141
Hay Pamaholan David hinan Buhulna
Hete ya psalm an intudo' David.
1 Apo Dios, He"ay punluwalua',
at donglom ni' ahan di luwalu' ta punnaudom an mamadang ay ha"in!
2 Abulutom ni' di ibaga' hinan punluwalua' an ita'nang'uy ngamay'u
an umat hi pangabulutam hinan incense an me'nong ay He"a,
ya umat hinan me'nong hinan mun'a'ahom.
3 Apo Dios, badangana' ta halimunam di panapit'u ta adi malmalgom di hapito',
4 ya badangana' ta adi' nomnomon an aton di nappuhi
unu middum hinan nappuhiy ugalidan tatagu.
Ya adia' ni' goh mi'yam'amung hinan way do'ol hi tatagun mangan.
5 Abuluto' di pummoltaan unu pamoholan di maphod an tagun ha"in
ti hiyah ne pumhoda' an paddungnay lanan nihiit hi ulu'.
Mu hana ay an nun'appuhiy ugalidan tatagu ya gun'u iluwaluy amoltaanda.
6 Hitun adatngan di itapalan nan ap'apudah daplah
ya kulugon mahkay nan tataguy ibaga'.
7 At alyonday,
“Nan nun'appuhiy ugalidan tatagu ya nidugah an adi milubu' di tungalda an un mun'iwa'at
an umat hinan niwa'at an batuh nan na'aladun luta.”
8 Mu He"a, Apo Dios an na'abbagbagtu, di pundenola' hi ihi'ugan,
ya adia' ahan ni' iyabulut an matoy!
9 Apu, tigom ahan ta adia' ma'nah nan indadaan nan tatagun nappuhiy ugalida
10 ta mi'id di ma'at ay ha"in.
Mu hanan tatagu ni' an nun'appuhiy ugaliday ma'nah nan bitun enehoddah a'naa'!