88
Hay Luwalun nan Mumpabadang
Heten psalm ya kantan intudo' nan lala'in holag Korah an hi Heman an hina' Ezra, ya hay intud'ana ya nan ap'apun di muntudtuduh kanta. Ya duway stylena ti mahalath leannoth di oha ya maskil di oha.
1 O Apo Dios an Dios an namaliw ay ha"in,
He"ay gun'u punluwaluwan hi abigabigat ya amahdomahdom,
2 at donglom ni' nan iluwalu' ay He"a ta badangana'
3 ti ten nidugah an maligligatana' hinan do'ol an nappuhin ma'ma'at ay ha"in,
ya ten un ay magadyuh goh di ataya'.
4 At ten midduma' ay daten munhood hi ilubu'anda ti ten mi'id bi'ah'u,
5 ya umata' hinan nun'atoy an mid nomnomda
an umat hinan napatoy ya nilubu' an inaliwam,
at adim mahkay halimunan.
6 Ya impiyuya' hinan ma'alluhung an bitu an helong ahan di bunolna.
7 Ha"in di nangipuhayam hinan nidugah an bungotmun
paddungnay unna' nun'iloblob hinan lobong,
8 at hiyanan nuntaynana' hidin nahamad an liligwa',
ya ten an aminda ya pahiwona' ay dida,
at paddungnay unna' nabalud,
at mid ato' an lumayaw.
9 Ya ten adi tummig tun mata' ti mamaphung hi lugwa' an dumalat nan punlungdayaa'.
Ya gun'u itata'nang di ngamay'un munluwalun He"ah abigabigat.
10 Undan nin nan nun'atoy di pangipattigam hinan atom an umipanoh'a?
Ya undan goh mabalin an bumangon nan nun'atoy ta ipabagbagtu da'a?
11 Un mah mabalin an ul'ulgudon nan nun'atoy an wah nan lubu' di aat nan nidugah an pamhodmu?
Ya nan lugal an wadan di punligatan ya undan goh mabalin an ul'ulgudonday aat nan anahamad di pangatmu?
12 Ya undan mabalin an tigon nan wah helong ya inul'ulgudda nan umipanoh'an atom?
Ya undan goh ma'ulgud nan aat di anahamad di ugalim hidid dolom an nihinan nan dimminong di nomnomda?
13 Mu ha"in, Apu, ya gunna' mumpabaddang ay He"a,
ya gunna' munluwaluh ahelhehelhelong.
14 Anaad ahan, Apu ta inganuya' ay He"a?
Ya anaad ta adi'a mumpattig ay ha"in an un'a mipopo"oy?
15 Nete"ah din a'unga' di nunholholtapa' an hi'ihi'itangan di ataya',
at himmigaa' ahan an nange'edpol hinan ligat'uh nummoltam ay Ha"in.
16 Nan nidugah an bungotmuy nangipaligligat ay ha"in,
ya nan pana'ta'atotmuy mangubah ay ha"in.
17 Ya unna' linili'ub hi abigabigat hinan mangipaligligat ay ha"in
an umatdah nan danum an hene'noba'.
18 At hiyanan nuntaynana' hidin liligwa' ya din pamilya',
at anggay nan helong hi na'angang hi ibba'.