9
Hay Amoltaan nan Buhul di Holag Israel
(Damascus: Isa. 17:1-3; Jer. 49:23-27; Am. 1:3-5; Tyre ya Sidon: Isa. 23:1-18; Ezek. 26:1—28:26; Joel 3:4-8; Am. 1:9-10; Philistia: Isa. 14:28-32; Jer. 47:1-7; Ezek. 25:15-17; Joel 3:4-8; Zeph. 2:4-7)
1 Ya inalin goh Apo Dios an titiggonan amin di hinohha an inyal'allanan ditu'un holag Israel,
ya impa'innilanay amoltaan nan tataguh nan siudad ad Hadrak ya ad Damascus.
2 Ya ta"on goh nan iHamath an wah nan pingit din duwan siudad,
ya mi'molta goh nan iTyre ya nan iSidon an ta"on unda nun'ala'eng.
3 Ya ta"on hidid Tyre ya nun'ihamad nan ata'ta'nang an allupda,
ya do'ol goh hidiy silver an umat hinan hupu',
ya do'ol goh di balitu'da an gumalut hinan kalata.
4 Mu umahon Apo Dios an amin nan inadangyanda ti pun'itapalnah nan baybay,
ya nunggohobnah nan babluyda.
5 At nan tatagud Ashkelon, ya ad Gaza, ya ad Ekron ya wumogwogdah ta'otdan mannig hi a'atan hana
ti mi'id mahkay namnamada.
Ya awniat mipapatoy mahkay nan alidad Gaza,
ya ad Ashkelon ay ya la'tot ya mi'id di mumbabluy hidi.
6 Ya hakupon nan bunag nan babluy ad Ashdod an diday mumpunhituh di,
at hiyah ne pamogpog Apo Dios hinan pumpahiyaan nan iPhilistia.
7 Ti alyon Apo Dios di,
“Nan ma'angang an iPhilistia an umat hinan i'Ekron ya mibilangda mahkay hi tatagu' an umatdah nan holag Judah,
ya adida mahkay ihda nan dotag an agguy na'aan di dalana,
ya adida onon nan ma'an an mapaniaw.
At abuluto' nongkay dida an tatagu' an umatdah nan iJebus.
8 Mu ihamad'un iyadug tun babluy'u ta adi hogpon nan mangubat,
at mi'id mahkay di mangipaholholtap hinan tatagu' ti iyadug'u nongkay dida,
ya ini"ila' di ma'ma'at.”
Hay Umalian nan Mapto' an Alin Pento' Apo Dios hi ad Zion
9 At inalin goh Apo Dios ay ha"in an hi Zechariah di,
“At an amin ayun iJerusalem ya it'u'yuy umamlonganyu ti na'uy nan Aliyu!
Hiya ya makulug,
ya abalinanan bumaliw,
ya ma'ma'ullay,
ya mumpa'ampa ti nuntakay hinan uyaw an dongki.”
Hay Pangibangngadan Apo Dios hinan Tatagunah nan Numbabluyanda
10 Ya inalin goh Apo Dios ay ha"in di,
“Pogpogo' ad Israel ya ad Jerusalem nan ma'usal hi gubat an umat hi kalesa ya kabayu.
Ya pa"io' goh nan papanada.
At henen ali ya mun'ap'apuh abablubabluy an mete"ah nan pingit nan baybay ta engganah nan pogpog tun luta.
Hiya ya wadaona nongkay di lenggop hi abablubabluy hitun luta.
11 Ya ipabangngad'u nan i'ibbayun tatagun nipiyuy hinan udum an babluy an ayda balud
an dumalat nan ni'tulaga' ay da'yun tatagu'
ya nan dalan nan animal an gunyu ene'nong.
12 Ya da'yun paddungnay balud hinan udum an babluy an gun manahalimid ay Ha"in an Dios
ya mumpumbangngad ayu mahkay hinan babluyyu,
ya mumpidway ado'ol di pungwagah'un da'yu
an umat hinan ado'ol di tatagu an dumalat nan nunholholtapanyu.
13 At da'yun linala'id Judah ya ad Israel di paddungnay pana' ya spada' an pangubat'ud Greece.”
14 Ya ha"in an hi Zechariah ya inali' di,
“Hi Apo Dios ya ay bunut an mumpattig hinan bagtun di tataguna,
ya umelat di panana an umat hinan ilat.
Hiya an na'abbagbagtun Dios ya ipipagangohna nan talampetna,
ya wa ay ta gumubat ya umat hinan mabi'ah an alipugpug an malpuh appit di buhu'an di algaw.
15 Ya ibaliw ditu'un tatagun Apo Dios an nidugah di abalinana ta abakon tu'u nan buhul tu'u
an nan paldi'it di pumpamatoy tu'un didan amin.
At dumalat di pangabakan tu'u ya it'u' tu'u mahkay di pun'am'amlongan tu'u.
Ya munggotad tu'u ta ma"abhug tu'u
ta umat tu'uh nan ma"apnu an duyun ma'usal hinan pun'onngan hi moghob.
16 At henen gutud ya ibaliw ditu'u nongkay ay Apo Dios an tataguna
an umat hinan mumpahtul an ipapto'nay kalniluna ta mi'id di ma'at ay didah nappuhi.
At mumbalin tu'un nabalul ay Hiya
an paddungnay munletaa' an balitu' an mihinah nan koronan di ali ti ma'al'ali tu'u.
17 At nidugah di pumhodan tu'u
an namamah nan ungunga ti do'ol di ma'an ya ma'inum.”