☰ Psalms 150
150
Hay Pundayaw ay Apo Dios*
1 Madayaw hi Apo Dios!†
 
Dayawonyuh Apo Dios hinan Timpluna,
ya dayawonyu goh Hiyah nan nidugah an lugal ad abuniyan!
2 Dayawonyuh Apo Dios an dumalat nan inatnah nangipattiganah nan nidugah an abalinana,
ya dayawonyu ti mi'id di nipaddungan di anabagbagtuna.
3 At ipagangohyuy talampetyu,
ya ta"on nan alpa ya nan lyre‡ hi pundayawyun Apo Dios.
4 Ya dayawonyu Hiya an tukalonyu nan tambourine, ya nan gitala, ya nan tungngali,
ya tinayawanyu Hiyah pundayawyun Apo Dios.
5 At pun'ipagangohyu nan gangha ta pundayaw tu'un Apo Dios.
 
6 At an amin tu'un matagu ya dayawon tu'uh Apo Dios!
 
Madayaw hi Apo Dios!§
* 150: Heten psalm ya niddum hinan kalahin di psalm an ma'alih Hallel an Psalms ti hallel (unu hallelujah) di mahhun an mahapit hinan mahhun an nalammung an hapit (verse 1) unu hiyay angunuh an mahapit hinan angunuh an nalammung an hapit (verse 6). † 150:1 Hete ya hapit di Hudyu an hallelujah. ‡ 150:3 Hete ya it'ittang an alpa. § 150:6 Hete ya hapit di Hudyu an hallelujah.
☰