20
Ya inhumang Sophar e iNaamah
1 Hinumang Sophar e iNaamath e kantuy
2 “Nakka umguguhu eyan in-inhel mu, et humman hu, mahapul ni um-ehellak.
3 Insisipel ku hu pel-it mun hi-gami nem mahapul law ni hummangen daka.
4 Kaw eleg mu amta e neipalpu eman ni laputun nanha-adan ni tuud puyek,
5 ey nekemtang ni ebuh hu kapan-an-anlain tuun nekalliwtan?
6 Anin ni meetteng kabaelan tu et nemahhig hu tuka pampahhiya e dettengen tu kabunyan
7 et meitteyyab alin heni dep-ul. Et an ali hemmahemmaken idan nengamtan hi-gatu et kanday ‘Attu na-mu linawwan tu?’
8 Attukaw ali e eleg meang-ang, henin i-innep ni hileng e kameendi.
9 Anin idan gagayyum tu niyadda pamilyah tu et endilli law hu da penang-angan ni hi-gatu.
10 Et mahapul alin pebangngad idan helag tu hu hipan illa tuddan nangkewetwet.
11 Kat-agu niya na-let humman ni tuu, nem anggegannuy mettey et mambalin ni puyek.
12-13 Tuka pan-am-amlengin mengippahding ni lawah, henin amleng ni kapengngannin meheng-ew ni kennen.
14 Nem mambalin ni mapeit di egeh tu e henin pait ni kedet.
15 Mei-ellig ni i-uta tulli sinekew tun kinedangyan, tep ukkaten Apu Dios di egeh tu et bangngaden tu.
16 Ey mei-ellig ni ekmunen tulli gitan uleg et iketey tu
17 et eleg tu law pan-am-amlengi kamehawwahawwal ni mansikan olibah, ya gatas niya putsukan.
18-19 Endi silbin nan-aatuan tu ey endi gun-uden tu, tep sinelatelam tu hu nangkewetwet et peki-la tu baballey da.
20 Ya neagum ni tuu ey pinhed tun ellan emin hu hipan pinhed tu e endi hu kantun hiyya law.
21 Nem ya hanniman ni tuu ey meendilli kinedangyan tu, anin ni ya kennen tu.
22 Yallin keddangyanan tu ey umdateng ali hu nemahhig ni ligat ni memahbah ni hi-gatu et maumah hu kinedangyan tu.
23 Heballi peellin Apu Dios hu nemahhig ni ligat tu tep ya bunget tun hi-gatu.
24 Anin ni ippatna tun ibbebsikan hu peellin Apu Dios ni panliggatan tu et petteyen damengun Apu Dios.
25 Heni mangkeippa-net di annel tu hu pana et man-iih-ih kuheyaw tu et lektattuy nemahhig hu takut tu.
26 Mebahbah emin hu nebalol ni limmu tu tep peellin Apu Dios hu apuy et giheben tun emin.
27 I-uh-uh idan wadad kabunyan niyad puyek e nekalliwtan humman ni tuu.
28 Ey mebahbah emin kinedangyan tu tep ya bunget Apu Dios ni hi-gatu, henin kabahbahan ni baley hedin nalbengan hu puyek.
29 Henin nunya meippahding etan ni lawah ni tuu tep humman inhel Apu Dios.”