16
1 Ya heden nangidatngandah din Kahon an Nittuwan nan Uldin Apo Dios ya impahigupdan impatang hidin balbalun Tuldan Abung an impiyamman David hi ihinana. Ya ene'nongda nan Onong an Moghob ya nan Onong di Pi'lenggopan.
2 Ya unat goh lempah David an ene'nong nan Onong an Moghob ya Onong di Pi'lenggopan ya winagahana nan tataguh ngadan Apo Dios,
3 ya indatana didan amin an linala'i ya binabain holag Israel hi numbino'ob'on an onondah tinapay, ya nan mamagan greyp.
4 Ya pinilin David nan udumnan holag Levi ta diday mangipangpanguluh nan pundayawan ay Apo Dios an dayawon nan holag Israel hinan way hinagang di Kahon an Nittuwan nan Uldin hi aton an munluwalu, ya munyaman, ya panapitan hi a'al'alyana.
5 At hi Asaph di napto' hi mangipangpangulu, ya hi Zechariah di mehnod an bumadang ay hiyah nan ma'at. Ya da Jeiel, ya hi Shemiramoth, ya hi Jehiel, ya hi Mattithiah, ya hi Eliab, ya hi Benaiah, ya da Obed-Edom ya nan oha goh an hi Jeiel di mangipagangoh hinan alpa ya nan i"itang an alpan ma'alih lyre. Ya hi Asaph di mangipagangoh hinan cymbals,
6 ya nan duwan padin da Benaiah ay Jahaziel di gun mangipagangoh hinan talampet hi abigabigat hinan way hinagang nan Kahon an Nittuwan di Uldin.
Nan Kantah Punyamanan
(Psa. 105:1-15; 96:1-13; 106:1, 47-48)
7 Hiyah ne hopap di nangidatan David ay da Asaph ya nan tutulang nan holag Levi hi mehnod an mikantah punyamanan ay Apo Dios:
8 “Mundenol ayun Apo Dios,
ya Hiyay gunyu hapiton di anabagtuna,
ya nun'iwa'atyun ipa'innilah nan tataguh nan abablubabluy nan nahamad an inatna.
9 Ya ikantayu nan pundayaw ay Apo Dios an dumalat nan inatnan umipanoh'a,
10 ya mun'am'amlong ayun nihakup ay Hiya,
ya maphod unda umamlong an amin nan mundayaw ay Hiya.
11 Ya hi Apo Dios di pange'kodanyu ta Hiyay pun'adawanyuh badang,
ya Hiyay inaynayunyun gun dayawon.
12-13 Da'yun holag Jacob an baal an pento' Apo Dios
ya nomnomonyu nan umipanoh'an inatna
ti Hiya ya na'ahhamad di panumalyana
an hiyah ne inalinah nan Uldin an indatna.
14 Ya Hiyah Apo Dios an Dios tu'u,
ya hay punhulbian nan Uldina ya an amin nan tataguh tun alutaluta.
15 Hi Apo Dios ya adina aliwan nan Tulagna ti minaynayun an mi'id di apogpogana.
Ya henen Tulag an immandalna ya munhulbin amin hinan holagyu,
ya minaynayun an adi mapogpog.
16 Nan Tulag an din intulagnan Abraham
ya hiya goh din inhapatanan intulagnan Isaac,
17 ya intulagna goh ay Jacob,
ya adi ahan mapogpog ti mahapul an minaynayun di punhulbianah nan holag Israel.
18 Ya inalin Apo Dios ay didan hinohha di,
Idat'un da'yu nan babluy ad Canaan ta banohyu.
19 Din hopapna ya nahnotda din tatagun Apo Dios
an unda bunag hi ad Canaan.
20 Ya gunda nun'ennewel hinan numbino'ob'on an babluy
an gunda malpuh nan ohan babluy,
ya nakakda goh ta umuydah nan oha.
21 Mu imbaliwna dida ta mi'id ah nangipaligat ay dida,
ya pinadana nan a'ali ta mi'id al'alih nan tataguna,
22 ya inalinah nan a'aliy,
Adiyu ahan paligaton nan pento"un baal'u,
ya adiyu goh ipa'dam nan ngamayyuh nan propeta'.
Hiyah ne inalina.
23 At an amin ayun Hentil hitun alutaluta ya ikantaanyuh Apo Dios,
ya abigabigat ya gunyu ipa'innila nan maphod an ulgud hi namaliwanan ditu'u.
