13
Ya pengi-eng-engan idan helag Israel ni pengulwan ni lakin u-ungnga da nan Apu Dios
1 Kan mewan Apu Dios nan Moses ey
2 “Emin hu pengulwan ni u-ungnga yun laki niya nemangulun impah ni animal yu ey ieng-eng yun hi-gak. Tep bagik emin hu pengulwan ni u-ungnga yun helag Israel, anin idan nemangulun impah ni animal yu.”
3 Kan Moses idan edum tun helag Israel ey “Nemnemnem tayun ingganah huyyan aggew ni neni-yanan tayun Egypt et meliblih itsud neihbutan tayu gapuh ni et-eteng ni kabaelan Apu Dios. Ey ang-ang tayu et eleg tayu kanen hu sinapay ni neha-adan ni kamampelbag.
4-5 Yan nunyan memengngulun bulan ni Abib ey hini-yan tayu Egypt et lumaw itsu etan di bebley ni impakulug Apu Dios ida lan ammed tayun iddawat tun hi-gatsu. Humman hu nambebleyan idan Kanaanite, Hittite, Amorite, Hibite niyadda Jebusite. Humman ni bebley ey dakel kennen ey mateba kameitnem. Hedin umdateng kayudman, ey entan tu liwwan ni ippahding hu pan-am-amlengan yu hedin nedatngan huyyan aggew ni katootoon.
6-7 Et yan dettengan yudman ni kakkayyaggud ni bebley ey ang-ang yu et eleg yu kanen hu sinapay ni neha-adan ni kamampelbag niya mahapul ni endi kamampelbag ni sinapay di baballey yu et yad bebley yu ni memengngulun pitun aggew ni memengngulun bulan. Et yan meikkeppitun aggew ey mampiyestah kayu e manhahamul kayun penaydayaw yun Apu Dios.
8 Et hedin ippahding yulli huyyan piyestah ni katootoon ey ehel yuddallin u-ungnga yu e mukun wada huyyan piyestah ey tep huyya penginemnemneman tayun impahding Apu Dios et hi-yanen tayu Egypt.
9 Huyyan piyestah ey heni malkad ngamay winu tuktuk yun mengippenemnem ni hi-gatsun ingganah idan tugun Apu Dios. Huyya pehding tayu tep impa-kal daitsun hi-gatud Egypt gapuh ni et-eteng ni kabaelan tu.
10 Et humman hu ippahding yulli huyyan piyestah di nagtud ni aggew ni katootoon.
11 Yallin nunman alin dettengan yu etan di bebley ni impakulug Apu Dios ida lan ammed tayun iddawat tun hi-gatsu e humman hu nambebleyan idan iKanaan,
12 ey mahapul ni ieng-eng yun Apu Dios hu pengulwan ni u-ungnga yu tep emin hu lakin pengulwan ni u-ungnga yu anin idan nemangulun lakin impah ni animal yu ey hi-gatu.
13 Nem humman idan pengulwan ni lakin u-ungnga yun ieng-eng yun Apu Dios, ey dammutun hullulan yun lakkitun impah ni kalnero. Et ya nemangulun lakkitun impah ni kebayyu ey dammutun hullulan yun lakkitun impah ni kalnero. Nem hedin eleg yu pinhed ni hullulan, giplung yu buklew tu et matey.
14 Ey hedin ibbagaddallin u-ungnga yun edum ni aggew hu gaputun yuka pengippahdingin nunya, kan yulli ey ‘Mukun mika ippahding huyya ey tep gapuh ni et-eteng ni kabaelan Apu Dios ey impa-kal dakemid Egypt e neihbutan mi
15 e kinastigu tu etan patul et pateyen tu pengulwan ni u-ungnga tu, yadda pengulwan ni u-ungngaddan tutu-u tu niyadda nemangulun impah ni animal da tep manghay et eleg dakemi i-abulut ni me-kal diman. Et humman hu, mahapul ni iddawat tayuddan Apu Dios hu nemangulun lalakkin u-ungnga tayu et yadda nemangulun impah ni animal tayu. Nem ya meihhullul ni pengulwan ni lakin u-ungnga tayu ey ya impah ni kalnero.
16 Huyyan pehding tayu ey heni malkad ngamay winu tuktuk tayu et penginemnemneman tayun ingganah ni nangkalan Apu Dios ni hi-gatsud Egypt gapuh ni et-eteng ni kabaelan tu.’ ”
Yan nengipenguluan Apu Dios idan helag Israel et hi-yanen da hu Egypt
17-18 Yan nengiebulutan etan ni patul ni hi-yanen idan helag Israel hu Egypt ey beken etan di keltad ni mampellaw di Pilistia hu impangulun Apu Dios ni dinlan da ey humman et hu neihnup. Et ya impangulu tu ey ya etan di eleg mebebleyi e mampellaw etan di Madlang ni Baybay nem nelikaw humman ni dinlan da. Tep kan Apu Dios ey “Nungay mantuttuyyu ida et mambangngad idad Egypt hedin mahapul ni mekiggubbat ida.” Humman ninemnem tun pehding anin ni wada almas dan intabin dan neni-yanan dan Egypt.
19 Yan neni-yanan di Moses ni Egypt ey neki-la tu genit Joseph tep inhel lan Joseph idan edum tun helag Israel e kantuy “Baddangan dakeyullin Apu Dios et hedin hi-yanen yulli Egypt, mahapul ni peki-la yulli genit ku.”
20 Hini-yan idan helag Israel hu Sukkot et dumteng idad Etham di gilig etan ni eleg mebebleyi et mangkampuddadman.
21-22 Ya impahding Apu Dios ni nengipengulun hi-gada ey hedin kawwalwal, kamambalin ni kulput et tuka ippangnguludda et hedin hileng, kamambalin humman ni kulput ni et-eteng ni apuy ni kamantettebbel et humman daka penillag ni dellanen da.