27
Ya meipanggep ni pan-appitan etan di Duntug ni Ebal
1 Hi Moses et yadda aap-apu ey kan daddan edum dan helag Israel ey “Mahapul ni u-unnuden yun emin ida intugun min hi-gayun nunya.
2 Hedin man-agwat kayullid Wangwang e Jordan et umlaw kayud bebley ni iddawat Apu Dios e Dios yun hi-gayu, ey iha-ad yulli etta-teng ni batu ey pakpakan yun plaster.
3 Itudek yun emin ida Tugun ku et yadda intuttudduk. Humman pahding yu hedin man-agwat kayud Jordan, et lumaw kayud bebley ni iddawat Apu Dios e Dios yun hi-gayu e dakel ni peteg gatas niya danum ni putsukan, tep humman dedan la insapatah Apu Dios e Dios idan aammed yun hi-gayu.
4 Ippidwak ni e-helen e yallin pan-agwatan yu etan di Wangwang e Jordan, ey iha-ad kayulliddan batud Duntug ni Ebal et pakpakan yun plaster.
5-6 Kapya kayun altar Apu Dios e Dios yu e usal yu hu eleg mapehek ni batu, et pan-appitan yu. Yadman pangiappisi yun kagihheban kamei-appit nan Apu Dios e Dios yu.
7 Ey i-appit yudman hu kamei-appit ni pekiddagyuman ey hinemul yudman etan in-appit yu, et man-an-anla kayud hinanggan Apu Dios e Dios yu.
8 Itudek yuddan emin hu Tugun etan idad inha-ad yun batun nepakpakan ni plaster.”
9 Immehel mewan hi Moses et yadda padin helag Lebay idan helag Israel ey kantuy “Hi-gayun edum min helag Israel, eneeneng kayu ey pandengel kayu! Yan nunya ey nambalin kayun tutu-un Apu Dios e Dios yu.
10 Et humman hu, mahapul ni u-unnuden yudda tugun niyadda intuttuddun Apu Dios e Dios yun inhel kun hi-gayun nunya.”
11 Kan Moses mewan idan tutu-uy:
12 “Hedin man-agwat kayud Wangwang e Jordan, man mahapul ni um-ehneng ida helag Simeon, helag Lebay, helag Judah, helag Issakar, helag Joseph et ya helag Benjamin di Duntug e Gerisim et ehelen da bendisyon dan hi-gayudman.
13 Ey um-ehneng ida damadda helag Reuben, helag Gad, helag Asher, helag Sebulun, helag Dan et ya helag Naptali di duntug e Ebal et ehelen da idut da.
14 Hedin negibbuh ey intekuk idan helag Lebay e kanday:
15 ‘Meiddutan etan tuun mampaot winu mengapyan dios et ililliggud tun daydayawen. Hi Apu Dios ey anggebe-hel tun peteg ida dios ni kinapyan tuu.’
Hummangen idan emin ni tuu e kanday ‘Amen.’ ”
16 “Meiddutan etan tuun tuka pihhulad ametun inetu.”
Hummangen idan tuun kanday “Amen.”
17 “Meiddutan etan tuun medeldel ni puyek ni dinagsi tu e tuka i-e-tan kegad.”
Hummangen idan tuun kanday “Amen.”
18 “Meiddutan etan tuun tuka ippangulu nekulap ni tuud beken ni neiptek ni dalan.”
Hummangen idan tutu-un kanday “Amen.”
19 “Meiddutan etan tuun beken ni limpiyuh tuka pehding idan nekibebley, yadda nepu-hig et yadda nebalu.”
Hummangen idan tutu-un kanday “Amen.”
20 “Meiddutan etan lakin tuka i-ulig ahwan ametu, tep lawah humman ni impahding tun ametu.”
Hummangen idan tutu-un kanday “Amen.”
21 “Meiddutan etan tuun tuka i-ulig animal.”
Hummangen idan tutu-un kanday “Amen.”
22 “Meiddutan etan lakin tuka i-ulig hu agi tun biin anin ni u-ungngan ametud hin-appil ni bii winu u-ungngan inetud hin-appil ni laki.”
Hummangen idan tutu-un kanday “Amen.”
23 “Meiddutan etan lakin tuka i-ulig biin nengapun hi-gatu.”
Hummangen idan tutu-un kanday “Amen.”
24 “Meiddutan etan tuun illigud tun memettey ni edum tun tuu.”
Hummangen idan tutu-un kanday “Amen.”
25 “Meiddutan etan tuun kapebeyyad et patyen tu tuun endi bahul tu.”
Hummangen idan tutu-un kanday “Amen.”
26 “Meiddutan etan tuun eleg tu abuluten ida huyyan tugun tep eleg tu u-unnuda.”
Hummangen idan tutu-un kanday “Amen.”