Haggai
Ya meippanggep nunyan libluh nan Haggai
Yan eman ni 538 B.C. ey in-olden nan Cyrus e patul di Persia e dammutun mambangngad idad Jerusalem hu Jews ni neilaw di Babilon. Et dakel ida hu Jews ni nambangngad ni nunman ni tsimpuh. Inyayyaggud da hu altar nan Apu Dios et ikapya da hu pengibbehwatan dan Tempol ni nebahbah. Nem entanni ey wada hakkey ey ya baley tu kumedek hu tuka pangkapyaa niya ya intanem tu hu tuka ipapaptek. Ya hakey mewan ey ida kaumtatakut ni buhul da et isiked dan mengiyayyaggud ni Tempol.
Nelabah hu hampulut liman toon ey natduk papayyew da et endi da ineni tep umhulun hu liwat da, nema-ma-ma tep liniwwan dan mansilbin nan Apu Dios niya eleg da gibbuhen ni iyayyaggud hu Tempol. Et putuken Apu Dios hu prophet ni menghel idan tutu-u niyadda ap-apu da ma-lat mambangngad idan mansilbin hi-gatu niya ma-lat gibbuhen dan iyayyaggud hu Tempol. Hi Haggai hu hakey ni pinili tun prophet tu. (Inu-unnud idan tutu-u hu inhel tu et gibbuhen dan iyayyaggud hu Tempol eman ni 516 B.C.)
Ya neitudek eyad libluh:
1. Inhel Apu Dios ni gobernor niyadda tutu-u e iyayyaggud da hu Tempol, et ilepuddan tutu-un mangngunnu. (chapter 1)
2. Ya impeamtan Apu Dios nan Serubbabel e gobernor et hi Joshua e eta-gey ni padi: Ya baluh ni Tempol ey meidaydayaw ali. (chapter 2:1-9)
3. Inhel Apu Dios e bendisyonan tudda tutu-u tu hedin mantuttuyyuddan liwat dan eleg da pengu-unnudan ni hi-gatu. (chapter 2:10-19)
4. Ya nengisapatahan Apu Dios nan Serubbabel e bahbahen tulli kabaelan idan edum ni bebley. (chapter 2:20-23)
1
Intugun Apu Dios e mebehwat mewan etan Tempol
1 Yan eman ni nemangulun aggew ni meikka-nem ni bulan ni meikkadwan toon ni nampatulan Darius di Persia ey immehel hi Apu Dios nan Haggai e prophet. Et an ehelen nan Haggai nan Serubbabel e gobernor di Judah e u-ungngan Sealtiel, et hi Joshua e eta-gey ni padi e u-ungngan Jehosadak.
2 Kantuy “Heninnuy hu inhel Apu Dios e Kabaelan tun emin ‘Kan ida eyan tutu-u ey beken nin nunyan tsimpuh ni pengiyayyaggudan ni Tempol.’ ”
3 Et ehelen Apu Dios nan Haggai huyyan e-helen tuddan tutu-u e kantuy
4 “Kele nangkehammad hu baballey yu e tutu-uk ey hedin ya Tempol ku, man nanengtun nebahbah tep eleg yu iyayyaggud?
5 Kaw eleg yu ang-anga kameippenahding ni hi-gayu?
6 Dakel inggaud yu, nem ekkut ineni yu. Ma-nut wada kennen yu, nem kayu kameuppa. Wada meinnum ni yuka innuma, nem kulang. Niya wada balwasi yu, nem kayu kamektel. Tagan yu ngunu, nem kaumkulang yuka tangdanad mahapul yu.”
7 Immehel mewan hi Apu Dios e Kabaelan tun emin ey kantuy “Kaw eleg yu amta hedin kele henin nuntan kameippenahding?
8 Kayu pangelan keyew di muyung et iyayyaggud yu eya Tempol ku et dayawen yuwak, tep humman dedan hu lebbeng tun pehding yu ma-lat man-am-amlengngak.
9 Kanyu nem dakel ennien yu, nem entanni et kayu man-enni ey ekket ineni yu. Entanni mewan et ienamut yu ey endi maptek ey na-puh tep hineb-uk ku. Impahding ku humman tep nena-yun ni nebahbah Tempol ku ey wada hakkey ni hi-gayu ey ya baley tu hu tuka kennapyaa.
10 Humman mewan gaputun endi udan et endi kaumtemel ni intanem yu.
11 In-alik hu ugew eyad bebley yu et mema-ganan hu papayyew yu, yadda muyung yu, yadda legunta yun nangketaneman ni grapes niya olibah, niyadda edum ni intanem yu ma-lat maupa kayu niyadda animal yu, niya ma-lat mebahbah ni emin hu hipan nan-aatuan yu.”
Ya nengu-unnudan idan tutu-un Apu Dios ni tugun tu
12 Entanniy inu-unnud di Serubbabel e u-ungngan Sealtiel, hi Joshua e eta-gey ni padi e u-ungngan Jehosadak, niyaddan emin etan tutu-un natdaan, hu inhel Apu Dios e Dios da nan hi Haggai e prophet tu. Et daydayawen da law hi Apu Dios.
13 Entanniy inhel Haggai hu pinhed Apu Dios ni e-helen tuddan tutu-u. Kantuy “Kan Apu Dios ey ‘Issapatah kun hi-gayu e baddangan dakeyun ingganah. Hi-gak e Ap-Apu hu nanghel idan nunya.’ ”
14 Winedan Apu Dios hu amleng di Serubbabel e gobernor ni Judah, hi Joshua e u-ungngan Jehosadak e eta-gey ni padi niyaddan emin etan natdaan ni tutu-un Apu Dios. Et lapuan dan mangngunnud Tempol Ap-Apu e Dios da e Kabaelan tun emin.
15 Yan nunman hu meikkadwampulut epat ni aggew ni meikka-nem ni bulan ni meikkadwan toon ni nampatulan Darius.