46
Wadah Apo Dios an Niddum ay Ditu'u
Heten kanta ya intudo' nan linala'in holag Korah, ya hay intud'anda ya nan ap'apun di muntudtuduh kanta. Ya ma'innila an hay stylena ya alamoth.
1 Hi Apo Dios di baliw tu'u ya mangidat hi bi'ah tu'u
ti Hiyay wagwadan bumadang hinan way aligatan tu'u.
2 At adi tu'u tuma'ot an ta"on hi un maluman di aat tun luta,
ya ta"on un mun'egday nan duntug ta mumpapanguy nan lutah nan baybay,
3 ya ta"on goh un nidugah di tungog nan danum hinan baybay,
ya umalyog nan do'ol an duntug hi aton nan ma'abbi'ah an dalluyun.
4 Ya waday wangwang an umipa'amlong hinan tatagun den babluy an pundayawandan Apo Dios
an nan me'gonan an babluy an awadan nan Timplun Apo Dios an punhituwana.
5 At mi'id ma'at hi nappuhi enen babluy
ti wagwah dih Apo Dios an mamaliw.
6 Ya mun'abungotda nan tataguh nan abablubabluy,
ya mun'a'abak nan do'ol an pumpapto'an di ali,
ya ammuna nan humapitan Apo Dios ya nidugah di ta'ot nan tatagu.
7 Ya wagwadah Apu tu'un nidugah di abalinanan ditu'u
an nan Dios Jacob ya Hiyay hapiaw tu'u.
8 At nomnomon tu'u nan numbino'ob'on an ina'inat Apu tu'u
an nan do'ol an lugal an ingganuynah tun luta.
9 Ti ipadinongnan amin di mumbubuhul hitun luta,
ya nun'ipungna nan panada ya nan gayangda,
ya nunggohobna nan hapiawda.
10 Ya inalin Apo Dios di,
“Duminong ayu ta way atonyun manginnila an Ha"in di Dios,
ya Ha"in di ipabagbagtun nan Hentil hinan abablubabluy hitun luta!”
11 Ya wagwadah Apo Dios an nidugah di abalinanan ditu'u
an Dios Jacob ya Hiyay hapiaw tu'u.