4
Hana mundaydayaw ad langit
1 Emmopoh hay hato an inali na ja entangad u ja tinnig u han pantaw ad langit an nipfupfughor, ja chengngor u khu chin makhangoh an hapit an khenong chi abpfuu. Ja inali na hi, “Hongkhop a ta ipatikhaw u ay he-a hay hana ene-eꞌchan Apo Jos an ma-at.”
2 Ay chuy gwot ja immali hini apfalinan ni Espiritun Apo Jos ay ha-in, ja tinnig u han trono ad langit an gwa han inu-umpfun
3 an khun munlittoꞌ hi pannig u an omaꞌ-at hay hana munlittoꞌ an pfato, an hinuy haspe ja karnelya. Ja gwa han atipfungalon an neneggwod ay chuy trono an amat ay ni pfato an esmeralda chi tikhaw na.
4 Ja gwa han chugwam polo ta han apat an trono an nunlawlaw ay chuy nuntotonga an trono, ja gwa khu han chugwam polo ta han apat an pangulu an numpanga-umpfun ay cha chuy an trono. Numpunlopfong cha hi mumpuchaw ja numpungkorona cha hi napfalitu-an an korona.
5 Ja tinikhaw u han ilat ja chengngor u han mungkhikhinlunud an ichor an narpu ay chuy nuntotonga an trono. Ja gwacha han peto an hilaw an khun pfumilachaw ay chuy negpongan chuy an trono, an hija hini Espiritun Apo Jos.
6 Ja gwacha khu ay nuy negpongan chuy trono han amat hi chagkhar an baybay an munletaaꞌ.
Ja gwa han apat an himpfun Apo Jos an khun mun-od-odmay an nunleneꞌgwoh ay chuy nuntotonga an trono, ja namataan an amin chin achor cha.
7 Chin oha ja amat hi layon, chin me-aggwa ja amat hi pfuta-ar an pfakah, chin me-atlo ja chin angah na ja amat hi angah chi takhu, ja chin me-apat ja amat hi tugwi an khun tomajap.
8 Hay hachi apat an khun mun-od-odmay ja hengkhogchang cha hi pajaꞌ, ja namataan chin numpfinahher an pajaꞌ cha. Ja a-arkha-arkhaw ja achi cha epogpokhong an mungkankanta an,
“Hi Apo Jos an munnaud an nasantuwan ja achi malukud chi apfalinana,
ma-id uchumna hi mipadchung ay ni kinasanto na.
Gawwacha hija chin hunhunana ingkhana ad ugwani ja ma-id apogpokhana.”
9 Hay hato an apat an he-od-odmay ja khun cha dayawon hichin inu-umpfun ay chuy nuntotonga an trono, ja ipapfagpfagto cha hija an mamattakhu hi ma-id chi pogpogna. Ja khun cha munyaman ay hija. Gwa ayya an mundayaw chin apat an he-od-odmay
10 hon nunjongot chin chugwam polo ta apat an pangulu chin negpongan chuy inu-umpfun ay chuy nuntotonga an trono, hon dinaydayaw cha hija an matakhu hi ma-id chi pogpogna. Hon egwallang cha chin korona cha ay chuy agwachaan chin trono hon inali cha hi,
11 “He-a an Apo mi ja Jos mi,
he-a ja angkhay chi mipapfagpfagto ja medaydayaw,
ja achaan chi apfalinan.
Ja he-ay nampfu an amin chi nagwacha.
Narmu cha ja nagwachaan cha hi piꞌtakhuwan khapo ta hitay chi penhod mu.”