☰ Isaiah 53
53
1 Kaw hipa makkaw mengullug idan intuttuddu mi? Niya hipadda nengipeang-angan Apu Dios ni et-eteng ni kabaelan tu? * 2 In-abulut nan Apu Dios ni meippahding ni bega-en tun kamei-ellig etan di pakatmel ni neitnem e kamanlemmut di mamegan puyek. Hi-gatu ey nebabah ni tuu niya beken ni kayyaggud ang-ang tu, et humman hu endi umhulun ni keewwisan ni tutu-un hi-gatu. 3 Anggebe-hel ni tutu-u niya daka pippihula. Nemahhig nanhelheltapan tu niya lemyung tu. Endi hakey ni neminhed ni mengitkel ni hi-gatu. Eleg tayun hekey ibilang hu kaweda tu.
4 Nem inebulut tun helheltapen etan lebbeng tun helheltapen tayu, ey kan tayu nem humman ni hinelheltap tu hu pengastigun Apu Dios ni hi-gatu. † 5 Nem beken, tep gapuh ni liwat tayu ey liniputan da niya nambaig da. Hinelheltap tu humman ma-lat mekidagyum itsun Apu Dios et mambalin itsun kayyaggud. 6 Emin itsu ey heni itsu kalneroh ni netalak e wada hakkey ey nanglaw di lawwan tu. Et humman hu, gullat et hi-gatsu mekastigu, nem hi-gatu hu kinastigun Apu Dios et teklaen tu liwat tayu.
7 Nemahhig impahpahding dan hi-gatu, nem insipel tu et pemegga tu i-ineng. ‡ Hi-gatu ey kamei-ellig ni kalneroh ni inlaw dan da keklengen. § Ey heni impah ni kalneroh e anin ni pampu-litan et kaum-eneeneng. * 8 Da dimpap ey kanday mekastigu et ilaw da etan di tu ketteyyan. Nem endin hekey nenangud hedin hipa meippahding ni hi-gatu. Tep eleg da amta e mettey tep ya liwat ni emin ni tutu-u. † 9 Nekiketey idan wada bahul da, anin ni endi nambahulan tu niya endi itek ni inhel tu. ‡ Et da ikulung di kulung ni kedangyan. §
10 Humman pinhed Apu Dios ni meippahding ni hi-gatu e manhelheltap et iketey tu ke-kalan ni liwat ni tuu. Nem hedin megibbuh ni i-appit tu biyag tu tep ya liwat ey ang-angen tuddalli dakel ni helag tu * ey wadalli andukkey ni biyag tu. † Hi-gatu mengippeamnun planuh Apu Dios. 11 Megibbuh kaya humman ni panhelheltapan tu et man-am-amleng ali law tep inamta tu e wada nansilbian ni nanhelheltapan tu.
Heninnuy hu kan Apu Dios meippanggep ni hi-gatu “Humman ni kakkayyaggud ni bega-en ku hu meneklan liwat ni dakel ni tutu-u, et gapuh nunman ni pehding tu ey pessinsahan ku liwat da ma-lat maibilang idan kayyaggud. ‡ 12 Et humman hu, pambalin ku humman ni bega-en kun kamedeyyaw niya iddawat ku hu et-eteng ni kabaelan tu. Nan-am-amleng ni nengabulut ni pemetteyan da et mailegat di neipahding idan lawah ni tutu-u. § Hi-gatu neneklan liwat idan tutu-u niya nandasal ma-lat mepesinsahan hu liwat da.” *
* 53:1 John 12:38, Romans 10:16 † 53:4 Matthew 8:17 ‡ 53:7 Matthew 27:12-14 et ya Luke 23:8-9 § 53:7 Ang-ang yu Revelation 5:6 ya John 1:29 ya 1:35. * 53:7 Ang-ang yu Revelation 5:6 ya John 1:29 ya 1:35. † 53:8 [7-8] Acts 8:32-33. ‡ 53:9 Ang-ang yu hu 1 Peter 2:22. § 53:9 Matthew 27:57-60 * 53:10 Ya keibbellinan nunyan na-hel ni helag nan Christo, ey beken ni tu-wangun helag tu, nem yaddalli mengullug ni hi-gatu. † 53:10 Ya keibbellinan tu ey “wadalli andukkey ni biyag tu” ey ya netaguan Christo et mannananeng ni mategu. ‡ 53:11 Romans 5:19 § 53:12 Luke 22:37 * 53:12 [52:13–53:12] Emin ida huyyan verses ey meippanggep ni nanhelheltapan Christo e Bega-en Apu Dios tep ya liwat ni tutu-u ma-lat mehelakniban ida.
☰