ah unna' paligligaton,
ya numpahalmu nan limmum?
Ya unmu dan abuluton nan at'aton nan tatagun nappuhiy pangatda?
4 Undan nan matam ya umat hi matan di tagu,
ya undan nan pannigmu ya umat hi pannigmi?
5 Undan he'he'dod di pi'taguam
unu nan tawonmu ya umat hi tawon di tagu
6 ta mahapul an pa'atiggom hay way ibahhawa',
ya hinamadmu nan pumbahola'?
7 He"a ya i'innilam an mi'id di numbahola',
ya inilam goh an mi'id ah ohah way abalinanan mangibaliw ay ha"in hinan aat di abalinam an nidugah.
8 He"ay nunlumuh tun odol ya aat di tigaw'u,
at undan He"ay manimung an mangubah ay ha"in an limmum?
9 Nomnomom ni' ahan an hay pito' di inyammam ta limmuwa',
at undan goh pumbalinona' hi hupu' goh?
10 Ya unna' dan adi umat hi gatas an nihiit hi putun ina
ta nap'ola' hidin na'amma'?
11 Ya numpun'ummumom di tungal'u,
ya numpa'unudam hi ulat,
ya inudmam hi lamoh,
ya bini'lugam hi up'up.
12 Ya He"ay nangidat hi nitagua',
ya impattigmuy namhodmun ha"in,
ya innaynayunmun nanalimun ay ha"in,
at matagua'.
13 Mu hiyah ne ninonomnommu tuwalih
inila' hi pohdom hi atom ay ha"in
14 an unmu hahalepatan ta tigom unna' mumbahol,
ta way pangidalatam an adi mangaliw hi numbahola'.
15 Ya wa ay ta mumbahola' ya atata'ot di ma'at ay ha"in,
ya gulat ta nan maphod di ato' ya ay mi'id di hulbinan He"a damdama.
Ya ten ihtun mahmahmo'a'!
16 Ya wa ay ta mapmaphod di nitagua' ya bota'ona' hinan aya'
an umat'ah nan mabi'ah an layon an manganup ay ha"in
ta pangipattigam hinan ongol an abalinam nan punligata'.
17 Ya gun'a mun'anap hi nat'on an mun'ihtigun ha"in
ta ud'udmam di bumungtam ay ha"in,
ya numbino'ob'on di gunmu ipabahol ay ha"in.
18 Mu anaad mah ta inyabulutmuy nitungawa'?
Maphod hi unna' natoy hidin nitungawa' ta mi'id nannig ay ha"in!
19 Ta unna' dinawat ya innayundan nangilubu' ay ha"in
ta agguya' ni' an timmagu.
20 Undan adi magadyuh an malpah tun algaw hi pi'tagua'?
Butiwona' ni' ta mun'am'amlonga' an ta"on un na'amtang
21 ya unna' umuy eden lugal an awadan di tatagun adi mumbangbangngad
ti umuya' hinan lutan helong an mi'id di amlong.
22 Ya henen luta ya pa'ahhelong,
ya mi'id di pohod nan wah di
ti ta"on un nan patal hidi ya ay helong.”