1 Emin hu tuu ey nekapuy ida niya endi kabaelan da. Ansikkey hu biyag da ey napnun ligat. 2 Henidda etan ni habung e ma-nut nebekyag nem nekemtang ey nakling. Henin allinnew ni kulput e nekemtang ni attukaw la. 3 Apu Dios, kaw hellipat-an muwak et idiklamuh muwak ma-lat ehelen mu kastiguk? 4 Kaw dammutun wada hu tuun endi tu pambehhulan? 5 Implanuh mu ngu dedan hedin piga toon niya bulan ni ketegguan ni tuu. Ey eleg mabalin ni me-duman hu binilang mu. 6 Et humman hu diman et ngenamung tun man-iyyatun nekemtang. Heni dedangngu katteg bega-en, et humman hu, entan tu helipat-i et gibbuhen tu ngunu tun indawat mun hi-gatu.

7 Ya keyew ey anin ni nalngeh et wada namnamah ni umpingi et pumenga hedin neetteng. 8-9 Ey anin ni nedunut hu tunged tu et umpingi lamut tu hedin immudan.

10 Nem hedin ya tuu et netey, ey humman pappeg ni neitu-wan tu et endi law mannemnem ni hi-gatu. 11 Henin wangwang niya lebeng e kametduk ni nema-ganan. 12 Hedin netey hu tuu ey eleg law umbangun ingganah ni keendian ni kabunyan.

13 Nem hedin ngun hi-gak man nakka pekeddukdul ni mettey et muwak itlud dallem ni puyek et hedin na-kal law bunget mu ey hehmeken muwak. Ey ettu ew et getuden mu hu pengihwangan mun hi-gak ey. 14 Nem kaw hedin netey hu tuu man metegguan ali mewan ni edum ni aggew? Ey hedin makulug ni hanniman hu meippahding, man anin ni nemahhig eya nakka helheltapa et nakka namnamahan mepappeg hu ligat ku. 15 Ey eyyagan muwak et humumangngak ey um-amleng kan hi-gak e lintum. 16 Et yalli law pehding mu ey hellipat-an muwak nem beken ni ya nanliwatak. 17 Ey liwwanem alin emin hu nambahullak ma-lat ibilang muwak ni kayyaggud.

18-19 Nem ya kakulugan tu ey muka endia namnamah ni tuu e henin kakegdayin duntug et mangkaulin hu etta-teng ni batu, ey henin kakebullubulin puyek tep ya na-let ni udan. 20 Muka apputadda tuu, ni inendim ida, ey muka bahbaha ang-ang da hedin netey ida et mudda kapellaw etan di da panha-adan ni ingganah. 21 Eleg da amta hedin meiddeyyaw winu mebe-ingan hu u-ungnga da. 22 Ebuh law daka panhelheltapin daka giggibbeka ey ida kaumlelemyung.”