36
Nan Anappuhin di Pangat nan Tatagu
Hi David an baal Apo Dios di nangitudo' eten psalm, ya hay intud'ana ya nan ap'apun di muntudtuduh kanta.
1 Nan nababaholan an tatagu ya adida e'gonan hi Apo Dios,
ya nan nun'appuhiy nun'onan hi nomnomda.
2 Ti hay punnomnomdah odolda ya nabagtu,
at hiyanan adida nomnomon di pumbaholanda unu pahiwon nan nappuhin gunda aton.
3 Ya an amin nan hapitonda ya agaga"ihaw ya ma'allangkakda,
at napogpog din ananomnomanda ya din maphod an pangatda.
4 Ya ta"on hinan mahdom ya adida molo' an gun munnomnom hi nappuhih atonda,
at impa'enghada nan nappuhin ato'atonda,
hiyanan adida ipogpog.
5 Mu nan pamhodmu, O Apu, ya mi'id di pogpogna,
ya nan anahamad di pumpapto'am ay da'mi ya adi malukud an umat ad daya.
6 Ya nan anahamadmu ya umat hinan do'ol an duntug,
ya nan ma'andong an pamanuhmu ya umat goh hinan ama'alluhung nan baybay.
Ya He"ay manalimun hi managun amin hinan nun'almu an nan tatagu ya nan numbino'ob'on an animal.
7 Ya adi ahan maluman nan pamhodmu, Apo Dios,
ya He"ay pangihi'ugan an amin nan tatagun nun'abagtu ya nun'a'ampa.
8 Ya mun'am'amlong amin mangan hinan do'ol an ma'an an limmum,
ya idatmuy inumonmi an malpuh nan ma"aphod an wangwang
9 ti He"ay nalpuwan di ataguan an amin di matagu,
ya nan patalmuy mamatal ay da'mi.
10 At inaynayunmu nan nidugah an pamhodmuh nan tatagun nanginnilan He"a
ya nan pamaliwam hinan tatagun nahamad di ugalida.
11 Ya adim ni' iyabulut an ilumdita' hinan mumpahpahiyan tatagu
unu palayawona' hinan tatagun nappuhiy ugalida.
12 At tigonyu adya nan tatagun nappuhiy pangatda an nun'a'abakda ya nun'atu"inda
an mid abalinandan bumangon hi enggana!