24 Ya ipa'innilayuh nan numpunhituh nan babluy di aat nan anabagtuna,
ya nun'ipa'innilayuh nan tatagun umipanoh'a nan ina'inatna.
25 Ya manu ay alyonyuh ne ti hi Apo Dios
ya nidugah di anabagbagtuna ya un nan udumnan madayaw
26 ti an amin nan dayawon di Hentil ya un hay inyamman di tatagu an bulul,
mu hi Apo Dios ya Hiyay nunlumud abuniyan.
27 Ya nan benang ya nahamad an nunle'woh ay Hiya,
ya nan abalinana ya amlong di mun'onan hinan ihinana.
28 Da'yun amin an Hentil hitun luta ya hi Apo Dios di dayawonyu,
ya impabagbagtuyu nan aat di benangna ya nan nidugah an abalinana!
29 Ipabagtuyuh Apo Dios an nidugah di anabagtuna,
ya ita'inyuy e'nongyu,
ya inyuyyuh nan Timpluna,
ya dayawonyu Hiya ti Hiya ya na'ahhamad di a'e'gonana!
30 At nomnomonyuy aatna ta wumogwog ayu
ti makulug an hi Apo Dios ya Hiyay nunlumuh tun luta,
at mi'id ah mangipahlig.
31 Ya umamlong ayun wad abuniyan ya tun luta,
ya ipa'innilayuh nan Hentil an hi Apo Dios di ali!
32 He"an baybay ya gumongagongaah'a ya an amin nan wan he"a,
ya da'yun payaw ya umamlong ayu ya an amin nan nalmun wan da'yu.
33 Ya tum'u' nan ayiw an wah nan inalahan an dumalat di amlongdah
un umalih Apo Dios an mumpanuh hinan tataguh tun luta.
34 At mundenol ayun Apo Dios ti Hiya ya ma"aphod
an adi mapogpog di pamhodna.
35 Ya alyonyun Hiyay,
Ibaliw da'mi, O Dios an baliwmi!
Ya amungon da'mi ta ibaliw da'mih nan nappuhin aton di Hentil hitun luta
ta way atonmin mangedenol ay He"a,
ya ta nan na'ahhamad an ngadanmuy gunmi hapiton.
Hiyah ne alyonyun Hiya.
36 Ya hay dayawonyu ya hi Apo Dios an Dios nan holag Israel,
at Hiyay inaynayunyun gun dayawon hi mi'id pogpogna.”
Ya inalin an amin di tataguy, “Amen!” ya “Madayaw hi Apo Dios!”
Hay Nundayawandad Jerusalem ya ad Gibeon
37 Ya hi David ya tinaynana da Asaph ya nan tutulangnan holag Levi ta diday manginaynayun an mangipapto' hinan pundayawan hinan wadan nan Tuldan Abung an nihinan nan Kahon an Nittuwan nan Uldin Apo Dios, ya gunda aton hi abigabigat ti hiyah ne nidat hi tamuda.
38 Ya tinaynana goh da Obed-Edom ya din nanom ta walun tutulangna ta mi'tamun dida. Ya hi Obed-Edom an hina' Jeduthun ya hi Hosah di okod an mun'adug hinan pantaw.
39 Ya inhinan David hi Zadok an padi ya din i'ibbanan papadi ta diday okod an mangipangpanguluh nan pundayawandan Apo Dios hinan Tuldan Abung an wah nan nabagtun lugal ad Gibeon,
40 at diday nangitamuh nan Onong an Moghob an me'nong ay Apo Dios hinan pun'onngan, ya gunda inat hinan ahelhehelhelong ya amahdomahdom an hiyah ne inalin din nitudo' an Uldin hi inyuldinah nan holag Israel an adi mapogpog.
41 Ya hay ni'yibbadah di ya da Heman ay Jeduthun ya din udumnan napilin mangikantah nan punyamanan ay Apo Dios an dumalat hinan adi mapogpog an pamhodna.
42 Ya da Heman ay Jeduthun di okod an nangipapto' an nangipagangoh hinan talampet, ya cymbals, ya nan udumnah nan pungkantaan hi pundayaw. Ya nan linala'in holag Jeduthun di nangipapto' hinan mun'adug hi pantaw.
43 At an amin din tatagu ya numpanga'anamutdah nan abungda, ya hi David ya immanamut hi abungna ta wagahana nan pamilyana.