23
Ya tugun meipanggep ni pandeyyaw Apu Dios
1 Ya hakey ni lakin negapun winu neputul singngedan tu, ey eleg mabalin ni meki-emmung ni hi-gayun mandeyyaw nan Apu Dios.
2 Yadda inla-la-gah, anin idan u-ungnga da ingganah di meikkewwalun inap-apu da, ey eleg ida mabalin ni meki-emmung ni hi-gayun mandeyyaw nan Apu Dios.
3 Yadda iAmmon winu iMoab, anin idan u-ungnga da ingganah di meikkewwalun inap-apu da, ey eleg ida mabalin ni meki-emmung ni hi-gayun mandeyyaw nan Apu Dios,
4 Tep eleg dakeyu anhan idwatan ni kennen niya danum eman ni kayu kamengellin nalpuan yud Egypt. Nem sinangdanan da anhan law hi Balaam e u-ungngan Beor e iPethor di Aram Naharaim, et idutan dakeyu.
5 Nem ay eleg denglen Apu Dios e Dios yu hu imbagan Balaam. Impambalin anhan law Apu Dios e Dios yun bendisyon humman ni idut, tep et-eteng hu neminhed tun hi-gayu.
6 Entan pakidagdagyum idan iAmmon ey iMoab ni nunyan ketaggu yu anin ni hipa meippahding.
7 Nem hedin yadda iEdom ey entan tudda anggebe-hel tep agi yudda, anin idan iEgypt tep nebayag kayun nekibebley ni hi-gada.
8 Dammutun meki-emmung idan hi-gayu hu helag dan mandeyyaw nan Apu Dios meippalpud inap-apu da.
9 Hedin kayu mekiggubbat, ang-ang yu et eleg kayu meihnup idad kameibbillang ni beken ni malinih.
10 Hedin nambalin ni beken ni malinih hu hakey ni laki tep wada neukat di annel tun hileng ni neugipan tu, ey mahapul ni hi-yanen tu nangkampuan dan han-aggew.
11 Hedin kamangkelinnug aggew, man-e-meh et han umenamut di kampun kelinnugan ni aggew.
12 Malkai yud a-allaw ni kampu yu hu pangkahhilyatan yu.
13 Et mahapul ni emin kayu ey wada ittabin yun pala tep hedin kayu mante-i, ey umku-ku kayud puyek et hedin negibbuh, man sina-bunan yu.
14 Hanneya ipahding yu tep mahapul ni malinih hu pangkampuan yu, tep wadadman hi Apu Dios e Dios yun mengeddug niya memaddang ni hi-gayu, et apputen yu buhul yu. Ey mahapul ni endi tu ang-angen diman ni hipan anggeba-ing tep entanniy iwwalleng dakeyu.
15 Hedin wada himbut ni imbesikan tu kan himbut ni hi-gatu et maihikug ni hi-gayu, entan tu papilit ni pambangngad.
16 Abulut yun mekibbebley ni hi-gayu etan di bebley ni pinili tun pambebleyan niya entan tu lehani.
17 Endin hi-gayun helag Israel hu mambalin ni tu pebeyyad annel tud tempol idan beken ni makulug ni dios.
18 Entan mewan tu iappit di baley Apu Dios e Dios yu hu hipan sinangdan idan daka pebeyyad annel da, tep anggebe-hel ni peteg idan Apu Dios e Dios yu.
19 Entan tu peporsentoh hu pebenneh yun pihhuh winu kumpulmih ni kapebenneh ni kameporsentohi di edum yun helag Israel.
20 Nem dammutun peporsentoh yu pebenneh yuddan tutu-un nalpud edum ni bebley. Nem entan nisi tu singil ida edum yun helag Israel ni porsentoh, et bendisyonan Apu Dios e Dios yu emin hu pehding yud pambebleyan yu.
21 Hedin wada insapatah yun Apu Dios e Dios yu, ey mahapul ni eleg yu ippangil. Mahapul ni ippahding yu tep humman hu kan Apu Dios e Dios yu, et manliwat kayu hedin eleg yu pehding.
22 Beken ni liwat hu eleg mansapatah nan Apu Dios,
23 nem hedin inggeb-at yun mansapatah ey mahapul ni ippahding yu.
24 Hedin limmaw kayud leguntan dinagsi yu, dammutun kennen yu hu pigan pinhed yun grapes ni intanem tu ingganah mehingla kayu, nem eleg mabalin ni kayu umihhambag.
25 Hedin mewan limmaw kayud payew ni dinagsi yu ey dammutun umpa-sing kayun kussimen, nem eleg mabalin ni geppasen yu hu intanem tu.