☰ Psalms 53
53
Hay Anappuhin nan Tagu
Hete ya psalm an intudo' David, ya hay intud'ana ya nan ap'apun di muntudtuduh kanta, ya ma'innila an mahalath* ya maskil† di style nan tunena.
(Psa. 14:1-7)
1 Nan manangpah ya alyonday, “Mi'id di Dios.”
At mid di hulbida ti un hay umipabohol di gunda aton,
ya mi'id di ohan didah mangat hi maphod.‡
2 Mu wah did abuniyan hi Apo Dios an uh'uhdungana nan tataguh tun luta
ta innilaonay un waday nanomnoman an mundayaw ay Hiya.§
3 Mu mi'id! Ti an amin nan tatagu ya din'ugdah Apo Dios
an numpapaddungdan hay umipabohol di gunda aton,
at mi'id di ohah maphod di atona.*
 
4 Ya inalin Apo Dios di,
“Undan mid ahan nomnom danen mangamangat hi nappuhih nan tatagu' an unda upohon,
ya adida munluwalun Ha"in?Ӡ
5 Mu awniat madatngan nan nidugah an tuma'tanda an agguyda ene'e'dam
ti pun'iwa'at Apo Dios di tungal nan buhul di tataguna,
ya bainon Apo Dios dida ti pahiwona dida.‡
 
6 At hay luwalu' ya umali ni' nan mamaliw hinan i'Israel an malpud Zion.
Ya awni ta wagahan Apo Dios nan tataguna at an amin nan holag Jacob ya umanlada mahkay.§
* 53: Nan hapit an mahalath ya hapit di Hudyu, ya ad ugwan ya mid nanginnilah pohdonan ibaga. Mu mid mapto' ya hiyah ne ohan aat di aton an muntukal an umat hi panglotan, unu mahaluyud, unu ul'ulodyon, unu gagalan. † 53: Bahaom nan gloss di Psalm 32 ta innilaom di aat ten hapit. ‡ 53:1 Psa. 14:1; Rom. 3:10. § 53:2 Psa. 14:2; Rom. 3:11-12. * 53:3 Psa. 14:3; Ecc. 7:20; Rom. 3:12. † 53:4 Psa. 14:4. ‡ 53:5 Psa. 14:5-6. § 53:6 Psa. 14:7:
☰