26
Nan Himmapitan Job hi Nambalnan Bildad
1 Ya tembal goh Job an inalinay,
2 “Hay inatmu udot ta binadangam nan mi'id di abalinana?
Ya hay inatmu goh udot an nangibaliw hinan tagun mi'id di bi'ahna?
3 Ya hay umatan nan tugun an nanugunmuh nan tagun mi'id ahan di la'engna?
Ya hay umatan nan nidugah an la'eng an impattigmu?
4 Hay nangadalam hinan nahamad an nanapitmu?
Ya hay ngadan nan lennawan nangipa'innilan he"a?
5 Wumogwog nan lennawan di nun'atoy an wad dolom hinan ampan di danum,
6 ya nan lugal ad dolom an wadan di nun'atoy ya titiggon Apo Dios
ti nan a'ubahan ya agguy nahanian ay Hiya.
7 Hi Apo Dios ya enabellognad daya an mi'id di namdon,
ya tun luta ya ay nitayun,
mu mi'id ah nitayunana.
8 Ya imbi'lugnah nan bunut di danum,
mu adi magah nan bunut an ta"on hi un madamot nan danum.
9 Ya abalinanan manophop hinan timmaban bulan
ti hu'munanah nan bunut.
10 Ya nan pogpog di baybay an nan paddungnay nundittuman ad daya ya nan danum hi un amangon
di inyamman Apo Dios hi igad hi numbattanan di patal hi helong.
11 Ya nan aduntuduntug an ay tu'ud an namdon ad abuniyan
ya womogwogdah unna mandalon an umat hi atata'ot an tagu.
12 Ya dumalat di abalinana ya impadinongna nan dalluyun hinan baybay,
ya dumalat di la'engna ya inabakna nan atata'ot an animal hinan baybay.
13 Ya un anggay di hodohdana ya pimmatal ad daya,
ya nan ngamaynay namatoynah nan nabaluhubuh an ulog.
14 Hiyatuy umipanoh'an ditu'u,
mu un pa"itang di attigan nan ongol an abalinana.
Mi'id ahan ah nanginnilah aat di anidugah di abalinana!”