Nan Kalin Apu Dios Isaiah 18

Hay pangastiguwan APU DIOS hi iKus

1 Nunna-ud an madadag nadan tatagun numbobled Kus nah pingngit nadan wangwang an madngol di puntayyapan di dudun. 2 Hanadan binaal tuwen boble an nunlugan hi bangkan nakapyah katlubung ya idalan da nah Wangwang an Nile ta ume dah udum an boble.

Dakayun nipaalin mangipainilah pinhod yun maat, umanamut kayuh boble yun numboblayan di natag-en tatagu ya madangiy bolat da ya hinnatkon di kali dan numboble nah ginanodwan di wawangwang an pakatakkutan am-in di tatagu te nakal-ot kayu ya makabbungot kayu, hituwey eyu ipainilah dih boble yu:*

3 Dakayun am-in an tatagu tuh luta, deket mipatap-o nan bandelah tap-on di bilid ya halipat-an yu ta tibon yu. Ya donglon yuy gangon di tangguyub. 4 Te athituy kinalin APU DIOS ke ha-on: “Ha-oy an Dios ya maid di ek aton, mu ammunay uh-uhdungak didan umat nah kawadaan di dulnu nah hilong nah ahiani ya umat nah potangana nah maka-al-algo.”

5 Man-uket kinalina tuwe ya ahi dadagon APU DIOS nadan buhul mi umat nah mamlag hi grapes an kohatona nadan himmaping an hapang an adi bumunga.† 6 Ahi mungkiwahit di adol dadiyen tindalun buhul mit waday kanon di hahamuti inggana mapoppog di inugawan. Athidi damdama nadah mailom an aggayam an waday kanon da inggana mapoppog di ahi kotolan.

7 Kediye ya ahi pun-ialin nadan natag-en tatagun madangiy bolat day iappit dan APU DIOS an Kabaelanan am-in.‡ Dida nadan pakatakkutan am-in di tatagu te nakal-ot da ya makabbungot dan hinnatkon di kali dan numboble da nah ginanodwan di wawangwang ya ahida iali dadiyen iappit dan APU DIOS an Kabaelanan am-in nah Bilid an Zion an pundayawan ke hiya.

* 18:2 Dadiyen binaal di bimmobled Kus ya immali dad Judah ta kalyon da nadah aap-apuh diy mipanggep hi planun di patul dan makikaddum di tindalun di iJudah hi tindalunat makigubat dah buhul dan iAssyria. Mu hi Isaiah ya inilanan adi maphod an abuluton dah diye, mu hay ot ya abuy aton da ya mundinol dan APU DIOS an mangihwang ke dida. Ot ne kalyona ke dadiyen tatagun umanamut dah boble da. Handih eda umanamut ya inabig na ni-an hi tuwe. † 18:5 Datuwen buhul an dadagon APU DIOS ya dida nadan tindalun di Assyria. ‡ 18:7 Datuwen tatagun numbobled Kus an bumaddang ot hi iJudah an makigubat hi buhul dan iAssyria ya ahida dayawon hi APU DIOS an Dios di holag Israel hi udum hi algo.