33
Nan Kantan Pundayaw
1 An amin ayun nahamad di pangatna ya idaydayawyuh Apo Dios
ya umamlong ayu an dumalat nan inatna ti hiyah ne mahapul hi aton.
2 At usalonyu nan alpa ya lyre an himpuluy gadengnah nan pungkantaanyu,
3 ya ikantaanyu Hiyah balbalun kanta,
ya ihamhamadyun muntukal,
ya it'u'yuy pundenolanyu
4 ti makulug nan Hapit Apu tu'u,
ya ipa'annungnan amin nan itulagnah atona.
5 Ya pa'appohdon Apo Dios nan nahamad di pangatna ya nan matpong an tagu
ti munnononnong di pamhodnah nan tatagu.
6 Ya un ammunay hapit Apo Dios ya nalmud abuniyan,
ya unna immandal ya nawada nan numbino'ob'on an wad daya an nan algaw, ya bulan, ya nan bittuan.
7 Ya inamungna nan danum hinan maluhung an baybay.
8 At an amin ayun wah tun luta ya ta'tanyuh Apu tu'u,
ya Hiyay e'gonanyu
9 ti un ammunay hapitna ya nalmu tun luta,
ya unna immandal ya nawadan amin di logom!
10 Ya abalinanan pa"ion di hinahapit nan tataguh nan abablubabluy hi ma'at ta adi matuluy,
11 mu nan ninomnom Apu tu'uh ma'at
ya mipa'annung an minaynayun hi enggana.
12 Mipadenol nan babluy an hi Apo Dios di dayawonda,
ya mipadenol nan pento'nah tataguna.
13 Ya hidid abuniyan ya uhdungan Apu tu'un amin nan tataguh tun luta,
14 ya wah dih nan pumpapto'ana an tigtigonan amin nan wah tun luta.
15 Ya Hiyay nunlumuh punnomnomda,
at inilanan amin di aat nan ato'atonda.
16 At nan pangabakan nan alih nan gubat ya bo'on nan ado'ol di tindalunay dumalat,
ya umat goh hinan tindalu an bo'on nan amabi'ahnay dumalat hi pangabakana.
17 Ya adiyu ehdol di abaliwanyuh nan bi'ah di kabayuh nan pi'gubatanyu
ti ta"on hi unda mabi'ah mu mid ologdan bumaliw.
18 Mu halimunan Apo Dios nan mangunud ay Hiya
ya nan mangedenol hinan nidugah an pamhodna
19 ta baliwana dida ta adida mun'atoy
an ta"on un hinan gutud di batel.
20 At He"a, Apo Dios, di ehdolmi
ti He"ay umat hi hapiaw an bumadang ya mumpapto' ay da'mi.
21 Ya He"ay dumalat hi umamlonganmi,
at ehdolmi He"a ti me'gonan'a.
22 At, Apo Dios, gunmu ni' inaynayun nan pamhodmun da'mi
ti He"a ya anggay di ehdolmi.