82
Hi Apo Dios di Ap'apun an Amin nan A'ap'apu
Hete ya psalm an intudo' Asaph.
1 Hi Apo Dios di mumpapto' hi un ma'amung nan mumpumpapto'
ti Hiyay waday biyangnan manumalyan didan a'ali, ya gogobelnadol, ya huhuwis
an waday nipaddungandan Hiya an Dios an alyonan diday,
2 “Anuud nin di pangidinnganyuh nan nibahhaw an panumalyayu
ti un at goh nan tatagun nappuhiy pangatday pangipangngilanyu?
3 Unyuat ni' baliwan nan tatagun mid abalinandan umat hinan nguhu,
ya nan nun'awotwot,
ya nan munhapul hi badang!
4 At hay mahapul hi badanganyu ya nan nun'awotwot ya nan munhapul hi badang
ta baliwanyu didah nan aton di nappuhiy pangatdan tagu.
5 Mu da'yun munhumalya ya mid ahan di inilayun mumpanuh,
ya adi da'yu goh ma'awatan ti mibahhaw di pamanuhyu,
at hiyanan adi maphod di ma'ma'at hitun luta.
6 At hiyanan inali' di,
Umat ayun Apo Dios ti da'yuy imbabaluy nan na'abbagbagtu.
7 Mu da'yu ya matoy ayu an umat ayuh tagu damdama,
ya mapogpog di nitaguanyun umat hinan udumnan ap'apun mumpapto'.”
8 At ihi'almu ni', Apo Dios, ta ipapto'mun ipanuhmu nan tataguh tun luta
ti He"ay ad hakup an amin hitun tatagun Hentil!