7
Luwaluh Pumpahmo'an ta Mawaday Makulug an Pangat
Hete ya psalm an intudo' David an ingkantanan Apo Dios hi aat Cush an holag Benjamin. Ya hay stylenah matukal ya shiggaion.
1 Apo Dios an dayawo', kulugo' an He"ay manalimun ay ha"in,
at ibaliwa' hinan do'ol an umalin mamdug ay ha"in.
2 Ya gulat ta adia' baliwan at patayona' ya numpuhita'
an umat hinan aton di layon hinan way patayona an mi'id di mamaliw ay ha"in.
3 Apo Dios an dayawo',
gulat ta numbahola' hi ibba' an tagu,
4 ya gulat goh ta binaliya' nan ligwa',
unu hinamham'uy gina'un nan buhul'u an ta"on hi un mi'id dumalat
5 at abulutom di pumpamdugan nan buhul'un ha"in ta ah'upana',
ya ta"on hi unna' pun'igatin ta nangamung hi unna' matoy ya tinaynana' hinan nataya'!
6 Ihi'almu ni', Apo Dios, ta badangana',
ya bumungot'a ta hanggaom nan buhul'u,
ya minoltam dida.
7 Ya amungom ni' nan tataguh nan abablubabluy
ta He"ay mangipapto' ay didah nad abuniyan
8 ti He"a, Apo Dios, di munhumalyan amin hinan tatagu,
ya ta"on un ha"in ya pi'humalyam ta way a'innilaan di anahamad di aat'u an mi'id numbahola'.
9 Ya He"a an na'ahhamad an Dios ya i'innilam an amin di nomnomon nan tataguh tun luta.
At pogpogom nan numbino'ob'on an nun'appuhin gun aton nan tatagu,
ya halimunam nan tatagun nahamad di pangatda.
10 He"a, Apo Dios an na'abbagbagtu, di paddungnay hapiaw'u
ti baliwam an amin nan umunud ay He"a.
11 Ya na'ahhamad di panumalyanan adina ipangngel,
at hiyanan immannung an moltaona nan nun'appuhiy pangatnan tataguh abigabigat.
12 Ya gulat ta adi iyuyan Apo Dios nan nappuhin gun aton nan tatagu
at paddungnay ihamadnan haiton nan hinalungna,
ya indadaana nan panana.
13 Ya immannung an idadaanan amin nan almasna
ya nan pananan dumaladalang.
14 Elanyuat ti nan tatagun nappuhiy pangatda
ya hay nappuhiy iplanudah atonda
ta way ibahhawan nan tatagu ya lumayalayahda.
15 Ya munlut'u'dah bitu ta way abituan nan tatagu,
mu didaat di mabitu.
16 Ya nan nun'appuhin pangatda ya mumbangngad ay dida ta holtaponda.
17 Mu munyamana' ay Apo Dios ti na'ahhamad di pangatna,
ya ikanta' di ipabagbagtuan nan ngadan Apo Dios an nidugah di anabagbatuna!