148
Hay A'ayagan an Amin nan Nalmuh tun Luta ta Mundayawdan Apo Dios
1 Madayaw hi Apo Dios!
Dayawonyuh Apo Dios an da'yun wad abuniyan!
2 Da'yun a'anghel ya da'yun udum an wad abuniyan ya dayawonyuh Apo Dios!
3 Dayawonyuh Apo Dios an da'yun algaw, ya bulan, ya bittuan,
4 ya he"an ad dayan wah bagtuna,
ya da'yun danum an wah di ya dayawonyuh Apo Dios!
5 Dayawonyuh Apo Dios an da'yun amin an limmuna
ti un ammunay hapitna ya nawada ayu.
6 Ya immandalnay penhodnan ihinanyuh enggana, at na'at,
ya hiyah ne mandalnah ya mahapul an adi maluman.
7 Ya da'yun wah tun luta, ya ta"on un da'yun wad dolom,
ya da'yun o"ongol an humalug hinan baybay ya dayawonyuh Apo Dios!
8 Dayawonyuh Apo Dios an da'yun ilat, ya dalallu, ya bunut,
ya puo', ya dibdib an un'unnud hi alyona!
9 Ta"on un da'yun aduntuduntug, ya dudunduntug,
ya a'ayiw an ma'an di bungana, ya da'yun ayiw an ma'alih cedar ya dayawonyuh Apo Dios!
10 Da'yu goh an atap an a'animal, ya mapangan an animal, ya da'yun ahi'ada'adap,
ya an amin ayun numbino'ob'on an hamuti ya dayawonyuh Apo Dios!
11 Da'yun a'ali, ya da'yun amin an Hentil,
ya a'ap'apu, ya da'yun huhuwis ya dayawonyuh Apo Dios!
12 Da'yun ungungan linala'i ya binabai,
ya da'yun nun'ala'ay ya ung'ungungnga ya dayawonyuh Apo Dios!
13 Maphod un an amin ayu ya dayawonyuh Apo Dios ti Hiyay na'abbagbagtun amin!
Paddungnay lenehan di anabagtuna tun luta ya ad abuniyan.
14 Pento' Apo Dios di alih mumpapto' hinan tatagunan holag Israel an e'gonandan amin.
Madayaw hi Apo Dios!