5
Ya etan kamengippaptek ni hi-gatsu e hi Jesus Christo
1 Emin tuun makulug ni tuka kulluga e hi Jesus hu pinutuk Apu Dios ni kamengippaptek ni hi-gatsu ey humman ida tuu tu. Ya tuun pinhed tu hi Ametayu e hi Apu Dios ey pinhed tudda dama etan impantuun Apu Dios e humman ida kamengullug.
2 Hedin pinhed tayu hi Apu Dios et tayu kau-unnuda hu tugun tu, man huyya keang-angan tun pinhed tayu etan ida u-ungnga tu e humman ida kamengullug ni hi-gatu.
3 Ka-immatun hedin wada impeminhed tayun Apu Dios tep tayu kau-unnuda etan inhel ni tugun tun pehding tayu. Humman ni tugun ey beken ni neligat,
4 tep emin itsun kameibbillang ni u-ungnga tu ey wada kabaelan tayun mengiddinnel nan Jesus ni umbaddang ni hi-gatsun eleg manliwwat niya eleg mengippahding ni lawah tep ya tayu kapengullug nan Jesus.
5 Ya tuun eleg mengippahding ni lawah ni henin kapehpehding idan eleg mengullug ey humman makulug ni tuka kulluga e U-ungngan Apu Dios hi Jesus.
6-8 Wada hu tellun pengi-ang-angan e hi Jesus Christo ey makulug ni U-ungngan Apu Dios. Ya memengngulu ey ya nampebenyagan tun danum. Ya meikkadwa ey ya kuheyaw tun immayuh eman ni neteyyan tu. Ya meikkatlu ey ya Ispirituh Apu Dios tep makulug ni emin hu tuka e-hela. Nan-uunnud ida huyyan tellun kamengippeamtan makulug ni U-ungngan Apu Dios hi Jesus.
9 Hedin tayu kakulluga hu kae-helan tuu, ey nema-man kullugen tayu hu kapeang-ang nan hi Apu Dios, tep hi Apu Dios ey neta-ta-gey nem ya tuu. Et ya humman ni impeang-ang tu ey humman keang-angan tun makulug ni U-ungnga tu hi Jesus.
10 Emin ida etan kamengullug nan Jesus e U-ungngan Apu Dios ey neka-amta da e makulug hu inhel Apu Dios meippanggep ni hi-gatu. Nem yadda eleg mengullug ni inhel tu ey impambalin dan maitek.
11 Ya pinhed Apu Dios ey peamta tun hi-gatsu e indawtan daitsun biyag ni endi pappeg tun wadan U-ungnga tu e hi Jesus Christo.
12 Et humman hu, emin hu nengabulut nan Jesus Christo ey wada biyag dan endi pappeg tu. Nem yadda etan eleg mangulug ni hi-gatu ey endi humman ni biyag da.
Ya nalpuan ni biyag tayun endi pappeg tu
13 Intudek ku huyyan hi-gayun kamengullug ni U-ungngan Apu Dios ma-lat amtaen yu e wada hu biyag yun endi pappeg tu.
14 Wada dinel tayu e emin etan ibbaga tayun Apu Dios ey iddawat tu hedin neiingngeh di pinhed tu.
15 Hedin itsu kamedinnel e dedngelen tu hu dasal tayu, ey makulug ni iddawat tu humman ni hipan tayu kaibbaga.
16-17 Hedin wada ang-angen yun edum yun wada impahding tun lawah ni panliwwatan tu, nem beken ni nehalman ni liwat, ey idasali yu ma-lat baddangan Apu Dios ni eleg mengippahding ni nunman niya ma-lat pesinsahan Apu Dios humman ni liwat tu. Emin hu lawah ni kakapkapyaan tuu ey liwat, nem wada hu nehalman ni liwat niya wada dama hu beken ni nehalman. Beken ni kangkuy yudda iddasalan ni emin hu kamanliwwat, tep endi silbi tun an iddasalan ida etan nehalman liwat dan daka iggeb-at ni kehhingen hi Jesus.
18 Inamta tayu e yadda tuun nengabulut nan hi Apu Dios et ya U-ungnga tun hi Jesus Christo e kamengipappaptek ni hi-gatsu ey beken ni kenkenayun ni ida kamanliwwat et eleg mabalin ni ida mehe-ul di hipan lawah.
19 Inamta tayu mewan e hi-gatsu hu tuun Apu Dios et emin ida etan tuun eleg mengullug ey humman ida tuun Satanas e ap-apuddan lawah.
20 Ey inamta tayu e immali hi Jesus Christo e U-ungngan Apu Dios, et idwat tun hi-gatsu hu tayu kapengewwat ma-lat amtaen tayu hu makulug ni Dios. Ey wada law nehammad ni neiegian tayun Apu Dios tep neibilang itsun agin U-ungnga tu e hi Jesus Christo. Tep hedin hi Jesus, man makulug daman Dios. Ey hi-gatu hu kamengidwat ni biyag ni endi pappeg tu.
21 Kaegiegi, ang-ang yu et eleg yu daydayawen ida etan beken ni makulug ni dios.