66
Nan Kantan Pundayaw ya Punyamanan
Heten psalm ya kanta, ya midat hinan ap'apun di muntudtuduh kanta.
1 Da'yun amin an tatagu ya ibugawyuy umamlonganyun Apo Dios!
2 Ya ikantayuy ipabagbagtuan di ngadana ya nan pundayawyun Hiya,
3 at alyonyun Apo Dios di,
“Umipata'ot nan ina'inatmu,
ya nidugah di abalinam,
at hiyanan mumpunhippi nan buhulmun He"an dumalat di ta'otda!
4 Ya an amin nan wah tun luta ya He"ay dayawonda,
ya ikantaday pangipabagbagtuandan He"a,
ya ikantada goh di pundayawdah nan ngadanmu.”
5 Nomnomonyu adya nan umipata'ot an ina'inat Apo Dios hi pumhodan nan tatagu
6 ti nunhiyanona nan danum hinan Mumbolah an Baybay ya nan Wangwang an Jordan
ta way nange'wan din tatagunan bimmad'ang,
at hiyanan nidugah di amlongmi ahan hinan inatna.
7 Ya Hiyay mun'ap'apuh mid pogpogna an dumalat nan nidugah an abalinana,
ya hahalepatay ato'aton nan Hentil hinan abablubabluy ta nan adi umunud ya adida mahkay mi'bohhol ay Hiya.
8 At an amin tu'un tatagu ya ipabagbagtu tu'uh Apo Dios,
ya olton tu'un mangipabagbagtun Hiya
9 ti punnonngonay ataguan tu'u,
ya adina iyabulut di a'abakan tu'u.
10 Tinapngan da'min tatagum, O Dios,
an umat hi ahibugan nan silver di inatmun da'mi.
11 Ya inyabulutmuy nibaludanmi,
ya nan nidugah an dedemmotmih hinolholtapmi.
12 Ya inyabulutmun abakon da'mih buhulmi ta omod un nidugah di nangipaligligatandan da'mi,
mu ten inyali da'mih tun malumong an lutan wadan an amin di mahapulmi.
13 Umalia' hinan Timplum ta mun'ononga' hi Onong an Moghob
ta ipa'annung'u din intulag'un He"a
14 an hiyah ne din inali' hidin gutud di naguguluwa'.
15 At e'nong'un He"ay mataban kalnilu, ya nan baka, ya nan gandeng ta Onong an Moghob
an umipa'amlong ay He"ay angilitna.
16 At umali ayun amin an tatagun mundayaw ay Apo Dios
ta ulgudo' ay da'yuy ina'inatnan ha"in!
17 Ti numpabadanga' ay Hiya,
ya impabagbagtu' Hiyan dumalat nan do'ol an kinanta'.
18 Mu gulat ta laylaydo' an mumbahol at adia' donglon ay Apo Dios,
19 mu immannung an dengngola' ay Apo Dios,
ya inabulutna din inluwalu'.
20 At dayawo' hi Apo Dios ti agguyna ingnganuy din inluwalu'
unu pinogpog di pamhodnan ha"in!