74
Hay Pangiluwaluan hinan Tataguh nan Abablubabluy ta Mabaliwanda
Heten psalm ya maskil an intudo' Asaph.
1 Anaad ahan ta inganuy da'mih enggana, Apo Dios?
Undan punnonngom nan bumubungtam ay da'min tatagum?
2 Nomnomom an da'mi nan pento'muh tatagum hidin penghana
an da'miy himpangapuh binaliwam hidin nihbutanmi,
ya adim aliwan ad Jerusalem an numbabluyam hitun luta!
3 Un adya ihamadmun tigon nan numpa"in danen buhulmu
ti nidugah an inamindan pina"i nan gina'uh nan Timplum.
4 Ya wah didan tumanu'u' nan buhulmuh nan Timplum an dumalat di nangabakanda,
ya hina"adda nan bantiladah mangipa'innilah nan nangabakanda.
5 Ya hay tigawda ya umatdah nan linala'in mumpalngoh hinan ayiw hi inalahan an hay wahay palngohda,
6 ya nungwahayda ya nummattilyuda an amin nan nal'altian an dedeng,
7 ya pinuulanda nan Timplum,
ya pinuhidan nan lugal an pundayawan ay He"a.
8 Ya hay ninomnomda goh ay alyonday,
“Pa"ion tu'un amin,
at pinuulandan amin nan lugal an pundayawanmin He"a an Dios hinan babluy!”
9 Ya ten mi'id di pangitiganmih un da'mi baliwan,
ya mi'id an amin nan propeta,
at mi'id di nanginnilah gutud di duminngan ten ma'ama'at.
10 Anuud mah nin di pangidinngan daten buhul an mamihupihul ay He"a, Apo Dios?
Unmu dan iyabulut di pamahipahiwandan He"ah enggana?
11 Anaad ta adi da'mi badangan an mid alyonan moltaom dida ta mun'a'ubahda?
At pogpogom ni' dida!
12 Mu He"a damdamay alimi, Apo Dios, an nete"ah din penghana ta engganad ugwan,
ya He"ay gun namaliw ay da'mi!
13 Ya He"a goh nangodwah danum hi baybay an dumalat nan nidugah an abalinam,
ya inamehmuy atata'ot an animal hinan baybay ti gimmi'muy uluna!
14 Ya nunggumi'mu goh nan ulun nan alyondan Leviathan,
ya nun'ipa'anmuh nan a'animal hinan mapulun!
15 Ya limmum di danum hinan obob ya hinan ginnaw,
ya tindu'mu nan danum hinan o"ongol an wangwang an din agguy ahan natnatdu'.
16 Ya He"ay nunlumuh nan patal ya nan mahdom,
ya inhinam nan potang ya nan bulan hinan awadanda,
17 ya He"a goh di nangiyammah nan igad an pogpog tun luta,
ya limmum di tiyalgaw ya nan lawang.
18 Mu adya nomnomom ni', Apo Dios, nan gun pangaba'abatlan nan buhul ay He"a
ti nidugah di pamihuldan He"a,
19 ya adim ni' ahan du'gon daten mid abalinanan tatagum hinan aton nan atata'ot an buhul ay dida,
ya adim ni' aliwan an mipaligligat nan tatagum hi enggana.
20 Ya nomnomom din intulagmun da'mi
ti ten nunhinap hitun lutay gun mangamangat hi nun'appuhi.
21 Ya adim ni' abuluton di abainan danen maligligatan
ta danen nun'awotwot ya nan maligligatan di mangipabagtun He"a.
22 At ihi'almu ni', Apo Dios, ta atom di pohdom hi ma'at ta ipadinongmu nan ato'atondan He"a
ti adya nomnomom an abigabigat ya gun da'a pahapahalon hinan mungngohoy an tatagu!
23 Ya adim aliwan nan namadngopadngol nan buhulmun He"a
an dumalat nan bungotda ti nidugah di ngohoydan He"a!