50
Nan Makulug hi Aton an Mundayaw ay Apo Dios
Hete ya psalm an intudo' Asaph.
1 Impa'ayag Apo Dios an nidugah di abalinanan amin di tataguh tun luta ta mi'hapit ay dida
an nete"ah appit di buhu'an di algaw ta nangamung hinan alimuhana.
2 Ya hidid Zion an nan nidugah an ma"aphod an babluy
ya mattig di benang Apo Dios an umat hinan potang.
3 Ya ma'innilay umalian Apo Dios ti waday apuy an mammang ya un Hiya,
ya waday mabi'ah an puo' hinan lene'wohna.
4 Ya ayagana nan wad abuniyan ya nan wah tun luta
ta diday mun'ihtiguh nan punhumalyaanah nan tataguna.
5 Ya inalinay,
“Amungonyu nan un'unnud an tatagu',
ya ma'amung ayuh tun wada' an da'yun ni'tulag ay Ha"in hidin nun'onnganyu.”
6 At nan wad abuniyan di nangipa'innilah anahamadna
an hi Apo Dios ya anggay di mumpanuh hinan tatagu.
7 Ya inalin Apo Dios di,
“Donglonyun tatagu' an holag Israel
ti Ha"in an Dios di ihtiguyu an Diosyu.
8 Ya adi' da'yu ihingal hinan gunyu e'nong
unu nan moghob an gunyu e'nong ay Ha"in
9 ti adi' mahkay mahapul nan manilhig an baka
unu gandeng an malpuh nan impahtulyu
10 ti an amin nan do'ol an animal hi inalahan ya bagi',
ya umat goh hinan bakah nan dudunduntug.
11 Ya an amin nan numbino'ob'on an hamutin wah nan aduntuduntug
ya nan wah nan punhabalan ya bagi'.
12 Ya gulat ta nahinaangana' ya adi mahapul hi un'u ipa'innila ay da'yu
ti hakup'un amin tun luta ya an amin nan wah tun luta.
13 Ya undan ihda' nan dotag di baka unu inumo' nan dalan di gandeng?
14 Hay pohdo' hi e'nongyun Ha"in an Dios ya nan pangalyanyuh punyamananyu,
ya impa'annungyun amin nan intulagyun Ha"in an na'abbagbagtu.
15 Ya mumpabadang ayun Ha"in hinan way punligatanyu,
at baliwa' da'yu,
ya Ha"in e'gonanyu.”
16 Mu inalin Apo Dios hinan nun'abaholan an tataguy,
“Mid hulbin nan gunyu pangulgu'ulgudan hinan Uldin'u ti adiyu damdama unudon!
17 Ya adiyu pohdon an matuduwan
ti unyuat goh du'gon nan intugun'u.
18 Ya wa ay di mangakaw ya unyuat goh idoldol,
ya middum ayuh nan umilugtap.
19 Ya niyay'ayan un nan nun'appuhiy gunyu hapiton,
ya nidugah an munlayah ayu.
20 Ya gunyu hapihapiton di nappuhih aat nan a'agiyuh pamuhiyun dida
an ta"on un agguy immannung.
21 Ya amin hanan inatyu ya unna' didindinong,
at hay ninomnomyu ya umata' ay da'yu,
mu adi ti ad ugwan ya pabaholo' da'yu.
22 At nomnomonyun nangaliw ay Ha"in an Dios ti la'tot ya numbi"i' da'yu,
at undan way mamaliw ay da'yu?
23 At nan gun munyaman di hiyay onong hi mange'gon ay Ha"in,
ya nan mangunud hinan Tugun'u ya baliwa' dida.”