95
Hay Mikantah Pundayaw ay Apo Dios
1 Umali ayu ta dayawon tu'uh Apo Dios,
ya ikanta tu'uy umamlongan tu'un Hiya
an umat hi batu an ihi'ugan ya mamaliw ay ditu'u.
2 At humigup tu'uh nan Timpluna ta ikanta tu'uy punyamanan tu'u
ya nan amlong tu'un mundayaw ay Hiya
3 ti nidugah di abalinan Apo Dios,
ya Hiyay na'abbagbagtun Ali,
ya mid di udum hi nipaddung ay Hiya!
4 Hiyay Ap'apun amin hitun luta,
ya ta"on hinan wad dolom ya hinan aduntuduntug.
5 Ya an amin di wadah baybay ya hitun luta ya bagina ti Hiyay nunlumun amin.
6 At aga ta mumpunhippi tu'u ta dayawon tu'uh Apo Dios an nunlumun ditu'u
7 ti Hiyay Dios tu'u,
ya ditu'uy umat hinan kalnilunan ipapto'na.
At ad ugwan ya donglonyuh Apo Dios an alyonay,
8 “Adi ayu nangohoy ta adiyu iyunnud hidin inat din o'ommodyuh
dih nan mapulun ad Meribah ya ad Massah
9 ti nginohoya', ya tinapngana' ay dida
an ta"on hi unda gun tinnig din ina'inat'un umipanoh'a.
10 At heden napat di tawon ya nidugah di bungot'un dida,
at inali' di,
Daten tatagu ya un ahan mid di nomnomda,
ya adida unudon di Tugun'u!
11 At hiyanan dumalat nan nidugah an bungot'u ya inhapata' an inali' di,
Adida ahan umatam hinan babluy an indadaan'un pun'eblayanda!”