143
Hay Kantan David
Hi David di nangitudo' eten psalm.
1 Apo Dios, donglom ahan di luwalu'!
Badangana' ahan ti He"a ya ma"aphod'a,
ya munnononnong di pumpapto'mu!
2 Adia' ni' humalyaon an baalmu ti abuluto' an numbahola'
ti immannung an mi'id ah ohah na'ahhamad hi agguy nabaholan.
3 Inabaka' hi buhul'un namdunamdug ay ha"in ta imbaluda' hinan helong ahan
an umata' hidin nun'atoy hidin hopapna.
4 At hi'ihi'itangan an mami'id di namnama' ti nidugah di punlungdayaa'!
5 Ha"in ya ninomnom'u din naluh an algaw hidin nabayag,
ya ninomnom'uy aat din nidugah an ina'inatmu,
ya gun mipanomnom an amin din gunmu inat.
6 At ten ita'nang'uy ngamay'un munluwalun He"a,
ya nan panapula' ay He"a ya umat hinan panapulan di mamagan lutah udan.
7 Apo Dios, punnaudom ni' an mangat hinan ibaga' ta badangana'!
Ya ten mi'id di namnama',
at hiyanan adia' ahan inganuy
ti gulat ta inganuya' ta matoya' at umuya' hinan babluy di natoy.
8 Ipanomnommu ni' ay ha"in hinan helhelong di aat nan pamhodmun munnononnong ti He"ay pundenola',
ya ipadutu'muy nitagua' ti hiyah ne iluwalu' ay He"a.
9 Apo Dios, ibaliwa' ahan hinan buhul'u
ti He"ay ehdol'uh punhi'uga'.
10 Ituduwana' ni' an mangat hi pohdom ti He"ay Dios'u,
ya nan Lennawam ni' di mangipadutu' hi nitagua' ta mi'id di nappuhih ma'at ay ha"in.
11 Apo Dios, ibaliwa' ta mipabagbagtuy ngadanmu,
ya dumalat nan ana'ahhamadmu ya badangana' ahan ti ten maligatana'!
12 Abakom nan buhul'u an dumalat nan nidugah an namhodmun ha"in,
ya ubahom dida ti ha"in di baalmu.