19
1 On'onayna nan tagun nawotwot mu nahamad di pangatna
ya un nan tagun nakudang di nomnomnan un hay lumayalayah.
2 Ta"on hi un mahmahluy tagu mu mid hulbin nan tamuna damdamah un agguy nepto' di inatnan nuntamu,
ya adi goh maphod hi un way umiyahup an muntamuh un mibahhaw di ato'atona.
3 Immannung an nan udumnan tagu ya pa"ionday nitaguanda tuwali an dumalat nan nappuhin gunda aton,
mu gagangayna an pabaholondah Apo Dios an gapuh nan ma'ma'at ay dida.
4 Nan adangyan ya do'ol di mi'ligwan dida,
mu ta"on hi un do'ol di liligwan nan nawotwot mu la'tot ya taynanda dida damdama.
5 Nan mun'ihtigu an hay nibahhaw di ulgudonah pangihtiguna ya immannung an mamoltah pidwa,
ya mahapul an magilat nan munlayah.
6 Nan tagun nabagtuy haadnan mumpapto' ya do'ol di mumpabadang ay hiya,
ya umat goh hinan nalakan hummo' an do'ol di mi'ligwan hiya.
7 Nan tagun na'agwotwot ya ta"on un nan a'agina ya adida ibilang hiyah ibada, at inyal'allana an mi'id ah ligwana!
Ya ta"on hi unna atog dida ihaphapitan mu adida damdama haggungon.
8 Nan tagun waday pamhodnah odolna ya pohdonan ma'udman di inilana
ti nan mamamhod an mun'adal ya hiyay pumhod di itaguana.
9 Nan munlayah an mun'ihtigu ya umannung an waday amoltaana,
ya nan gun munlayah ya ma'ubahnah pidwa.
10 Adi midipat hi un hay nakudang di nomnomnay munhituh nan abung di ali,
ya iyal'allanan nappuhih un way himbut an mumpapto' hi apuna!
11 Nan nanomnoman an tagu ya mehodan an adi mabanbannungot,
ya immannung an idayawda hiyah unna adi haggungon nan nappuhin inat di ibbanan hiya.
12 Umipata'ot nan bungot di ali an umat hinan layon an humeeheel,
mu umipa'amlong nan homo'na an umat hinan dulnuh nan munlangtan holo'.
13 Nan lala'in ommod di ungan nakudang di nomnomna ya do'ol di problemana,
ya nan ahawa an mi'hongngehongngel hinan ahawana ya umat hinan danum an tumidtitidtid an umipahiga.
14 Nan o'ommod di mangipaboltan hi abung ya an amin nan inadangyanda,
mu hay idat Apo Dios ya nan nanomnoman an babain ahawaona.
15 Nan napayad an humigan muntamu ya unda momollo',
ya immannung an mahinaangan nan adi bomo'la.
16 Nan tagun manginaynayun an mangunud hinan Tugun Apo Dios ya immannung an halimunanay odolna,
mu nan adi mangunud an mamahiw enen Tugun ya hiyay dumalat hi atayana.
17 Nan mangidat hi badangnah nan nawotwot an tagu ya paddungnay un hi Apo Dios di nangipa'utangana,
ya umannung an paddungnay bayadan Apo Dios nan utangna ti lagbuana hiyah pidwa.
18 Nan o'ommod an waday imbaluyda ya mahapul an tugunonda hiyah nan gutud di a'ung'ungngana ti hiyah ne gutud an nalaklakan matuduwan
ti gulat ta adida aton at paddungnay unda pa"ion di nitaguana.
19 Nan tagun mabanbannungot ya okod hiyan munholtap hi balloh nan bumungtana
ti ta"on hi un way bumadang ay hiya ta way atonan mabaliwan mu ipidwapidwanan mangat damdama, at mid hulbin nan ibadangna.
20 Nan tagun mangngol hinan mitugun ay hiya ta unudona
ya la'tot hi umangunuh ya hiyay mumbalin hi manomnoman.
21 Hay tagu ya mabalin an hiyay okod an munnomnom hinan numbino'ob'on an ato'atona,
mu okod hi Apo Dios damdamah nan penhodnah ma'at.
22 Hay pohpohdon nan tagu ya nan panginaynayunan nan pamhod di tatagun hiya,
ya onaynah un nawotwot ya un nan pumpangngalanah nan logom an dumalat hinan langkak.
23 Nan tagun hi Apo Dios di e'gonanah unudona ya hiyay way makulug hi pi'taguanah tun luta,
ya hiya goh di mawaday amlongna ya mabaliwan hinan nappuhin ma'ma'at.
24 Waday udum hi tatagu an nunheglay anapayadda
ti ta"on un ah umiduhandaan higananda!
25 Gilaton nan pumihupihul ta way tigon nan manangpah, at manomnomanda.
Ya gulat ta nan nala'eng di mihingal ya abulutona, at ma'udman di inilana.
26 Umipabain nan imbaluy an mangakaw hi gina'un amana,
ya ababain goh hi unna pakakon hi inanah nan abungda.
27 At he"an imbaluy'u ya mahapul an inaynayunmun mun'adal hinan makulug an mitugun ay he"a
ti gulat ta idinongmu at la'tot ya inaliwam an ta"on din ini"ilam tuwali ya pi'yaliwmu goh.
28 Gulat ta layah di hapiton nan taguh pun'ihtiguana ya unna langlangkakan nan munhumalya
ti nan nappuhin tagu ya pohpohdonda nan nibahhaw an ato'atonda.
29 Immannung an mamolta nan pumihul,
at mahuplit di bonogna.